Lamka North Division (LND) Kumsim Khawmpi 18 veina October 5-6, 2024 sung EBCC Pearsonmun ah “Missions Nasepna a kipumkhatna” Johan 17:20-23 chih thupi zang in neih in om hi. Thugentu in Dr. Khamsuanthang Valte, Director WEC North East India pang in, Bible Study hun Rev. Gin Malsawm, Principal GBC in makaih hi.
October 5, 2024 zinglam dak 10:00 in Upa S. Dongzathang, Chairman Division Executive Committee (DEC) in khawmpi hong in, Rev Dr. M. khamkhanchin, Divisional Superintendent, Lamka North Division makaih in thumkhawmna om hi. Tuazoh in Business Chairman Upa M. Darneingam, Business Vice Chairman Upa Khamhenthang Ngaihte, Business Recording Secretary Upa D. Thangchinmawi leh Business Asst. Recording Secretary Upa T. Benjamin te makaih in Palai Vaihawmna neih in om hi. Tua hun ah kum 2025-26 sung a budget ding in Rs. 85,00,000 pom uh hi. Budget lak ah GAD adin Rs. 81,30,000D; DBMC (Missions) adin Rs. 1,20,000; DBDC (Dorcas) adin 1,50,000; DBYF (Youth) 90,000 leh DBCD (Children) a din 10,000 hiding hi. Kumnawn 2025 a Khawmpi 19 veina Ulian ding in Business Chairman Upa Dr. J. Son Go Kham (EBCC Hiangtam Lamka), Business Vice Chairman Upa M. Darneingam (EBCC Lamka Baptist Church), Business Recording Secretary Upa D. Thangchinmawi (EBCC Hiangtam Lamka) leh Business Asst. Recording Secretary Upa Jimmy T. Ginbiakthang (EBCC New Lane, Bungmual) te telching uhi.
October 6, 2024 zinglam dak 6:30 Devotion leh Bible Study hun ah kipumpiakna hun Pastor H. Kamzachin in makaih a Bible Study Rev. Gin Mawlsawm, Principal GBC in la hi. Zinglam dak 10:30 in mipi biakna kikhop om in Dr. Khamsuanthang Valte, Director WEC North East India in Pathian thutak gen hi.
Sunnung dak 1:00 akipan nitaklam dak 3:30 kikal Biakna hun ah Dr. Khamsuanthang Valte in Pathian thutak genna nei in Business Recording Secretary Upa D. Thangchinmawi in khawmpi report pia a Khawmpi 19 na Ulian dingte nagotna Rev Dr M. Khamkhanchin, Divisional Superintendent Lamka North Division in nei in Upa L. Pumkhanpau, Vice Chairman DEC in khawmpi khakna nei hi.
