Khristian Tuailai Pawl/Baptist Youth Fellowship puksia a muih leh mong mai ding a hon phallou, hon kem, hon veng a hon tonpih a hiai tan hon pitung tak man in Toupa min phat in om hen. Toupa hon pi nasa lampite khangthakte’n enkik a theihthak zel ding deihsakna ziak in a beubeu in i taklang ding.

Evangelical Baptist Convention kikepna sunga kahiang poimoh mahmahte laka khat tuh Tuailai Pawl kikepna ahi. Saptuam kiphuh khiak tung lai in Tuailai pawl tawh piangkhawm pah lou ahihman in kum bangzah hiam nung in hong piang pan hi. Heutu masate’ Tuailai Pawl department a om ding deih pawl ommah leh a hoihlou lam a hong om khak ding lauthawng a pilvang zek pawl leng na om uhi. Huaiziakin, Tuailai Pawl department hi zan khat thu a baihlam taka hong piang ahi kei chih i taklang masa hi.

Atung in Khristian Tuailai Pawl (KTP) kichi masa pen hi. Saptuam khangtou zel in, nasepna leng tangzai semsem ding in Toupa’n hon pitou hi. Leitung pumpi a saptuam kikhaikhawmna mainline church khat zom dinga heutute’n vaihawmna a hon neih tak un, KTP kichi min khek a om in Baptist Youth Fellowship (BYF) kichita hi. EBC Saptuam in mainline church a zop kum 1998 ahi. Kum 1965 a min kiphuak KTP paidan leh tup leh ngim kilamdanna omlou angeimah lenkip den himahleh a hong pichin nung in sapmin khat hon nei hi. Huai tuh BYF i chihchih uh kum 2001 apan ahi a, KTP leh BYF in paidan leh nasep ah chituamna a nei kei hi. Tu in KTP chinawn lou in BYF a kichi zawta hi.

A piangsaktute Pu N Vungthang makaihna in tuailai member 15 kipawlkhawm in Hiangtam Lamka ah KTP phuhkhiak ahi. Saptuam tangthu ah hiai hun pen Khanletna chikhat ahi chileng khial khollou ding in a gintak huai hi. Tu in BYF kum 58 chinna ahita a, a phutkhetute Makai lian (chairman) Upa N Vungthang leh member bangzah hiam in hon dampih lai uhi. Amaute ziak in Pathian min i phat hi.

01. Upa N Vungthang- Chairman

02. S Kamgou- Vice Chairman

03. Ginkhokam- Secretary

04. Haukhomang- Asst. Secretary

05. H. Nengzatun- Treasurer

06. H. Vungzamang- Fin. Secy.

07. T. Ngulthuam- Member

08. L. Tualthang- Member

09. L. Vungzathang- Member

10. S. Sanglian- Member

11. L. Thangnon- Member

12. Zamlian- Member

13. Chinzaching- Member

14. Zadim- Member

15. Khamnem- Member

Tuailai Pawl department a omma in YCAR (Young Christian Advance Rally) chih min zang in Naupang leh Tuailaite kimakaihna pawl hattak om masa hi, Pastor Kaineng leh Pu Siamkung in hiai pawl makaih uhi. Naupangte leh Tuailaite lak ah Pathian thu sinsakna kipan hi. YCAR in kumsim khawmpi neizel in, kitaitehna tuamtuam nei ua khantouhna tampi tun hi. Naupang leh Tuailaite kia hilou in nupi leh papite’n leng kithuahpih in saptuam kiphuhkipna ding a vanzat hoihtak a hong suak hi.YCAR nasepna a paitouh zel lai in heutu masa mi 15te’n Lamka tung ah KTP phutkhe ding panla uhi. KTP hong pian khiak ni October 18, 1965 ahi. 

BYF hong piankhiakna dinga panla heutu masate’n aziak leh asan kichiantak nei in, thumna tampi toh ana phutkhia uhi chih muhtheihna tampi om hi. Pathian gam zatna ding, Saptuam khanna ding, tuailaite kichilna ding leh missionary nasepna a kalsang tawina ding chihte puakgik a nei in pan nakpitak in la uhi. Khristian Tuailai Pawl thupi dinga a na tel uh “Khrist leh Saptuam din” chih BYF emblem ah kituangsak hi; khang thak hong om lai ding ten leng mansak louh ding deihhuai i sa hi. Tuailaite hinsan Khrist ading leh Saptuam ading ahi chih sepsuahna ding a BYF kiphutkhia ahi chih kum 58 a chin nunga tuailaite theih thak ding in i pulak hi.

BYF kiphuhkhiakna ziak amau kigelhdan teisawn hiai a nuaia bang ahi.

1. Pathian gam leh a Saptuamte khantouhna ding lametna

2. Tuailai Pawlte laka Biakin a thugenna lam kitathiamna leh athu a khanlet theihna ding ngaihtuah na

3. Phatna la himhim solfa neita phot tuh solfa dan diktak a sak dingdan kisinna

4. Gammial a dinga septheih dandan thohlawm leh thilpiak (missionary vision) ahideuh hi.  

Tuailaite laka nasepna enkoltu leh vaihawmtu kichiantak neih ding hoihsakna a om man in 1967 apan in KTP Central Board phutkhia uhi. Term khat sung kum khat ahi a kum teng in Board member-te makaihna in tuailai khawmpi nei ua heutu ding kitelna toh thuah zel uhi. Saptuam khangtou zel ah khawmpi leh kizatna tuamtuam a hong tamtak ziak in 1984 in Central Board beisakna leh District Level a kivaipuakna hong kipan hi. Huchi in District KTP khawmpi chih lam in hong paita hi.

Tuailai leh Mission nasep hatsakna ding ngimna in Sia T Pum Za Thang kiang ah Youth & Missions Promoter na got in om hi. Tuailaite phawk thakna hong piang in 1987 kum in, TUAILAI 87 kizang a khanloh thakna thupi tak hong om hi. Huai nung siah TUAILAI ‘90, TUAILAI ’95, TUAILAI 2000, TUAILAI 2005, TUAILAI 2010 chihte kizang tou hi. Kum 2015 kum a TUAILAI 2015 leh GOLDEN JUBILEE lopna kithuah nei ding kichipen gam buaina ziak in neihtheih louh in om hi.

1. KTP Central Board ngaih poimohna leh panlakna in paite pau Laisiangthou leh na kisem hi.

2. KTP leh Mission Board pangkhawm in Missionary Box zawng in gam pumpi fang suak uhi.

3. KTP agenda GBC patkhiak ding thu EBC Khawmpi 30na 1981 paisuak in patkhiak ahi.

4. KTP memberte’ Khamangthang veina ziak in Bible Camp neih pat ahi kisunzom lai.

5. KTP Central Board awlmohna ziak in Ulian Bible Camp 1975 in kipan hi.

6. KTP Central Board makaihna in khawmpi 12vei kumteng in 1984 tan kinei hi.

7. KTP lunggulhna leh ECC khawmpi 37na thupukna in KTP Day 1986 apan zat ahita.

8. BYF panlakna in Arm Forces Gospel Camp leh ZNV Camp chihte neih ahi 

9. BYF makaihna in headquarters level a khawmpi kum 5 hal in kinei zel.

10. BYF panlakna in Central Choir kinei India leh gamdang tanpha ah lasa in kuanta uh.

11. BYF panlakna in Counselling Center patkhiak leh zat lel ahi.

12. BYF panlakna in gamsung a diktatlouhnate douna movement neih ahi.

13. BYFte’ gammial luh ding in EBC mission field ah lut in sem lel uhi.

14. BYFte’ seppih mission agency dangte FMPB, IEM, NECTAR, HIM, MVM, YWAM, SIM, OMF, MEC

1965 Hiai kum October 18 in Hiangtam Lamka ah KTP hong piang, Founder Chairman Upa N Vungthang leh member dang 14te min atung ah kitaklang khin hi.

1967 Hiai kum in KTP Central Board kiphutkhia, Chairman Upa Khaivum ahi.  Hiai kum in BYF Kumsim khawmpi 1veina Hiangtam Lamka in zintun hi.

1968 Hiai kum a EBC Kumsim khawmpi in KTP official a pomna bawl uhi. Khawmpi hun a kitaitehna pansan a kitathiamna nei in panla uhi

1969 Hiai kum in KTP kumsim khawmpi 2veina Zenhang Lamka in zintun hi

1970 Hiai kum in KTP kumsim khawmpi 3veina Singngat in zintun hi.

1971 Hiai kum in BYF kumsim khawmpi 4veina Hiangtam Lamka in zintun hi. Hiai kum in KTP Bible Camp 1veina Lanva nak Pearsonmun tuilou zau ah nei uhi. Hiai kum in KTP dinsan khamangthang leh missionary vision sep kipatna ahi

1972 Hiai kum in KTP kumsim khawmpi 5veina Lungchin in zintun hi.

1973 Hiai kum in KTP kumsim khawmpi 6veina leh Camp kithuah Singngat in zintun hi. Hiai kum tan in khawteng ah KTPF kiphuhkhiak ahita.

1974 Hiai kum in BYF kumsim khawmpi 7veina Mualnuam in zintun hi.

1975 Hiai kum in KTP kumsim khawmpi 8veina Songtal in zintun hi. Hiai kum in Pu H Tunzakham, in Youth Secretary full time masa pen ding in sem hi. Hiai kum in Ulian Bible Camp 1veina Lanva nak Pearsonmun Tuilou zau ah nei uhi. Hiai kum Tuailaite lak ah missionary nasep a khanlohna thupi tak om in, Evan T Pum Za Thang makaih a Missionary Box toh khitui naptui toh bial pumpi kisik suak uhi. 

1977 Hiai kum in KTP khawmpi 9veina Sinjawl in zintun hi.

1978 Hiai kum in Rev S Neng Za Khup, in Youth Secretary full time a 2na ding in sem hi.

1979 Hiai kum in Rev Ginnei Thang, in Youth Worker full time a 3na ding in sem hi. 

1980 Hiai kum in KTP khawmpi kum nih khawl nungin a 10veina Mualnuam in zintun hi.

1981 Hiai kum in Ulian Bible 2veina Dorcas Hall ah nei uhi. Camper Ulian tamtak phata hi 

1983 Hiai kum in KTP khawmpi 11veina Teikhang Mizoram in zintun hi. Hiai kum in BYF vaisaina in Mission Workers’ Bible Camp Dorcas Hall ah nei uhi.

1984 Hiai kum in KTP khawmpi 12veina leh ananung pen Bungmual in zintun hi. Hiai kum in KTP Central Board kichi leng beisak ahita. Saptuam khangtou in lian hiaihiai a, Central Board sang in District level a kipuakna hoihzaw chih ziak ahi.

1986 Hiai kum apan in Rev T Pum Za Thang, in Youth & Missions Promoter full time a 4na ding in sem hi. Tuailai ’87 khawmpi forerunner team toh bialsung pumpi siksuak uhi. Hiai kum’ Tuailai lam khanlohna thak hong pian kum ahi chia chiamteh ahi. 

Tuailai Day zat pattung kum ahi, August kha Pathian ni nanung pen kizang hi.

1987 Hiai kum in TUAILAI ’87 kichi a kigengen khawmpi lian, hun paisate a om ngeilou Lamka College mawltual ah thupi tak a neih ahi. Hiai khawmpi lian Thupi: “Tuailaite Khrist aa ding in” chih ahi. Founder memberte tup-le-ngim a kibulpat thakna leh khanlohna thupitak om hi. Hiai kum a khawmpi amasate toh nakpitak in kikhoukhiak a, hiai khawmpi’n tuailaite ngaihtuahna leh khawhei gamtat kheng lamdang hi. Masawnna kalbi a chiamteh ahi. 

1988 Hiai kum in TUAILAI ’87 forerunner team leh worship team a tuailaite kepzuina in Convention Youth Choir phuh khiak ahi. Hiai kum apan in Choir Conductor Pa H Khantawng in loh neilou in Khrist leh Saptuam a tuailaite a ding in a pumpi leh hun manphate pia in kizang hi.  Hiai kum hi EBC Central Choir kipat kum chia chiamteh ahi.

1989 Hiai kum in Ulian Bible Camp 3veina Ebenezer Academy ah kinei. Pathian in Ulian Bible Camp a tel ding Officer tampi hon peta ahihdan theih thakna om hi.

1990 Hiai kum in Tuailai ’90-cum-Silver Jubilee Celebration Lamka mawltual ah kinei. Hiai khawmpi Thupi: “Tuailaite midangte aa ding in” chih kizang hi. Hiangtam Lamka Biakin kong ah KTP kum 25 chin theih gigena suang phuh ahi. Hiai khawmpi hun ah Founder Memberte phawkna leh pahtawina hun bawl ahi. Hiai kum in Bial pumpi Lapawl kidemna om a Central Lamka khatna in pang hi.

Rev N. Phungzapau

Rev Kamkhanthang Mangte

Rev T. Jam Khothang

- Rev Kamkhanthang Mangte, Topic: Politics

- Upa H Chin Khenthang, Topic: Hardship and Challenge of Student life

- Upa T Awnzagen, Topic: Business Ethics

- H Thangdam, Topic: Education Policy leh Programme Siamphat a Kuldan

- Upa T Ginkhopau, Topic: Evangelism Potential for Armed Forced Personal

- H Thangzamuan, Topic: Zogam Nek leh Taaka Khantouhna

- Upa H Nengsong, Topic: Kumpi Nasepna A Khristian Hin Khua

- B Kamzamung, Topic: Possibility and Opportunity of Christian Witness in the World of Sport

1995 Hiai kum in Tuailai ‘95 kichi khawmpi lian Bungmual Mualtual ah kinei. 

Thupi: “Tuailaite gamla ding in” chih kizang hi. Chouna hun leh South East Asia a khawdakna hun poimoh tak a zat ahi.

Thugentu: Rev Ginneihthang Ngaihte

Bible Study: Rev Paukhanmang Guite

Seminar petute leh Topic

- Rev HM Songate, Topic: Khantouhna

- Haupi Tombing, Topic: Khristian Tuailai leh Tulai Ginglawm

- Ginlianlal Buhril, Topic: Career Guidance

- T. Jam Khothang, Topic: Khristian Tuailaite leh Politics

- Dr B. Langkham & Luke Samson Sharan, Topic: Drug Addiction and HIV/AIDS

 

1996 Tuailai Day zatni dinga sehsa pen khek in, October 18 toh kinai pen Nipini kizangta. Aziak ahihleh Tuailai Pawl kiphuh khiakni mah a zat hileh chih deihna a om ziak ahi.

1997 Rev. T Thangrawnlian, in Youth Worker full time a 5na ding in sem hi. Hiai kum in gamsung buaina namenlou in hon buakkha a, tuailaite laka nasepna deihbang lou hi.

1998 Rev N Vungzasin, in Youth Worker full time a 6na ding in sem hi. ZNV (Zomi National Volunteer) tangvalte ading “Salpha Bible Camp” GBC huang sung ah neih ahi.

1999 Rev V Pumkam, in Youth Worker full time a 7na ding in sem hi. Convention Youth Choir hoih thakna ding in nakpi taka panlak kum ahi. Biakna leh Phatna uangbawl dinga kisakthakna leng ahi. 

2000 Tuailai-Missions 2000 kichi Khawmpilian GBC huangsung ah kinei

Thupi: “Tuailaite missionary dingin” chih kizang hi. 

Missionary nasepna toh kisai in 10/40 window en a khawdakna neih ahi. Praise and Worship lam uangbawl kipatna kum hi a chiamteh ahi.

2001 BYF LEADERS CONFERENCE kinei Mimbung in zintun hi. BWA & APBF kizomta ahih manin Kumsim khawmpi’n KTP pen BYF in khek hi.

2002 ULIAN BIBLE CAMP 4veina GBC huangsung ah kinei

2003 Headquarters level a kivaipuakna CBYF SUB-COMMITTEE kichi phuhkhiak ahi. Upa L Vungzamuan, in Youth Coordinator full time a 8na ding in sem hi.

2004 NEICC Youth Conference Sutnga, Meghalaya ah CBYF memberte vatel uhi. MBC Youth Triennial Conference Ukhrul ah CBYF memberte vatel uhi. 

2005 TUAILAI 2005 -cum- 40^TH ANNIVERSARY CELEBRATION, Ebenezer Academy huangsung ah kizang hi.

Thupi: “Tuailaite Khawvel kheng dingin” chih kizang hi. 

Seminar topic MESA (Mission, Economics, Self-confidence, Academics) neih ahi.

2006 NEICC Youth Conference Lawngtlai ah Tuailaite phatna lasa in kihoh hi. 

Youth Coordinator pa, Vice President ding in telching uhi. Lapawl tungtawn a nasepna hihhatna ding in Central Choir kipuahthakna neih hi. Tuailai sepaih pangte ading 

“Armed Forces Bible Camp” GBC huang sung ah kinei.

2007 APBF Congress, Chiang Mai, Thailand ah Tuailaite phatna lasa in vahoh uhi. BYFI National Conference “Youth Carnival” kichi Dimapur ah Tuailaite phatna la sa in kihoh hi.

2008 NEICC Youth Conference Shillong ah Tuailaite phatna lasa in kihoh hi. FMPB National Missions Conference, New Delhi ah Tuailaite phatna lasa in kihoh hi. CBYF saina in Khangnoute a dinginn Career Guidance program manphatak zat ahi.

2009 Tuailai 2010 zatna ding kisakkholhna kum dia zat ahi. Khawlian leh Khawneute ah khawmpi ding motivation naktak a bawl ahi. 

2010 TUAILAI 2010 -cum- GOSPEL CENTENARY CELEBRATION, Ebenezer Academy huang sung ah kinei hi.

Thupi: “Extra-mile for Christ” chih kizang hi.

Seminar petute leh Topic

- Rev B Chinlamthang, Topic: Extra-mile in Missions, 

- Rev Dr Sonna Lang zakham, Topic: Extra-mile in Integral Mission

- Vungzagin Valte, Topic: Extra-mile in Business, Economic Challenge

- Siamnunlian Valte, Topic: Extra-mile in Contemporary Challenge of Economic

- K Vungzamawi, Topic: Extra-mile in Politics

- V Vumlunmang, Topic: Extra-mile in Career Guidance, 

- Khamchin Tunglut, Topic: Extra-mile in Contemporary Music and Worship

 

Special Talk hun kiom sak a, Tuailai missionary 9 ten anasepna uh pulak uhi.

TUAILAI 2010 GAH MASA MISSIONARY A KUANTE: Maharastra Village Ministry a sem ahi uh.

- Miss Chingmang d/o (L) Damsuan, Hebron New Lamka

- Miss Jambiaksang d/o Thanghlir, Hiangtam Lamka

- Miss Nemngaihlian d/o T Ginzading, G Mualkawi

- Mr. Lamkhansiam Shoute s/o S Thualzanang, Langol Imphal

- Mr. NK Naulak s/o (L) N Thualgou, Zoar Veng Bungmual

- Mr Thangbiaklal s/o (L) N Vungzalian, Hiangtam Lamka

 

2011 BYF Leaders Conference, Singngat ah nuamtak in kinei hi. APBYF Regional Conference Kathmandu ah BYF min in semtute mi 10 vahoh uhi.

2012 Haggai Institute India Syllabus leh Resource Person-te zangin “Haggai Seminar” kinei a CBYF in organized hi. BYF Leaders Conference, Bukpi Thanlon 

Division ah nuamtak in kinei hi.Thupi sepsuahna in Drama CD Competition neih ahia khua 16 kidem lakah EBCC, BYF ZION in siampen hihna la hi.  

2013 Tuailai 2015 -cum- BYF Golden Jubilee ding ngaklah in tuailai tampiten galetta uhi. Baptist Youth World Conference Singapore July 17-21, 2013 ah tuailai 15 kihoh hi.

2014 Rev N Pumsuanmung in Youth Coordinator 9na hiding in mohpuakna len hi. 2015 Tuailai Golden Jubilee (TUGOJU-15), December 5-7, sung EBC Gospel Centenary Hall New Lamka ah neih ding chih himahleh gamsung buaina nasatak a hong om man in kizang theilou hi.

Seminar petute leh Topic

- Rev Dr. Pum Za Thang Tombing, Topic: Tuailai kingaihsiatna pan kimuan ngamna

- Rev Dr Kh Khaizakham

Topic: Nam Lamkhiakna a Tuailaite Panna

Thupi: Khangthakte Numei leh Pasal Ka a Sianthouna

- Upa Khamkhenthang, Topic: Tuailai leh Siamsinna, Nek leh tak zonna leh Khantouhna

- Jimmy Ginbiakthang, Topic: Gamsung Natna: Kineksiatna

- Thangkhanlal Ngaihte, Topic: Thutak leh Diktatna a Kibulphuh Thakna-Politics leh Election Vaai ah.  

2016 Diktatna in nam a tawisang chih thupi paipih in seminar mun tuamtuam a nei in kisinsakna nakpitak in pai in om hi.

2019 Hiai kum a kipan in Rev V Thangkhanmuan in Youth Coordinator 10na hiding in mohpuakna len hi. Tuailai 2020 khawmpi lian zat ding lunggulhna a om ziak in huai ding a kisakkholhna kum a zat ahi. Khovel pumpi ah COVID-19 HIIPI om in gamsung pumpi ah LOCKDOWN om in biakna leh kithuahkhawmna te om theilou hi. Tuailai khawmpi 2020 neih ding lunggulhna lianpi kinei lailai hi. Kum 2020 pen Missions Department in leng Khawmpi aneih ding kum ahihtoh kiton in BYF toh kigawm in MISSIONS-TUAILAI 2020 chih min voh in Khawmpi nei ding in kisak kholna naktak in ki nei hi.

2020 kum in COVID-19 ziak a Khawmpi neih ding lemtanglou a om lai in Media tungtawn in “Online Sermon” patkhiak in om a huai in khovel pumpi dengsuak in manpha mahmah suak hi. Khawmpi lemtanglou ahihlai in Short Video Clip, Essay writing leh Painting Competition kidemna te sai ahi, huchin tuate lawmman hawmna leh “MISSION MAZAP” kichi magazine honna mipi tamlou kikai khawm in kinei hi. Khawmpi pen 2021 a ding a suan ahi.

2021 Hiai kum a Missions-Tuailai 2020 neih ding pen COVID-19 Second Wave om mah leh kum beikuan in hong kihong in Khawmpi MISSIONS-TUAILAI 2020 Dec 7-10, 2021 in Gospel Centenary Hall ah Thupi: “Go Into The World Mark 16:15” pansan in manpha leh lohching tak in kinei hi.

Khawmpi Thugente

- Rev S Vung Minthang, Thupi: “Lifestyle of Witnessing”

- Rev Dr JM Paupu, Thupi: “Finding Gods Value/Value System”

- Rev L Kamzamang, Thupi: “Disciple Making”

- Rev Gin Malsawm, Thupi: “Salt and Light”

- Rev Dr Kh Khaizakham, Thupi: “Stewardship of Suffering”

- Rev K Kamchinkhup, Thupi: “Responsibilities of Sending Church”

Seminar petute leh Topic

- Mr & Mrs Rev JM Paupu, Topic: “Love, Marriage and Sex.”

- Ms. Chinghatzo & Ms. Muanni Tombing, Topic: “Mental Wellbeing.”

- Rev S Vung Minthang, Topic: “Politics Theihdan Dik.”

Hiai kum in WEBINER tungtawn in kisinsakna tampi tak leng neih in om hi.

 

1. Khai John Paul- Varanasi, UP 11. T Jamsuanmuang - China

2. Ngaibiakkim– Varanasi, UP 12. Thianminlian Valte - China

3. Alice Niangbiakhoih– Guinea Bissau 13. Enkhamson – Gambia, Africa

4. Vunglianmawi- North Caucasus, Russia* 14. Thangngaihnem – Asha Bhavan Ghy

5. H Ginkhenthang- Loas 15. Chiangkhanlun – North Messidonia

6. Ningngaihchin- North Caucasus, Russia 16. Rebecca Dimkhoniang*

7. P Goudinglian- Laos 17. Lianthianlal - Cambodia

8. Niangnemkim– East Timor 18. T Lunkim - Vietnam

9. Chingngaihmuan- 19. Nemhoihkim - Varanasi, UP

10. Hemsing Ingti- Cambodia 20. Vungngaihnem – Laos

21. Mansiankim– Guinea Bissau   

*Hiai te lemtanlouhna khenkhat ziak a hong kik te ahi.

 

Amaute nung in Missions-Tuailai 2020 gah muh ding om toutou in tuni chiang in tuailai tamtak Missionary ding a kipia in kuan khe ta uhi.

 

2022 Hiai kum pen Manipur MLA Election kum ahihtoh kiton in CBYF in Election siangthou tak a sai ahihtheihna ding ngimna in poster tuamtuam kibawl in Lamka, Thanlon leh Singngat area te hawm khia in dawr, leh kongzing te a kitak khia hi.

Missions-Tuailai 2020 hun a WEBINER tungtawn a sinsakna kipiak te laibu “Missions Possible Magazine” a kibawl khia in a thawn in kihawm khia hi.

BYF Khangthu a om ngeinailou EXTOL Psalm 34:1 thupi pansan in “GOSPEL SINGER MEET 2022” kichi sai ahi, hiai hun a Tuailai lasiam te pahtawina leh amaute hanthawnna hun November 12, 2022 zing leh nitak in Gospel Centenary Hall ah kizang hi.

 

2023 February 6-13 sung in Chiangmai, Thailand ah APBY in “Making and Multiplying Discipleship (MD2) Conference” ah Youth Coordinator va kihel thei. 

Division chih a heutute toh CBYF in kithuahkhawmna a nuam leh manpha thei pen kum a zat ding a program bangzah hiam kigeel himahleh Manipur ah singtang mite leh Meitei te kal a tualgal buaina May 3 a kipan in hiai report ahihtan in bangkim dinkhawl in om hi. 

 

May 03, 2023 in Manipur gamsung buaina ziakin tup leh ngim khenkhat te septheihlouh in Gal nei in ki om hi (Meitei te toh kidouna). Hiai buaina in tuailai tamtak salam leh khalam a hon sukkhak om a theih man in “TUAILAI SALPHA PROJECT” Salam leh khalam a couselling training ‘WeCare” te toh pangkhawm in kipankhia hi. Hiai training tungtawn in Tuailai bangzah hiam te houlimpih leh sukkhak in om ua manpha mahmah hi a theih ahi.

 

BYF in Flag toh kisai program tuamtuam a deihna leh zat utna nomkha sek ahihmanin a omzia theihchetna di’n hiai a nuai a kipia point te chiamteh ding in iki ngen hi.
1. Flag min: Baptist Youth Fellowship Flag
2. Colour (Rong) kilep dan: A ngou (White), A dum (Blue), A hing (Green)
3. Colour (Rong) 3 te etsakna:

• A ngou (White)= Siangthouna (Purity)
• A dum (Blue)= Chihtakna (Inspiration, Sincerity, Spirituality te lakhawm in)
• A hing (Green)= Khang ding (to grow, Self-respect)
• A laak tom in: Sianthouna, Chihtakna toh nnahoih sem a khang ding chihna ahi.

Colour Code (CMYK):

• WHITE: #FFFFFF
  C:0 M:0 Y:0 K:0
•  BLUE: #25275F 
  C:100 M:97 Y:32 K:24
•  GREEN: #00652E 
  C:100 M:0 Y:100 K:50

4. Flag size: Ratio 2:3; Size: 3ft x 4.5ft ahiding.
5. BYF Logo: Flag a logo koih utte a ding in a laitak a koih ding, logo omlou/tellou leng BYF Flag hi veve ahi.
6. Saptuam min: Saptuam min gelh nuam te adin logo nuai a Hing (green colour) mun a gelh ding ahi. Logo a ki koih leh Baptist Youth Fellowship chih va gelh tuan a ngaikei.

Chiamteh ding: BYF Flag pen kilawmsakna a neih maimai ding hilou, decoration ding khawng a kinei leng hilou, tup leh ngim hoihtak leh message nei ahihdan chiamteh a zat ding ahi.

 

BYF tangthu laktom bukim kei mahleh khangthakte kiang a piaksawnna bang a kingai a gelh ahi. I Pathian in a honpi dan masate thei gige kawm in kalsuan lehang abul hon patpihtu Toupa’n atawp dong a honpi ding ahi chih i gingta hi. Tuailaite hiai tan a hon domsangtu Toupa’n agency dang tampi toh semkhawm a malianpi nei ding in hon koihta hi. Lungsim lianpi nei in khovel pumpi ngaihtuah kawm in sem ni. Tuailai Takkheh!