Convention English High School, Sinzawl ah July 22, 2024 zinglam dak 10:30 vel in Rev. Nenglian Vualnam, Director of Development in Borewell honna nei in Pastor T. Paukhanmang in Pathian khut ah latna nei hi.
Hiai hun zatna, Upa H Biaklal, Chairman LSMC, CEHS Sinzawl in makaih a, Upa H Hauthang, Chairman TBUC, EBCC Sinzawl in vaidawn thugenna leh annkuang latna nei hi. Annekzoh in program sutzop hi a, Sir V. Phungkhanthang, Headmaster CEHS, Sinzawl in report tomkim pia in Rev. Nenglian Vualnam, Director of Development in Bore Well honna nei a, Pastor T. Paukhanmang, Local Pastor EBCC Sinzawl in Pathian kiang a latna leh kipahthu genna nei in program zou uhi.
Borewell bawlna ding in May 24, 2024 in Pastor T.Paukhanmang in a mun, vanzat dingte leh semtu dingte Pathian khut a kepsakna leh latkhiakna nei in nasep kipan a, vanzat lam a nongkaina a om ziak in May 30, 2024 akipan June 16, 2024 sung nasep dinkhol mahle uh June 17, 2024 in pat non theih a om in July 1, 2024 in zousiang uhi. Hiai Borewell feet 320 vel ding a thuk a kivut ahi.
CEHS Sinzawl in kumteng in tui lam ah haksatna na tuaktou sek ua, huchih hun chiang in dawn ding tuisiang sum-le-pai tampipi seng in lei zel uhi. Tulel in sintu naupang 170 vel om a, Siamsin Hostel ah naupang 15 vel om lel uhi. Semtu 19 (Teaching & Non-Teaching Staff) in sem lel uhi. Hiai Bore Well School a ding a manphatak a hong hih i lam en hi.
