Biakna Labupi leh Pathian Ngaihla kichi Paite Kampaute zatkhawm ding a saptuam tuamtuam te lemsakna lakhawm a kibawl khia labu ahi. Biakna Labupi kichi pen Biakna muna kisa (church hymnal) deuhte ahi a, Pathian Ngaihla kichi pen lenkhawmna deuhte ahi. Hiai labu ah number 575 om a lakaih kibang A & B omte toh la 598 om a, Pathian Ngaihla ah la 410 om hi.
Paite pau zang tengin labu khat neihkhawm ding lunggulhna sawt pek akipan ana om khinsa himahleh tutung a atak a hong kisemkhe thei a om pen kipahhuai ahi. EBC Kumsim Khawmpilian 72 na 2020 in Paite kampau zang tengin la thu kibang neih ding thupuk in Convention Executive Committee (CEC) khut ah asepkhiakna mohpuakna pia hi. CEC in Central Music Sub-committee (CMuSC) sepzui dingin pesawn hi.
CMuSC in Paite pauzang saptuam dangte aban bana houpih in ngaihdan lakhawm phot in kalsuan ding dan hon gel uhi. Kuapeuh in hiai thusawm hoih sa chiat in “atampente EBC leh PCI(R) ten hon semkhia un” chiin lemsakpihna ngah uhi. Huchi in EBC nuai a CMuSC leh PCI (R) nuaia Music Upliftment Committee (MUC) te’n a joint in nasep hon pan uhi. Theihtawp suah kum 4 sung khawng a buaipih nung un tunitak October 15, 2024; 6 PM in Centenary Hall, Mini Auditorium ah Joint Music Committee makaihna mah in program zat in om a Rev. Dr. S.Vung Minthang, General Secretary EBC in Pathian min in honna leh latna nei hi.
Hiai Paite paua Biakna Labupi leh Pathian Ngaihla bunih in kibawl a Khat pen Tonic Solfa toh kithuah, khat pen Athu vuak ahi. Tonic Solfa kithuah pen Rs 400, Athu vuak Rs 350 ahi. October 16, 2024 apan Convention Book House ah lei theih ding hi.
