Buaina thupitak phu kawmkawm na pi in Pathian in a hoihna hon musak zel a, i saptuam EBC Kum 75 chinna lop ding a kigel lawmtheilou in om mah lehang hihdia ki guang Calendar 2024, T-Shirt leh EBC Tangthu Bu (1948-2023) bawl khit in omta hi.
Calendar leh T-Shirt te kumpaisa (2023) in bawl zoh hita a, tu in EBC Tangthu Bu (1948-2023) leng zoh ahihtoh kiton in July 8, 2024 (Seppatni) zing dak 7:00 AM in Gospel Centenary Auditorium, New Lamka ah honna leh latna neih in om hi.
Hunzatna Rev. Thawndoulian, Director of Ministries in makaih in patna thumna nei a, vaidawn thugenna Mr. Thanggoumang Valte, Member Compilation Committee in nei in, EBC Central Choir in Pathian phatna "Honpi Zel In" chih la sa uhi. Laibu hong piandan leh a thutun genchetna Upa Nengkhozam Chairman, Compilation Committee in nei a Laibu honna makaih in Rev. Dr. S. Vung Minthang, General Secretary in hong in Pathian kiang a latna nei hi.
Tuazoh in, Rev. Thawndoulian, Director of Ministries makaih in presentation hun zat in om a huntawp ah kipahthugenna Upa M. Ginzalian, Chairman CEC in nei in thumna in hunkhak hi.
Hiai laibu Convention Book House ah muh theih ding.
