Reports | KTZ

KHUA HAUSA GOSPEL CAMP REPORT

Hun kipahhuai leh hotdamna ni hon bawlsak lai i Toupa leh Hondampa Jesu Khrist min in simtute tengteng Hausa Gospel Camp Committee sik-le-tang in itna chibai ka hon buk hi.

Hun sawtpi akipan i na lunggulh leh Pathian kiang a i thumnate Toupan hon dawng a, EBC khangthu a amasapen hiding in, May 21-25, 2019 sung GBC Campus, New Lamka ah Khua Hausate Gospel Camp lohching leh manphatak in kizou hi. Thupi: “Na inkuan omdan ding gelsak in” Isai 38:1b pansan in Evan. T Damkhothang leh Evan. Upa Lianding Guite ten thutak genna hun zang uhi. Camper-te damtheihna hon etkaisak a, poimoh bang a amun a hong ompih Dr Upa T Nengkhanmang tung ah kipahna lian mahmah hi.

Camp lohchinna ding in Sub-Committee in hausate min kaikhawm in, round thum bang theihsakna leh chialna bawl in a inn uah va dak uhi. Pathian in A misiangthoute thumna hon dawng in, khua hausa 60 leh Village Authority Chairman 13 kiang ah chialna kibawl hi. Hiaite lak ah hausa 38 leh Authority Chairman 8, a gawmkhawm 46 hong tel thei uhi. Campers hiai bang ahi; EBC Saptuam akipan 39, PCI akipan 04, CBA a kipan 02 leh NTBC a kipan 01 ahi.

Mun tuamtuam a om mimal leh tualsung saptuam tamtak in awlmohna lianpi toh Hausa Gospel Camp kinei ding pen thumna a na phawk in nakpitak a Pathian na buan uh ahi, chih a kitheih man in lungdamna a lian mahmah hi. Hiai hunsung mah in Upa L. Velson makaih in EBCC Hebron ah thumna hun kizang gige a, manpha mahmah hi. A mite kahna aw Toupa’n hon dawng ahihman in thupina leh vangletna khempeuh Amah i pia hi.

Camp hunsung GBC student 3 in hong huh den ua, tawldamhuai tuan mahmah hi. Hausate leh VA Chairman te’n May 24, 2019 in kipahthu genna in Camp vaisaite leh Saptuam heutute belam-sa hon nekpih uhi. Camper-te lak ah taksa kum upa, hat lou leh damtheihna chaudeuh khenkhat om mahleh, dam louhna ziak a kikhawm zou lou kuamah om lou uhi.

Camp ah Khasiangthou vehna kitang mahmah a, hotdamna sang leh kilatna neithei camper a gawmkhawm in 31 pha hi. Kipiak thakna neileng hunkhop om hi. Gospel camp ahihna toh kiton in thudang gen hilou a, Jesu Khrist Tanchin Hoih mah kigen ngiatngiat ahihman in camp a kihelkha peuhmah in khalam ah taina kingah in kuapeuh kipak chiat hi a theih ahi. (Hausate apan feedback kingahte lak a lungsim hon khoihkha mahmah khat: camp sung a Pathian thu i zak bangbang biakinn sung ah leng kiza zelzel leh nuam mahmah ding, chih ahi).

Camp gahsuah leh lohchingtak a hon zousak i biak Pathian kia in thupina tengteng tangta hen. Amen!

Sd/-
Upa Vungzamuan Valte
Secretary,
Khua Hausa Gospel Camp Committee

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia