Ordain Sunna | KTZ

Pu Vaikhogin Tonsing leh Pi Luanzen tapa nihna Upa T Gindam, November 5, 1948 in Mualnuam khua ah piang hi. Siamsinna toh kisai in Mualnuam JB School ah zil pan a, Songtal Jr. High School a sunzom tou in Bukpi High School ah pawl 10 tan zou hi. PUC Oriental College Imphal ah zilzom lai hi. Bible lam Alpha Bible College Shillong ah 1971-72 sung zil hi. 1973 in a zi Chiinkhanngai toh Saptuam dan in Pastor S Thawngkham khut ah kiteng ua, Pathian vualzawlna gil a gah goutan 4 nei uhi.

Nekzonna: 1977 in District Council nuai ah Matriculate Teacher sepna mu a Bungpilon JB School ah sem pan hi. Tua ban ah, Tualkhohau JB School Mualnuam a sem in huai akipan 2000 kum in Dorcas Veng, New Lamka ah pem uhi. Huai mun ah 2016 a pension tan leh a sih tan dong khosa uhi.

Saptuam lam: EBC Kumsim khawmpi 61na 2009 in Rev L Kham Kho Lun, General Secretary khut ah Upa Ordain in om hi. Kum 2018 EBC Kumsim khawmpi 70na Gospel Centenary Hall New Lamka ah pahtakna lai sang hi. Pathian saptuamte kepna ah ahihtheihna tantan kuhkal tak in sem a, panpih ngaite panpihna, damlou leh sihna programme-te awlmoh in a langlang ah diang ngap den hi.

Damlouhna nei ahihlam kithei hetlou a chidam tak bang a om lai in August 7, 2019 zanlai dak 12 vel a zun nawn khin, lumkik nawn hi. Huchi a ihmu nawn mai dia kisa lai nak haksa sa in lupna tung ah buaise mawk a amah adia Pathian hun seh hong tung in thupina gam ah hon paisan hi. A nutsiat inkuante leh tualsung saptuamte Toupa’n khamuan in ompih tawntung hen aw.


Upa H. Nengzalian, Pastor H. Zamkhothang leh Nu Nianggou tate lak ah a 4na hi a, March 1, 1946 in Bungpilon khua ah piang hi.

Siamsinna leh Sepna: Songtal Govt. School ah siamsinna pan in Cl-VI tan huai school ah zou a, CCPur Govt. School apat in Cl-VII zou a Adimjati Hostel pansan in Cl-X zou hi.

Songtal Govt. School ah Substitute teacher in 1969-1970 sung sem hi. Oct. 11, 1971 in PHED a LDC sem nawn hi. 1979 apat in UDC a kaisang kum 39 sung Govt. nna a sep nung in Feb. 28, 2010 in pension hi.

Saptuam a Kizatna: EBC Khawmpilian 56na, December 12, 2004 in Upa Ordination tang a, EBC Khawmpilian 68na December 11, 2016 in Pahtakna Lai sang hi.

Local leh Division vai a a panmunte:

EBCC Pearsonmun TBMC member in 1993-2002; TBSUC ah Finance Secretary, 2002, 2004-2006; TBSUC Chairman, 2003; TBSUC Secretary, 2008-2012 leh 2014-2016; EBC/LND Missions Committee member 1993 leh 2002; EBC/LND DWC member.

Damlouhna: December 2018 khabul in gil naasa in Lamka ah Doctor ki-ensak a test tuamtuamte apat in cancer natna ahihdan kitheikhia in Tata Memorial Hospital, Mumbai tan pha ah va ki-enkol hi. Jan. 15, 2019 in inlam ah hong paikik a, kikep theih dandan a kep himahleh hoihlam nawt thei lou in April 25, 2019, 10:50 P.M. in Toupa kiang ah khawl tawldam ta hi. A nutsiat a inkuanpihte leh a kep saptuamte Pathian in khamuan hen.


Upa V Ngulkam, Phamta Pu Dengliansum leh Phamta Pi Zingvung tenupa kal a goutan tapa nihna Selam khua Mizoram ah 1943 in piang hi. Kum 1964 in Nu Gounem toh Saptuam dan siangthou in Aiduzawl khua ah Pastor Pathiau khut ah kiteng uhi. Kum 1989 in Rev T Jam Khothang khut ah Upa Ordain in om hi.EBC Kumsim Khawmpi 68na 2016 kum in Upa Pahtakna lai sang hi. Taksa upa lam hong hihtouh tak ziak in natna chituamtuam tampi kop in hun sawttak thuak hi. Pathian hunseh a hong tun in khovel haksatnate thuak nawn lou ding in thupina gam ah April 18, 2019 in hon paisanta hi. Toupa Belamte kemtu leh Upa deihhuaitak mai in hon paisan nung in EBCC Dorcas Veng saina in YPA hanmual New Lamka ah vuiliam in om hi. Pathian in a inkuante khamuan in ompih zuizel hen aw.


Page 1 of 10

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia