Innsung Thu | KTZ

Innsung Thu | October 2019

Khaloh lak masakpen pia: Unaupa Mr. Thianhuaisiam S/o Upa T Thongdouhau Bethany a om, a sepna Assam Regiment a training lellel in a kha loh lak masak pen Pathian gam nasepna ding in Local Saptuam EBCC Bethany ah pia hi. Pathian in thupina tengteng tang hen. – Upa H Siamzathang, Secy. EBCC Bethany.

Rice Mill a sum muh masakpen pia: Unaupa N Ginkhanlian, Chingmun Vangai Division in tumalam deuh in Ann-Sukhawl (Rice Mill) leithak a, a suk masak ni pen a a sum muh khiak tengteng Tualsung Missions Committee kiang ah Pathian gam nasep na ding in pia hi. Pathian in thupina tengteng tang hen.

Lawibual ah Biakin kitungding nawn: Thanlon Division sung a om Lawibual khua hi EBC Tualsung Saptuam omte lak a a masa pawl mahmah himahleh 1997 a gamsung buaina in hon nawkkhak ziak in khawsung mite bitna ding zong in kithehdalh uhi. Saptuam leh khawsung kitunding nawnna ding in hun sawtpi hong lut a, tuin Pathian hehpihna ziak in Biakin mun ding ground breaking neih theih in omta hi. Rev M Zalian Guite DS Thanlon in September 11, 2019 in Biakin bawlna mun ding suangphumna nei a, Biakin bawlna nasep pan ngal uhi.

Biakin mun leina ding sum: Pathian itna ziak in Upa S Vungkhanthang leh a inkuante, College Veng New Lamka a omte’n Dhemaji Mission Field sung Amguri mun a Biakin mun leina a zat ding in Rs 6000/- pia uhi. Pathian mite lungsim a awlmohna leh itna thilpiak kisungkhawmte ziak in Biakin thak hong kilam khinpah ding in lametna nei in kipahhuai i sa hi.

FS Quarter a zat ding RO: Unaupa V. Hauzel @Boipu, Deputy Chief Engineer (Construction), tua Dimapur Railway Station a semlel in Karbi Anglong Mission Field Superintendent Quarter a zat ding tui suksiangna khawl (RO) hoihtak hon pia hi. Pathian min a semtute deihsakna hiai bang a muh ding omzelte ziak in Pathian kiang ah kipahthu i gen hi.- Rev N Tuanglang FS.

CES D Leikot Excursion: EBC Lamka South Division sung a School omna khua 7 te’n dated 6th September 2019 ni in EBC Lamka South a DWC-te deihsakna ziak in Imphal a School naupang Class I tunglam teng leh Teacher-te’n mun etna excursion Bus 4 zang in va kinei a, nuam kisa mahmah hi. Mun etnate: (i) Awangching, (ii) Mellenium Center, (iii) Science Center. Hiai munte phakna kinei in chikmah a muh ngeilouh thil tuamtuam va kimu in mittaihuai leh nopsakna in kidim hi. Nitak lam in Imphal akipan hong kik in 4pm in Lamka kitungkik hi. Hiai excursion paina ah School-ten sum leh pai kineilou himahleh, Lamka South a DS leh DWC deihsakna liauliau in va kipaithei ahi, kipak lua ung.
– Upa S Haukhanthang Headmaster CES D Leikot.

 

VALPAKOT BIAL VEHNA A THILMUH REPORT
-Pastor Thangminlun Mangte | EBCC, Zenhang Lamka

Pathian leh heutupa Rev V Thangkhangin deihsakna tang in, August 27-29, 2019 sung LND huam sung a om i Saptuam school-te veh (inspection) dia a zin heutupan hon zot ziak in ka va zui kha thei a hampha ka kisa petmah hi. Hiai hun tomchik sung in Valpakot bial a saptuam school omna khua 6 ka va phasuak ua, khualzin manpha leh nuam ka sa petmah hi. Kum 5 paisa a ka phak khak lai sang in lampi leh khosungte ana khang ka sa a, tawldam zawtham in hun ka va zang kha thei uhi. Hiai hun sung a ka muh midang in leng i hamphat pih theih ding om hi a ka theihman in tampi lak ah tawmchik hon gen ka ut hi.

1. Lampi: phakna khua teng gari lut theihlouhna omlou, a bik in kum 5 paisa a ka phakna sa Gamphazawl leh Monglian khuate bang black topping ana hita a, phak masak lai a leivui khu a kipumsil toh kikhe mahmah hi.

2. Khosung Khantouhna: Khantouhna in lam chi tuamtuam ah ana nawk a, sum-le-pai muhna baihlam zaw a hingei ding a pak naai mantam chiing khua bangzah hiam ana om uh chih a kigen ka va za a poi mahmah hi. Huchihlai in, i saptuam omna khaw hausa khenkhat in a gam sung uah huai bang hih phallou bikbek thei om chih zak a om in hon kipaksak mahmah hi. Abik in Gamphazawl ah Ceiling Fan Remote Control toh zat, inn teng in ana nei ua, hiai bang fan ka muhkhak patna ahi a hoih ka va sa lua hi.

3. School lam thu ah: Semtu heutute kuhkal dan ka va muh in tha hon guan mahmah mai hi. A kep uh naupang tawmchik chikte it tak leh thazoh taka a kepte un, mundang a school omte phawk tuan selou a heutute muang mahmah a siamsin thei ua ka muhman in kipahna a sang mahmah hi.

T Khuangkhai ngial ah, inlam a naupang laisim dingten amau in ah simlou in, bang zahzah hiam a kihawm in a teacher-te uh in ah a home work zing leh nitak in sim ging souhsouh maimah ua, lung a leng hial hi. Heutute ka dot leh, heututen leng school kia hilou inlam ah leng a thawn in zing leh nitak lai simpih gige uh ahihdan hon hilh uhi. Hiai bang sim mah in B Kalzang ah leng heutunu khat in a inn uah a thawn mah in naupangte zingkal a lai ana simpih ka va tuak kha uhi.

Ka zinna ua ka lungsim luah mahmah bel, saptuam nu le pate honna vaidawnna leh kithuahpihnate thupi lua ahih lailai in, naupang kepna lamah school bana kepna nna ana sep un ka lungsim a sukha petmah hi. Semtuten gamnawl khat a om maimai chilou a, hihtheih bangbang a Pathian belam noute chitaktak a akep uh ka muh in, talent kepsaka omte, a tam leh tawm thu hilou a, kepsak a i om pen ginom leh chitak taka kepding, hihna bangbang ah lungkimna mah a thupi pen ahihdan hon muchian saksem hi. 1Tim 6:6 a Paul in Lungkimna toh kithuah Pathian limsakna punna thupitak ahi a chih, tutung school vehna tungtawn in ka va muhbeh semsem hi.

Huaiziak in, hiai a kigen sinsaktute bang a kal suan theih ahihlam ana thei napi a suankha nailoute ading a i suan khiakna leh Pathian belamte kepna ah pan i lakthak theihna ahih khak leh chihna toh gentheih ding tampi lak ah hiai teng tomchik in kon luikhia hi. Simtute Toupa’n hon vualzawl chiat hen!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia