Innsung Thu | KTZ

Innsung Thu | September 2019

EBC GUNDUNG PASTOR BIAL, SALPHA CAMP
Pathian Ompihna leh EBC Lamka North Division a heutute panpihna a, EBC Gundung Pastor Bial Salpha Camp Dated 16th July, 2019 a kipan, 20th July, 2019 tan, Engedi Retreat Centre, Gelzang a kinei bangmah buaina omlou in, Pathian in gah hon piak mit a muhtheih pansan in, Camp lohching leh manphatak mai in kizou hi. Mi tamtakten Pathian toh kituahna nei in, mi tampi Pathian deihna bang a hinkhua zang ding a kipethak muhtheih ding Toupan hon pia hi. Hiai hun in Heutupa Rev. K Kamchinkhup, Director of Missions thugentu in hong pang hi. Pathian in Thupina tengteng tangta hen!
–Pastor K Thangsuanmung

PENSION LOH MASA PIA:
1. Suangdoh khua a om Nu Dimzaniang in a pasal omlouhsan nung a family pension loh a lak masak penpen Pathian gam sum hiding in a omna tualsung Saptuam ah a poimoh bangbang a zat ding in pia hi. EBCC Suangdoh in kipahhuai sa mahmah in KTZ tungtawn in kipahthu genna in taklang uhi.

2. Pi Chingthianngai w/o Late T. Thonzagin, Siloam Veng, Bungmual a om, a pasal in thupina gam a apaisan nung, Government apan Family Pension loh a lak masakpen, kipahthu genna in Pathiain Gam nasepna ding in EBCC Bungmual Saptuam ah pia hi. Pathian min phat in om hen

KHALOH LAK MASAKPEN PIA:
1. Mr Sanglawmthang s/o Nu Vungzaching Moria Pearsonmun a om, 14th Assam Regiment in a khaloh lak masakpen Pathian kiang a kipahthu genna leh a gam nasepna a zat ding in EBCC Moria ah pia hi. Saptuam in a kipahpihna uh KTZ ah hong taklang uhi. - Upa L Khamzapau.

2. Mr. Ginminthang Tunglut s/o Late T. Thonzagin, Siloam Veng, Bungmual in a sepna Assam Regiment a khaloh a lak masakpen, kipahthu genna in Mission nasepna ding in EBCC Bungmual Saptuam tungtawn in pia hi. Pathian min phat in om hen.

BIAKIN THAK ZIAK A KIPAHTHU GENNA:
EBCC Tuitengjang in khua kisuan ziak in Biakin phelsia ua, a hoihzaw tunkhiak ding tup in ana nei gige uhi. Theihtawp suah in pang mahle uh, zou zou mahmah lou in, school sung ah biakna nawngkai tak in kum 2 val bang ana zang uhi. Hiaibang a haksataka a omlai un, DWC Lamka North Division, EBC Headquaretrs, leh mi muanhuai Pathian gam nasepna dia kiphalte panpihna ziak in Biakin building kilawmtak leh nuamtak tunkhiak in omtheita hi. Biakin thak, June 14, 2019 in Rev Paukhanmang Guite, General Secretary, EBC in Pathian min in honna nei a, Rev V Thangkhangin, DS Lamka North Division in latna nei hi. Biakin thak a kipaktak a Pathian phatna leh biakna neitheita a hihman un kipak mahmah uhi. Pathian hoihna leh Saptuamte deihsakna ziak a hiai tan tungthei ahihna uh phawk in, Biakin bawlna a pangkha tengteng tung leh Pathian tung a kipahthu KTZ tungtawn in Upa V Ginkhenthang, Secretary, TBSUC in hon gen hi.

MISSION FIELD ETNA REPORT TOM:
Pathian’ louma Saptuamte tungtawn a kekletna ding, mission field survey bawl ding in Upa T Paukhansiam Missions Co-ordinator makaih in Evan. K Kamkhenthang leh Evan. L Pauchinlal-ten Tripura ah July 19-27, 2019 sung hun vazang uhi. District thum bang va phakual in, South Tripura a om, Belonia a kipan 30Km vel a gamla, Wangsora para leh Bangladesh gamgizul a om Sabroom area lak, biakin om nailouhna leh Missionary-te ana lutkhak louhna mun va mukhia uhi. Toupa’n pha asak leh i louma ding ahimai diam chih toh hongkik uhi. CMSC leh CEC phasakna bang in September khabul in i missionary-te 2 indepth survey bawl ding in lutnawn ding uhi. Pathian khebul tun in, thumna in delhzui ni.

CES BUALJANG APAN KIPAHTHU:
CES Bualjang Singngat Division a omten School toh kisai a taksapna tampite Headquarters apan huhna a muhte uh ziak a kipahthu genna in thusuah bawl uhi. Hiai huhna zang a kibawl, staff room, verandah, latrine zotna lampi, zunbuk tuang zutna, bench leh desk 10 tuak bawl zou uhi. School sung leh pua nuam tuam mahmah a naupangte leng siangthou tuan mahmah uhi.

–Biaklianthang Hdm.

MISSIONARY NUMEITE/ZITE CAMP REPORT TOM:
Amun: CBCNEI, Retreat Centre, Guwahati.

Ahun: July 23-17, 2019.

Sinsaktute leh a sinsakte uh:

1. Rev.Dr. Ginnei Thang Ngaihte: Devotion hun (Who Am I, What Am I For, Light of the World).

2. Mrs. Ching Ngaihte: Role and Responsibility as wife in the Field Raising Children in a Cross-Cultural Stress management.

3. Mrs. Lynda Pauli: Significant Woman, Five Love Languages.

4. Miss Donzachiin: The need and role of the Holy Spirit in the life of Woman Cross-Culture Communication.

5. Mrs. Apokla Ben: Woman after God’s own heart.

Hiai Camp zang ding in i Mission Field neihte akipan Missionary numeite/zite ban ah, nauneu neite leh nau dondite hong paikhawm in, camper 62 pha uhi. Sinsaktuten amau subject chiat thazohtak in sinsakna pia ua, camperte kipak in tha ngah mahmah ahihdan uh report kingah hi. Nau don a kuante lah kipak, camperte lah kipak chihdan ahi. Hiai hun a a sinkhiakte uh manpha sa mahmah chiat ua, field lam tunnawn chiang a banglam hiam a kikhekna a omngei lamen uhi. Kipiakthakna nei in, khelahtak in camp zangzou uhi. A kipahhuai mahmah tuh, “Open Doors Ministry” a sem heutunu, Lynda Pauli leh a lawmten hiai camp a senna omteng hon tumsak uhi. Toupa ading a a kipiakna uh thupi in manpha mahmah hi. Hiai bang semtheizel ding in Pathian vualzawlna i ngetsak hi.

MISSIONARY-TE INVEHNA:
Upa T Paukhansiam, Missions Co-ordinator in hun lemtang a neih bang in EBC goih hilou a mahni awlmohna a Agency tuamtuam a Missionary a kuante’ inkuante vehna, itna thilpiak piakna leh thumsakna hun lohching leh manphatak in zang zouthei hi. Veng/khua 24 akipan inkuan/mimal 70 bang ompha hi. Hiai hun ah veng/khua tuam a Upate leh Pastor-ten ana makaihzel uhi. Veh a omten, Saptuam in hon phawkpha ahi maw, chi in kipak thei mahmah uhi.

STAFF QUARTERS THAK:
EBC Headquarters huhna toh EBCC Thanlon in Staff Quarters thak abawl uh zouta ua, June 28, 2019 in Rev M Zalian Guite, DS Thanlon Division in honna leh Pathian kiang a latna nei hi. Inn kibawl etlawm in hoih mahmah a, tuin Evan. Teacher H. Ginmuan in luah hi. Hiaibang quarters hoih a neihna uah kipak mahmah in KTZ tungtawn in School Committee Chairman in kipahthu hon gen hi.

THANLON VETERAN-TEN CEILING FAN PIA:
Chikmah a CES Thanlon khangthu a omngeilou, Thanlon Veterans kichi, CES Thanlon a ‘na kai lui leh school it mahmahten Toupa Gam nasepna leh CES Thanlon a deihsakna uh latsakna in, class room teng leh staff room ban ah, Hostel Study Hall ah Ceiling Fan koih suaksak uhi. A na hoih sep uh thupi in etton tham ching i sa mahmah hi. School Committee kipak mahmah ahihman un, KTZ tungtawn in kipahthu hon gen uhi. Thanlon Veterans Toupa’n ompih in makaihzel hen aw.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia