Innsung Thu | KTZ

Innsung Thu | August 2019

KIPAHPIHNA
Pastor Dr Tunson Tunglut, tulel a EBCC Songtal a Toupa belamte kemtu leh vaktu in, SAIACS Bangalore akipan in Doctor of Ministry in Pastoral Theology and Counselling (D.Min) ngah hi. Thesis topic “Urban Pastoral Ministry with special references to EBC Bangalore” ahi a, i kipahpih mahmah hi. Amun a va omdet ngailou in, Professor-ten a chih bangbang uh hih zel in leh heutute’n leng a poimoh bang a nungthuap kawm zel in, lungke hetlou in haksatna tampi palsuak in hon zoukhia hi. A zilpat tung a kipan a zoh tan in kum 8 bang lut zou a, March 30, 2019 in zohna lukhu khuksak in omta hi. Pathian in thupina tang henla, gah tampi suangthei ding in a sikha Pastor Dr Tunson Tunglut leh a inkuante vualzawl hen.

KIPAHTHU GENNA
Toupa Gam na sem a, heutute zui a, alang lang diang a ka omlai in, theihkholh louh in April 4, 2019 in “Stroke” a pukse thei ding dinmun ah ka na om hi. Doctor thupiak bang in kintak in RIMS, Imphal ka naihpah uhi. Lampi a buaise ding dinmun a ka omlai un MEBC Thamnapokpi Pastor Quarters ah seppihte deihsakna toh kikem thei in ka om ua, ka kipak mahmah uhi. RIMS ah Doctor in hoih leh siamneltak in honna kem a, ICCU a ni 12 bang ka omzoh in, inn lam a kikem thei ding in hon paisak hi. Inn lam leh damdawi inn a hong veh a, ka damna ding a thumna leh thilpiak a ana pangte tung ah kipak petmah ka hihman in, KTZ tungtawn in kipahthu ka hon gen hi. Pathian huhna toh June 26, 2019 in Office kaizou in, sep ding om bangbang ka sem nawn theita hi. Ka damlouh hun sung a ka tung a heutute siamna leh deihsakna ka tante thupi leh manpha ka sa mahmah mai hi. Deih bang in hatzou naikei mahleng, thahatna hon pethei Jehovah Pathian ahihman in, na hon thumpih zomzel uh ka hon ngen hi.
-Upa Kamlianthang, Driver, Dorcas Hall

LOH LAK MASAK PIA
Tuailaite’ lak ah sepna muthak unaute’n kipahthu genna in a lohlak masak uh Pathian gam sum ding in pia uhi. Amaute Mr N. Paukhansuan s/o N. Jamkhanthang, Police Department, Immanuel Hq., Mr Lamminthang s/o Lunjang Guite Teacher, Immanuel Hq., Miss Dr. Chiinhoihniang d/o Upa V Tualhang, Bethlehem, New Lamka (G). Hon vualzawltu leh nekzonna ding nna hon petu Pathian ahih lam phawkna tuailaite’n a neih zel uh kipahhuai i sa hi.

DBMC LAMKA NORTH DIVISION MOTIVATION:
Lamka North Division DBMC in mission nasepna hihhatna programme kum teng in tualsung saptuam vehna a neih zel uh himahleh tukum in chituam deuh in zang uhi. Division sung a khua 3/4 kigawmsak in khawmpita bawl uhi. Hiai khawmpita hunte ah Director of Missions thugenpi a pang zel in, a hun lemtang louhna mun a omleh bel midang in luah zel hi. Hiai programme May kha vel apat paitou zel mun bangzah hiam a khawmpita a neih nung un tu kha tan in zousiangta ding uhi. Hiai dan a programme a bawl uh lohching leh manpha mahmah hiin thei uh a, a saite leh division sung a om mipite kipak mahmah uhi. Lamka North Division DBMC in Mission field huhna chi in taksapna leh poimohna hong om hun chiang a kiallap a zatpah theih ding ngimna in tukum beima tan a muhsuah ding in Rs 2,00,000.00 dong khawm lellel uhi.

 

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia