Gammial Aw | KTZ

Gammial Aw | April 2019

Amasa in Gammial Aw Simtute tengteng i Toupa leh Hondampa Jesu Khrist min in chibai. I Mission Field-te a Toupa’n semtute tungtawn leh a mi siangthoute thumna tungtawn a gah hon piakte anuai a bang in enkhawm nawn ni.

A. HIMALAYAN MISSION FIELD
1. KATHMANDU PREACHING TRAINING REPORTS:
February 19-22, 2019 sung Crosslinks and Langham School of Biblical Training in a sai uh training poimohtak, Kathmandu mun a Ebenezer Bible College a vakihel thei i semtute leh upa khenkhatte ziak in kipahhuai i sa hi. Hiai training na ah Nepal EBC apan in mi 18 vatel thei uhi. Mimal devotion hun a zat ding leh ministry a thugenna hunte a zat ding manpha tak a vasin khiak ngei uh i lamen hi. Hiai training hun sung in England, Australia, India leh Nepal gammite’n sinsakna pia ua, English apan Nepali pau a lehna pen ei semtute vakizang thei ua kipahhuai i sa mahmah hi.

2. PHAIZANG SAPTUAMTE ADING BYF ONE DAY SEMINAR NEIH IN OM:
March 04, 2019 in Phaizang a om Saptuam 8 apan in Tuailai mi 40 vel paikhawmte’n Dharampur Nepal EBC biakin ah seminar hun zang uhi. Hiai hun in Pastor Prem Raj Bantawa Rai, Damak Area Pastor in “Developing Christian Character” chih thupi pansan in kisinsakna hun session 2 zang hi. Hiai programme pen Plain Area Field BYF in a sai uh hi a, a telte kipak mahmah uhi. Toupa’n thupina tang hen.

3. SUNDAY SCHOOL TEACHER TRAINING:
March 07, 2019 zinglam dak 09:00 AM apan nitaklam dak 3:30 PM tan Birtamode NEBCC mun ah thupi tuamtuam pansan in Field Sunday School Committee memberte’n Sunday school teacher te sinsakna pia uhi. Hiai hun in phaizang saptuamte apan sinsaktu 30 val paikhawm uhi. Training gahsuah leh manpha hong hih i lamen mahmah a, hiai bang training hill area a leng zat ding field in sawm hi.

4. BHUTTABARI A PATHIAN NASEP THUPI
Mrs. Abey Bhutia pen Sikkim lamte hi a, Bhuttabari a a sanggam Mrs. Ditchen Tamang kiang a a om sung in dawiniin in man hi. Amah Buddhist ahihman in a siampite un huai amah hihbuai dawiniin delhkhiak sawm in panla uhi. Hiai ni ahihleh March 01, 2019 ni hi a, a nitak dak 5 vel a pan buaipan ahi. A lamet bang uh hiai siampite’n ahihtheih louh ziak un lungkia in tua mun a i semtu Evangelist Suanboi Vualnam sam uhi. Gingtu bangzah hiam toh Mrs. Abey Bhutia ading in thumsakna nei in tua ahihbuai dawiniin tai in Jesu Khrist min in hawlkhia uhi.

Ginglou, Budhist siampite lohsap nung a gingtute thumna Pathian in dawng a, dawiniin hawlkhiak a om in, tua hun a ginglou tampite theihpihna a Pathian vangletna hong kimu pen i biak pa Pathian tungnunna ahihman in kipahhuai i sa mahmah mai hi. Pathian minphat in om hen! Mrs. Abey gingtu a hong suahna ding in counselling i semtute’n pia uhi. Thumna in delhzui leng Pathian in a hong veh a, A thil thupi hih hong mukhate’n Jesu Khrist lam nga a lunglutna ahon neihna ding uleh A ngaihdamna tang a, hotdamna huang a pilut a a hong om theihna ding un thumni. Ban ah, EBC Bhuttabari a i semtu leh gingtute tuabang nna sem thei zel ding in thumsak lailai ni. Toupa’n thupina tang hen.

5. KIPAHTHU GENNA LEH THUMNA DINGTE:
1) February 2019 kha sung in Pathian in Gingthak mi 6 leh Baptisma tang mi 1 a hon piakte ziak in Pathian kiang ah kipahthu genni. Khalam a a hong khanlet zel theihna ding un thum zom lai ni.
2) Phidim station ah Saptuam in gam lei. A gam letdan 82x62 sq feet, 24,57,422 vel man ahi. A gam man October 2019 sung a piak siang vek ding in field in a gam neitu te toh agreement bawl hi. Kipahthu gen in a poimoh bangbang Pathian in ahon piakna ding in thum ni.
3) Miss Sandya Rai, Uttarey station a i gingtu ahi a, a innkuante’n a kikhop ding phallou uhi. Amah nikum December 2018 kha a piangthak ahi. Tuin Class X Board exam lel hi. Pathian piina ngetsak ni.
4) Jorethang station a gingtu Mr. Mon Bahadur Chhetry khaniin in hihbuai sek. Tuamun a i semtute’n ana thumsak in hoih zel. A hong hoihzom a ginna kiptak ahon neihna ding in thumsak ni.
5) Evan Sangbiakmawi in February 20, 2019 in tanu deihthoh huai tak Itahari, Nepal ah nei hi. A min ding in Deborah Kimthiannem phuak uhi. Pathian kiang ah kipahthu gen in a nu leh a nau ading in damna hoihtak ngetsak ni.

B. KARBI ANGLONG MISSION FIELD:
1. THU TUAMTUAM:
1) Gingtu kibehlap: Pastor Manthing area sung Silonijan khua a om Mr Jiren Ronghang 25yrs in Jesu Khrist ahi hon hondamtu chih gingta in March 03, 2019 in Koilamati Fellowship ah baptisma tang hi. A innkuanpihte avek un Honghari (ginglou) ahihman un Khrist khebul a a hong pai theihna ding un thumpih ni.
2) Field Working Committee Mission & Christian Giving Motivation: FWC thupukna bang in Mission & Christian Giving motivation programme, FWC memberte group a kikhen in February 10, 2019 ni in EBCC Paklongkam Den Arong, Rongali, New Langrik, Bithilangso te ah nei uhi. Hiai programme in Mission Nasepna a thilpiak lam a gah kipah huaitak hon tut ding lamet ahi.
3) Rev. N. Tuang Lang, Field Superintendent leh Field sung a om workerte’n February 04, 2019 in fellowship nei khawm uhi. Hiai hun ah kimel theihtuahna leh ministry report workerte’n nei in Field Superintendent in Pathian thutak pansan in hasotna thugen nei in, kipahna ankuang umkhawm in hun zou uhi.
4) Kum 2019 EBC Karbi Anglong Mission Field School apan Cross Cultural Missionary bangzah hiam suan ahihman a, school naupang bang a hong chi de aw i chih lai in Pathian in lamdang tak in naupang tampi hon pia! Toupa min phat in om hen.
5) Field Baptist Dorcas Fellowship(FBDF) malakna in February 22-24, 2019 sung, EBCC New Langrik ah “Non hihhalh nawn kei dia hia” (Sam 85:6) chih thupi zang in khawmpi neih in om hi. Hiai hun in Mrs. Grace Ronghangpi in Pathian thutak gen a, Evan Hannah Hansepi leh Evan Kache Hansepi te’n Ruth leh Esther tangthu apan Bible study nei in, Rev Jameson Bey in “Nute mohpuakna” leh “Khalam a halhthakna”, chih thupi toh seminar la hi. Hiai hun a tel Dorcaste’n khalam a vualzawlna thupitak ngah uh ahihman in kipahthu genni.
6) Paklongkam Convention English School ah February 28,2019 in Headmaster leh School Committee makaihna in School Magazine honkhiakna leh School a di Desktop Computer te Pathian kiang a latna Rev Jameson Bey, Assistant Field Superintendent in nei hi.
7) EBCC Rongali local committee te makaihna in BDF leh BYF te panpihna toh pulpit, lecturn leh conductor table thak 60,000/- seng in biakin sung tut in omta. Hiai bang nasepna field sung ah ettontaak mahmah hi. Pathian in Rongali saptuamte lungsim munkhat a om a kalsuan khawm thei zel di’n vualzawl zel hen aw.

2. KIPAHTHU GENNA LEH THUMNA DINGTE:
Jiteplong fellowship in Khristian thilpiak lam ah masawn, kipahthu genkawm in maban ah khalam le-salam a a hong khan theih nading un thumpih ni.
Tari Adong EBCC member Mr. Kolom Kro singkung a kia leh Mrs. Kungri Ronghangpi sing in a jep khak Diphu civil hospital a om, tun damlam manoh ahihman un kipahthu gen ni
Tukum field a school i neihte ah naupang tampi a kibehlap man in Pathian kiang ah kipahthu gen ni.
Evan Rupsing Timung, Malaria Typhoid a damlou a ana ki enkawl himahleh a hong damtak man in kipahthu genni.
February kha a ginglou Mr. Jiren Ronghang, Jesu Khrist hotdamna hon saan theih ziak in kipahthu gen kawmkawm in khalam a khan hoih khan pha a hong khanna ding in thumpih lailai ni.
Damlouhna ziak a i thumpihte uh (Mrs. Sika Rongpipi leh Mr. Sarmung Phangcho) hoihlam manoh tou zel ahihman un kipahthu gen in a hong damsiang nading un thumpih lai ni.
New Langrik CESte’n Bench leh Desk akidaih nawnlouh ziak in sing at sak uhi, hoihtak a Pathian pina toh a bawlzoh theih nading un thumpih ni.
Field sung a local saptuam muan mahmah bangzah hiam khalam ah bah mahmah uh. Nakpitak in thumpih ni.
Mrs. Basanti Tokbipi w/o Langtuk Hanse Bithilangso khua a om cancer natna nei ahihna ah thumpih ni.
Mr. Bimol Phangcho, Purnima Kramsapi, Mohila Kramsapi leh Longki Teron te’n, thumpihna ka poimoh uh, na thumnate uh ziak a ka dam uh leh Khristian hong lut ding ka hi uh a chih man un thumpih ni.
Nihanglangso khua a om Mr. Sarhon Timung phungjawl natna nei, damna ahon neihna di’n thumpih ni.
Den Arong khua a om innkuan nih; Mr. Rajen Hanse leh Ajit Teron te innkuan in Khristian sahkhua lunglutna nei ahihman un daltu bangmah omlou a Khrist hondamtu a hon san theihna ding un thumpih ni.
Mr. Kehai Hanse f/o Pastor Joel Hanse teknat a om buai pihpih ngai ahihman in a enkaitute leh a damlou a di’n thumpih ni.

C. DHEMAJI MISSION FIELD:
THU TUAMTUAM KAIHKHAWM:
1) Dokhinchapori biakin temporary a kibawl neulua a, Field fund a kipan hiai biakin major repairing bawlzoh hita. March 14, 2019 in Rev. T Thangzasiam, FS in a latna nei a, Rev. K Kamchinkhup, Director of Missions, Rev L Khaikhansong DS/LSD leh Upa T Paukhansiam, Missions Coordinator te’n leng hiai hun in thugenna nei uhi.
2) March 02, 2019 in Field a semtu kisuan thak Evan H Jamkhanmang te inkuan Reception -cum- Orientation programme zatpihna field in nei. Hiai hun in Field sung nasep paidan leh target people-te tawndan tuamtuam kisinsakna hun in zang uhi.
3) Evan. H Jamkhanmang @ JK Mili leh a inkuante’n Pyangchapori mun a semtu quarter pansan in Namgharia leh Pyangchapori area ah semta uhi. Amau pau-le-ham zil kawmkawm a sem ding ahihna uah thumna tampi poimoh uhi. A tapa nihte amau omna a kipan 60km a gamla Christ Jyoti High School, Gogamukh Hostel ah koih uhi. Thumpih ni.
4) Tukum 2019 sung a Native Evangelist (Casual) a semding mi- 5, HQ in allowance a piaksak mi-5 leh Field in allowance tam loulou a piak ding mi- 7 lak hi ua, amaute’n field sung mun tuamtuam a sem ding uhi. Amaute March 09, 2019 in Field Superintendent Office ah Commissioning leh Orientation neihpih in om uhi.
5) February 2019 sung in Pathian in gingthak mi- 7 honpia hi. Amaute’n Pastor. S Thangbiakmang khut ah baptisma tang uh. Pathian in a vangkim a gah hon piak zelte ziak a kipah thugen in, amau gingthakte khalam a hong pichinna ding un thumna ah phawk ni.
6) February 17, 2019 in National Game Village, Imphal ah DMC Imphal khawmpi om ah Field a kipan Evan. M Daizachin in report leh thugenna hun manphatak in vazang thei hi. Tua ban ah, FS Meeting leh Account training Dorcas Hall ah FS leh Accountant-te kihel thei uh. Hiai hunsung in Suangdoh leh Lungchin Pastor Bial Dorcas Khawmpi ah Evan. T Nengminlun, Accountant in report na hunkhat vazang in, Field - 4 akipan FS teng DMC/LSD in singpi dawnpihna leh thapiak thakna hun manpha tak zatpih uhi.
7) March 12-14, 2019 sung in DMC/LSD te sponsor na in Workers Empowerment neih in om hi. Hiai hun ah Rev. K Kamchinkhup, Director of Missions; Rev. L Khaikhansong, DS/LSD; Upa T Paukhansiam, Missions Coordinator leh Rev. T Thangzasiam FS/DMF ten thupi tuamtuam pansan in sinsakna nei uhi.
8) Tulai in field sung a gingtu khenkhatte’n nidang a a thilchin uh zu leh sa koihkhiak haksa sa mahmah uh. Amaute’n Khrist sisan ziak a vualzohna hinkhua hon neih theihna ding un Pathian kiang ah thumpih ni.
9) Field sung a counselling neihpih lellel a om mi bangzah hiam om uh. Jesu Khrist hon muhchianna ding un thumtu te’n thumna ah delhzui ni. Mun dangdang ah leng tuabang in missionary te’n houlimpih nei uh ahihman in tuate hong gahsuahna ding in thumna in phawk ni.

D. MANIPUR MISSION FIELD:
1. THU TUAMTUAMTE:
1) Field BDF in February 09, 2019 ni in Khordak ah anngawl thumna lohchingtak in va nei thei uhi. Field hatna bulpi khat ahihna uah kipahhuai i sa hi.
2) Wapokpi a biakin lamna EBCC Central Lamka in huhna a piak uh ban ah Local saptuam leh FWC te toh pangkhawm a kibawl ahi. Atung khuhna ding beidong leh tasam a field a om lai in Lamka North DMC-te’n awlmoh leh deihsakna toh March 04,2019 ni in amau mahmah vakuan in atung langva vakhuhsak uhi. Kipahthu gen ni.
3) Heisnamte biakin mimal compound cheptak a kilam ahihman in field in biakin mun ding a zon nung un mu uhi. Tuin sai ding om bangbang sailel ahihna uah saifel pah honghih a, biakin hoihtak a hon tunkhiak pah theih nading un thumna in delhzui ni.
4) Awangjiri a saptuam omte leng mi varanda a kikhom lel uh ahihman in field in awlmohna liantak nei in biakin mun ding hoihtak leikhiak sak ding tup a nei in tuin leikhiak theih mai ding in om ta hi. Sai ding om bangbang te hon saifel pah ua, biakin hoihtak tunding hong hih theihna ding in thumpih ni.
5) MEBC Jiribam biakin lam leng a khuamteng tunkhit hita hi. Atung leh nuai neidia gel hi a, anuai quarters ding leh atung biakin dia hisap ahi. Buaina om lou a zohkhiak a hong hihtheihna ding un thumna in delhzui lai ni.
6) Maitram a field Office bawlna toh kisai a tung saat sung dia mansa hita. Bawlzoh pah hong hihtheihna ding in i thumnate uah phawk thakthak ni.

2. KIPAHTHU GENNA LEH THUMNA DINGTE:
1) Toupan kha thum hon matut pih in, a kha lina April hon pikai nawn tak ziak in kipahthu genni. Tukha sung a leng gingthak, baptisma tang thak, thilpiak a pang ding tamsem semtute tungtawn a ahon piak nadi’n thum ni.
2) Toupa’n February kha sung in Gingthak 8 Sawm-a-khat pethak 11 leh MMV mi 19 a honpiak ziak in kipahthu genni. Baptisma tang mi 01 hong om theih ziak in leng Pathian kiang ah kipahthu gen ni. Hichi bang zel a kha teng a khalam nasepna gah muh ahih theih jelna di’n nakpi in thumsak ni.
3) Gospel Harvesting Ministry tukum January – December 2019 sung in atawmpen a mun 12 a neih ding in field in yearplan in koih hi. Hiai ministry tungtawn a khamangthangte tamsem Toupa’n semtute tungtawn a hon piakna ding in thum ni.
4) Seekers/contact semtute’n a neihpih lelte uh ading in thumsak ni. Amaute’n Jesu Khrist a hotdamna kichian a hon neihna ding un thumsak ni.
5) EBC a Sawltak, Pastor candidate Mr TK Khual Gualnam leh Mr Jambiaklal Tunglut te’n March khasung in Manipur Missions Field ah Field Exposure nei uhi. Field exposure a neih uh tungtawn a Missions lungput a hon neih ua, Missionary nasepna lam a khalam mitvakna thukzaw a hon neih theihna ding un thumpih ni.
6) Tukum thupi: “Pathian Pomtak Biakna “chih mah field in leng thupi in zang hi. Field in Biakna leh phatna lam, music lam kisinsakna uang bawl ding chih khawmpi thupukna ah nei ua, hiai thiltup Pathian Kha kithuahpihna tang a gahsuah tak a a hon sepkhiat theihna ding un thumna in thei ni.
7) Thanga Chingkha a Native Casual a sem Evan Hemanta in dt 13th February 2019 in Saptuam dan siangthou in koppih neita hi. A zi Miss Achengliu Newmai (Naga) ahi. Tulel in a khe hek ziak in pai thei lou in om hi. A hong dam pah theihna ding in thumni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia