Gammial Aw | KTZ

Gammial Aw | October 2019

Amasa in Gammial Aw Simtute tengteng i Toupa leh Hondampa Jesu Khrist min in chibai aw. Thilpiak leh thumnate tungtawn a Toupa’n gah hon muhsakte anuai a bang in enkhawm nawn ni.

A. HIMALAYAN MISSION FIELD

I. THU TUAMTUAMTE:

1. Mrs. Nemngaihmawi, Dorcas Coordinator, EBC in Field sung a Dorca pawlte toh seminar hun nuamtak August 15, 2019 in phaizang saptuamte toh EBCC Birtamode ah neih pih a, August 17, 2019 in tanggamte a ding biik in EBCC Ektin ah neih pih hi. Hiai hun in saptuam sung a Dorcas Department nasep dante etkikna leh maban panlak ding dan kikupkhawmna hun leh makai hihna dia chitna leh neih ding a hoihte kisinsakna hun zang uhi.

2. August 18, 2019 in Phaizang a Saptuam a omte a ding in Sunday School Teachers fellowship, Chisang Biakinn ah nei uhi. Saptuam 7 apan in teachers 25 paikhawm ua, Pastor Prem Raj Bantawa Rai in Christian Teacher hihnate pansan in sinsakna pia hi.

3. Field Dorcas makaih in NEBCC Pathari ah August 22 -23, 2019 sung Two Days Seminar nei uhi. Hiai hun in “Tanu tamtakte’n a hihhoih thei mahmah ua, himahleh nang amaute tengteng na khup vek” Paunakte 31:29 chih thupi pansan in Pastor Prem Raj Bantawa Rai leh Mrs. Suksari Khadka-te sinsaktu in pang uhi.

4. August 28, 2019 in Phaizang Saptuam department tuamtuam a makaite a ding in kisinsakna om hi. Hiai hun in thupi tuamtuam: Nungzuihna, Saptuam ki-vaipuakna, Thilpiak, Gindan leh Sumsaina chihte pansan in Pastor Padam Thapa, Rev Lalmalsawm, Evan. Mika Rai, Pastor Prem leh Pastor Dilipte’n sinsak na nei uhi. Saptuam makaite leng kihel hoih mahmah uhi.

5. August 30, 2019 in Memeng Saptuam ah Hill Area Sunday School teacher fellowship nei uhi. Saptuam 13 apan in Sunday school heutute leh semtute mi 80 vel paikhawm thei ua, thutak genna leh hasotna hun Pastor T Ginkhozam in nei hi. Seminar paper, “Qualification of a Sunday School Teacher” pansan in Pastor Ran Kumar Sewa in sinsakna pia a, Evan. Manoj Rana Magar in Bible Quiz neihpih hi.

II. KIPAHTHU GENNA LEH THUMNA DINGTE:

1. August 2019 sung in Toupa’n Gingthak mi 26 leh Baptisma tang mi 20 A Saptuam ah hon behlapsak a kipahthu gen ni.

2. Evan. Suanboy Vualnam leh a lawinu Chingngaihsang in August 16,2019 in Toupa apan goutan, tapa ana nei thak ua, kipahthu gen ni.

3. Evan. Dinesh Khadka in station thak Gaur mun ah panmun khuak ta. Evan. Diwas Rai le Field station thak Bhojpur mun ah kuan ta. Kipahthu gen in thumpih ni.

4. I Field sung a station thak zonna ziak a semtu kilemthak omte: Evan. Prakash Shiwa in Angkhop zuanta, Evan. Prakash Rai, Pulbanjeng leh Bihidin enkol khawm ding leh Evan. Sital Livang in Memeng leh Kholagari enkai ding. Saptuamte leh semtute pangkhawm a hoihzaw a hon sepzom theihna ding un thumna ah phawk ni.

5. Phidim ah gam kilei a sum kipe kim nailou ahihman in October beima ngei a leikhiak a hong hihtheihna ding leh a gam neitute toh feltak a ki-leikhiak a om na ding in thum ni.

B. KARBI ANGLONG MISSION FIELD:

I. THU TUAMTUAMTE:

1. Field Central Working Committee (FCWC) in Field Working Committee(FWC) mohpuakna a piak dungzui in Tari Adong CES compound levelling Chairman FWC, Area Pastor leh AFS te malakna in August 10 & 19, 2019 in sepkhiak in omta hi. Hiai bang nnasepna tungtawn a school in phattuamna liantak tang kia hilou in akim-akiang a gingloute apan in leng pahtakna tang hi.

2. Field Baptist Dorcas Fellowship Committee in Pathian gam nasepna a ngai in, July 31 leh August 12,2019 in Field Headquarter a semte leh Tari Adong a semte vehna nei uhi. Hiai vehna hun ah FBDFC in bedsheet leh pillow cover khat chiat pia in AFS in hasawtna thu gen in thumsakna toh hun zang uhi. FBDFC te nasep thupi i sa a Pathian kiang ah kipahthu i gen hi.

3. FCWCte panlakna a New Langrik Biakinn compound a latrine 2 leh urinal 6 zoh ahih toh kiton in August 12, 2019 in Field Superintendent makaih in Upa V.L. Muan, Vice Chairman FCWC in honna nei a, Assisant Field Superintendent in Pathian kiang ah latna nei hi. New Langrik School leh Biakinn a dia vanzat manpha ahih ngei lamet ahi.

4. BBDFC, FBDFC leh Dorcas Co-Ordinator EBC te’n One Day Fellowship, Field Office ah Field Superintendent leh Assisant Field Superintendent makaih in August 20, 2019 in nei uhi. First session ah Dorcas Coordinator in Pathian thu genna nei a, Second session hun ah discussion hun leh practical exercise neih in om hi. Hiai bang programme om mengmeng lou a hihna ah Dorcas Coordinator kiang ah kipahna thilpiak Committee nihte’n pia ua, FBDFCte’n ana bawl uh iitna ankuang umkhawm in fellowship khak uhi.

5. Field Dorcas Fellowship-te panlakna in August 23-25, 2019 sung New Langrik ah “Na Lampite uh ngaihtuah un” (Haggai 1:7) chih thupi pansan in Htn. Ms. Liankhoman leh Mrs. Chingngaihlun-te’n Pathian thutak genna nei ua, mipite’n vualzawlna thupitak tang uhi. Hiai vaihawmna khawmpi Rev. N Tuang Lang Field Superintendent in a honna nei a, Rev. Jameson Bey in akhakna nei hi. Kum nawn Year plan adin sepsuah ding tampi a thupuk ban uah Rs. 1,60,000/- Budget ding in guang uhi.

6. August 26-30, 2019 sung in Jirsong Asong ah “Theihtawp Suah a Kisin” (IITim.2:15) chih thupi zang in Rev. K. Kamchinkhup in ‘Balance Christian Life and Ethics’ chih thupi sinsakna nei a, Rev. S. Vung Minthang in ‘Church Administration and Inter-personal relationship’ chih thupi sinsak a, ‘Management’ chih thupi pansan in Upa T. Kaithang in la in, ‘Praise and Worship’ Mr. Deuel Khual leh Mr. Khailun Guite in la hi. Hiai hun ah camper mi 86 pha a, resource person leh office staff teng toh mi 94 paikhawm hi. KAEBC adia a huntak a kisinsakna poimohtak ahihziak in Pathian kiang kipahthu i gen hi.

II. KIPAHTHU GENNA LEH THUMNA DINGTE:

1. Hidim Teron Saptuam, Manja area a om in, Pathian vualzawlna tang in Biakinn tutna ding bench 14 neita, kipahthu genni.

2. Dikrutso Fellowship, Paklongkam area in Pathian biakna ding inn lamkhinta uh, kipahthu gen ni.

3. Paklongkam CES Staff-te’n Special Class, student-te khualna a neithei uh ahihman in kipahthu gen ni.

4. Bithilangso a om Paul Hanse, Jenevi Rongpipi, Ribai Beypi, Mujari damlou a om hoih lam hon manoh ua, a hong damsiang theih na ding un thumpih lai ni.

5. Field sung a sepsuah ding Music training leh Discipleship camp omlai, Pathian pina toh hoihtak a sepsuah ahih theih na ding in thumna ah phawk ni.

6. Jiteplong area ah Pathian thu kigenna munte Khasiangthou in aveh a Pathian lam ahong ngat theihna ding un thumpih ni.

7. Native workerte lak ah Evan. Moses Teron in B. Com zou a, Evan. Sukursing Engti in D.El. Ed zoukhia hi. Field sung ah siamsinna lamah lohchinna ngah thak nei i hih man in kipahthu gen ni.

8. Field sung a fellowship omte; Waisong Rongkhelan, Dikrutso, Jiteplong, Nihanglangso, 5kmn leh Bisarpo, Pathian deihdan a khalam a hong khan ua, Pathian leh EBC adia kiptak a hong din theihna ding un thumpih ni.

9. Elder Biren Timung Rongali a om, a pa (L) Kisan Timung in August 04, 2019 in hon na mualliam san ta, a nutsiat a sungkuante thumpih ni.

C. DHEMAJI MISSION FIELD:

I. THU TUAMTUAMTE:

1. August 22-24, 2019 sung Dhemaji Missions Field ah Cross-cultural Missionary training neih zoh hita. Rev. B. Chinlamthang. Exe. Director Lok-Ki-Seva in subject poimoh taktak Cross-cultural communication, Language learning skills, Effective cross-cultural missionary lifestyle, Survey methodology leh Spiritual warfare chih thupite pansan in sinsakna nei hi. Hiai training semtute’n phattuam pih chiat ua theih ahihman in kipahuai i sa hi.

2. Pityangchapori mun a Home tuition student-te toh summer meet zatzoh in om ta hi. Hiai hun ah kitaitehna (competition) tuamtuam a neih ban uah naupangte lak ah kipahman hoih huntawk hawmna leng om hi.

3. Tukum tuilian kumdang sang a nasa zaw in haksatna tuamtuam tampi tun mahleh gingtu leh semtute hinna taan hial omlou hi. Pathian kiang ah kipahthu gen ni.

4. Kulajan area a semtu Evan. JK Mang leh Evan. Moina Mili-te’n Bolukhaguri kichihna mun ah Innkuan khat leh alunglut dang teltheihna ding in Bible study patpih in a hun bangzel in neitou theizel uhi.

5. Pyangchapori khua ah Mr Budeswor Mili kichi bum/bup ziak a damlou hun sawtpi buai in om hi. Missionary-te’n thumsakna leh counseling pe zel uhi. Taksa leh khalam damna Jesu Khrist a hon tanna ding in thumna ah phawk ni. Hiai khua mah ah Mr Bukti Doley counseling piak a om leng biakin kai panta, kipahthu gen ni.

6. Tunai zekin Mr. Romen Doley (Dokhinchapori) puan-aak (shirt) hoihlai mun-3 vel ah ki atkhiak sak, dawithu a kibumna ding ahih muangmoh ua saptuamte’n thumsakna nei uhi. Nidang in leng tuadan thiltung a tuah ngei ban uah, kibumna vanzat innsung ah leng mukhia uhi. Pathian in i thumna ziak in thiltung deih huailou apan hon veng lai hi. Toupa Pathian min phat in om hen.

7. August 8, 2019 in Lakhipathar ah Mrs Benumola Khondikoi baptisma piak thak in om hi. Amah Khrist nungzui muanhuai a hong hihna ding in thumpih ni. Hiai khua mah ah, Mr Tiren Chetiya leng counseling neihpih a om ahih man in thumna in delhzui ni.

8. Augsut 25, 2019 in EBCC Dimapur in Tualsung Mission Motivation programme a zatna hun uah Field akipan Pastor. S Thangbiakmang in report leh thugenna hun va zang in, Mr Basker Pangin in ama laphuah sakna leh testimony genna hun manphatak va zang thei hi.

II. KIPAHTHU GENNA LEH THUMNA DINGTE:

1. FWC in BCD Sinlaibu Beginner “A” & “B” lehkhiak a Assamese leh Mising pau a print ding tup leh ngim a aneih uh Translation(a-lehna) bangtan hiam zoh in omta mahleh print khiak in om nailou hi. A poimoh sum-le-pai Toupa’n hon piak na ding leh sinlaibu print khiak hong hihpah theih na ding in thum ni.

2. FWC in Field songbook “Stuti Gheet” enlarge & reprint ding a sawm uh lam zang tak a hong pai touh a Field songbook print na ding a 50,000/- budget a koih uh hon muhsuah na ding un thumpih ni.

3. Tulai in Lachangaon area a gingtu uh Mr Raj Pegu (Bandena khua) leh Mr Monju Mili-te khalam leh ginna ah hatlou in nek-le-dawn ah pukse theizel uh. Khalam a ginna piching hon neihna ding un thumpih ni.

4. Amguri mun ah saptuam in gingtu Mr Kamesh Kulite gam kikhel in biakin kibawl a, tuni tan kizang tou thei hi. Himahleh, a gam neite’n biakin omna mun ah buhbuk ka bawlnuam ua, a na kisuan khemai un chiphut uhi. Gingtute innte lah lianlou khakha ahihna ah kikhop theihna dingdan lemtang om lou hi. Pathian in mun kichian honpiakna ding in thumna toh phawkchiat ni.

D. MANIPUR MISSION FIELD:

I. THU TUAMTUAMTE:

1. Field year plan a om “Leadership in Local Church Administration” chih thupi zang a kisinsakna August 09, 2019 in MEBC Thamnapokpi ah Rev V. Nenglian, DS/Imphal Division in nei hi. Tua hun mah in Field Superintendent in leng Year Plan & Budget, Accounting system & Auditing chih thupi zang in sinsakna pia hi.

2. August 16, 2019 in Rev Chinkhengoupau, Child Coordinator, EBC in Sunday School Teachers orientation programme EBCC Paite veng Biakin ah sinsakna nei hi. Atel khempeuh in a phattuampih chiat uh i lamen hi.

3. August 20, 2019 in Field Music Sub-Committee in meeting nei ua, Labu thak sut ding, Romanscript leh Meetei Mayek a gelh ding leh EBH/Dorcas Hall toh sepkhawm ding a thupuk ahihman un hong gahsuah na ding in thumna in phawk ni.

II. KIPAHTHU GENNA LEH THUMNA DINGTE:

1. Khamangthang matna nnapi ahih dung zui in Field in mass counselling programme neihtouh touh zel sawm hi. Pathian kha ompihna toh thumna ah phawk ni.

2. Semtute’n Seekers/contact aneihte uh thumsak ni. Amaute’n Jesu thutak theichian a, hotdam a hong hih theihna ding un thum sak ni.

3. Native Casual a semtu Kh Tomba, Langol in RIMS ah tanu nei a, N. Herojit, Awangjiri in leng Lamka District Hospital ah tapa nei hi. Pathian vualzawlnate ziak in kipahthu gen ni. Amaute’n Pathian ompihna tang a saptuam leh innkuante a hong kikep siam theihna ding un thumsak ni.

4. BDF in tukum term bei kum ahih toh kiton in October 01-02, 2019 sung MEBC Thamnapokpi ah Khawmpi nei ding uhi. Hiai hun in Mrs. Vungkhawlching, AO in “Pathian pomtak biakna” chih thupi pansan in thugenna hunpi zang ding hi. Pathian vualzawlna tang a khawmpi lohching leh gahsuah ahih theihna ding in thumna in thei ni.

5. BYF malakna in October 05 – 06, 2019 sung MEBC Thamnapokpi ah Youth Revival Camp om ding hi. Hiai hun in Pastor L. Amuba leh Rev S Thang Johnson, Field Superintendent in “Na tuailai nite in nang hon siampa leng thei gige in” chih thupi pansan in tangthupha genna hun zang ding uhi. Hiai camp tungtawn a tuailaite’n kha lam halhthakna a hon neih theihna ding un thumna ah phawk ni.

6. Saptuamte thumsakna ziak in field sung nasepna in masawn zel ahihman in kipahthu gen ni. Jiribam biakin lam dinkhawl lel a, Wapokpi a pen sutzop theih in om hi. Kha mangthang matsang a nasep thupi zaw leh ngaihsang zawk ding omlou ahihman in kha teng a Toupa’n semtute tungtawn a gingtu a hon behlap zelna ding in thumsak ni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia