Gammial Aw | KTZ

Gammial Aw | September 2019

Amasa in Gammial Aw Simtute tengteng i Toupa leh Hondampa Jesu Khrist min in chibai aw. Mission field lam ginna mit in anuai a bang in en nawn ni.

A. HIMALAYAN MISSION FIELD
I. THU TUAMTUAMTE:
1. EBCC Bhuttabari ah July 11-13 sung Hotdamna toh kisai kisinsakna ban ah Biakna leh phatna hun nitak 3 sung “Be sure of your Salvation” chih thupi zang in hun manpha tak zat in om hi. Hiai hun ah Evan. Suanboy Vualnam sinsaktu in pang a, praise and worship hun ah Evan. Ajay Gurung in makaih hi. Saptuam mipi paikhawm hoih theih mahmah ua kipahhuai i sa hi. Toupa min phat in om hen.
2.Headquarters vaisaina a Guwahati a Semtu numei leh semtute zite camp July 23-27 sung zatna ah Himalayan Mission Field apan in mi 8 va kihelthei uhi. Naungek pomlai 2 a om ziak un amaute huhtu ding in a pasalte uh leng vatel uhi. Sinlai manpha taktak va sinkhia ua, khualzin lampai leh nek-le-tak leng lungkimhuai sa mahmah uhi. Ban ah, manpha a sak mahmah uh khat ahihleh a pasalte bel a missionary ahihna uh phawkthakna leh commitment thukzaw sem toh a kiik uh ahi. EBC in agoih semtu hi kei mahle uh Pathian in a pasalte uh tungtawn a hiai nna thupi, “Kha mangthang zonna nna” pia ahihdan va sinkhia uhi. Numeite kia hilou in Nu-pa ban ah Innkuan Retreat om thei lai leh manpha mahmah ding ahihdan Field ah report pia uhi.

II. KIPAH THUGENNA & THUMNA DINGTE:
1. July 2019 sung in Toupa’n missionary-te tungtawn in gingthak mi 23 leh Baptisma tang mi 13 honpia a, i kipak mahmah hi.
2. Grace Bible College a kai thakte: Mr. Kushal Rai, Imswa, Mr. Nirmal Laksam, Gopetar leh Miss Yureeka Rai, Dharampur-te ziak in kipahthu gen ni. Amau Bachelor of Theology course sinlel uhi.
3. Mr. T Douzachin, Deputy Commandant, CRPF, tua Siliguri a posting lel in Nepal a missionary vakna ding in July 2019 apan in kha teng in Rs. 7000 a pang ding in thupukna la a, a sum leng Field office ah peta hi. Kipahthu gen ni.
4. EBCC Bangalore tungtawn a Jorethang Sikkim mun a zat ding Two-Wheeler project pansan in Facino Yamaha khat Field in lei thak hi. Kipahthu gen in, manpha tak a zat ahih theihna ding in thumna in phawk ni.
5. October 01 - 03, 2019 sung Annual Field Conference, NEBCC Birtamode ah om ding hi. Thugenpi ding Rev K Kamchinkhup, Director of Missions leh Upate a ding Seminar piitu ding Upa T Paukhansiam, Missions Coordinator hi ding uhi. Khawmpi sung in thu-le-la kitaitehna tuamtuam leng om ding ahihna ah kisakkholhna leh a hun tak a hihbuaitu aom louhna ding in thumna in phawk ni.
6. October 12-17, 2019 sung YWAMte makaihna in Native mite a ding Discipleship training programme Birtamode ah om ding hi. Lohching taka zat a hihna ding in thum ni.
7. Evan. Dinesh Khadka leh Evan. Diwas Rai-te mun thak a gal matawng a sawl ding i hihna ah, amaute ading in thumsak ni. Dinesh, Gaur akichihna mun ah kuan ding a; Diwas, Bhojpur ah kuan ding hi. Hiai munte Field in survey ana bawlthakna uh, Nepal sung mah, kuamah lutkhak louhna mun ahi.
8. Angel English School, Angkhop, tu kum a kum nihna hipan mahleh naupang in boh mahmah a kipahthu gen in thumsak lai ni. Tua dungzui in Setan in kilchih a hon sual a, tuin teacher bang leng kikhek kualzek ngai hi. A hoih lam a a hong pai a, ma i sawn zel theihna ding in thum ni.

B. KARBI ANGLONG MISSION FIELD:
I. THU TUAMTUAMTE.
1. CES Langrik Parent’s Meet: Langrik Convention English School in School maban hoihzawkna ding khualna in semtute’n July 2 in, naupangte Nu-le-pate chial in Parent’s meet Programme neihpih uhi. Hiai hun Rev Jemsonbey, AFS in va uap in thumsakna leh hasawtna thu genna vanei hi. Amaute ginglou ngen ahi ua, atate uh tungtawn a Pathian thu zaksak theih in om uhi. Thumna ah phawk zom ni.
2. Saptuam leh Semtute vehna: 5KM Dorcas Fellowship-te’n Evangelist John Milik makaih in July 7 in Manja, Hidim Teron Dorcate vehna vanei ua, Evan. John Milik in Assamese pau in Unau Nepalite lak ah Pathian thugenna nei hi. Pathian min in thu-le-la a kithuahkhawmna a kuan lamte leh veh a omte’n nei in, nuamsa chiat ahihdan uleh kikhelah tak a kikhen uh ahihdan report muh ahih in manpha i sa hi. Huchimah bang in Asst. Field Superintendent(AFS) makaihna in Field Dorcas Fellowship Committee(FBDFC) ten leng Rongali a semtute omna(Quarter), Hidim Teron Semtute omna Quarter leh Bithilangso Pastor Quarter vehna nei uhi. Hiai kivehtuah hun in semtute ading Bedsheet leh Pillow Cover piakkhiakna leng nei in, amaute ading a thumsakna hunte zang uhi.
3. GBC Student-te toh Fellowship: Field akipan a Grace Bible College a sintute toh One Day Fellowship July 12 in Field Office Rongchingri, Diphu ah nei uhi. Hiai hun a GBC a kipante’n vacation sung a ministry a neihte uh report ngaikhiakna leh amaute Field leh Saptuam sik-le-tang a Bible va zil ahihna ua hanthawnna leh hasotna Field Superintendent in nei a, amaute adia thumsakna Asst. Field Superintendent in nei hi. Hiai hun mah in Bial Working Committee in itna thilpiak Rs. 500/- chiat FWC Chairman Upa Sunder Singh tungtawn in piakkhiakna nei hi. Programme zoh in itna annkuang sawk khawm uhi.
4.Gingtu kibehlap: Tari Adong mun a saptuamte thumna leh a mun a om semtute kuhkalna ziak in Mr Bijoy Ronghang, Khristian a hong kipia in, Bialtu Pastor in hoihtak a counselling a neihpih nung in July 12 in, Baptisma tang hi. Gingtu muanhuai ahong hihna ding in thumna in delhzui ni.

Huchimah bang in Paklongkam Saptuam a Tuailai mi 4 te Bialtu Pastor in counselling a neihpih khit in July 28 in, Paklongkam mun ah Baptistma tanna nei uhi. Khrist ading a Tuailai muanhuai a hong hihtheihna ding un thumpih ni.

5. Vacation Bible School: Field sung a Saptuam skul omna teng ah July 16-18 sung “I love my country” chih thupi pansan in Pathian thu-le-la kisinsakna School naupang-te a ding in Vacation Bible School lohching tak in nei uhi. Hiai VBS a naupang kihel khate Saptuam sung naupang kia hilou in ginglou naupangte tanpha ki helkha thei ahihman un phatuam mahmah hi. Field a ding a hichibang VBS a khatveina hi a, huaiziak in Nu-le-pate’n leng salam pilna kia hunlou khalam pilna bang leng poimoh lua ahihdan phawk in hiai hun a tel ding in a tate uh va khasiausiau thei zel uh ahihdan report muh ahi. Bialtu Pastorte’n leng awlmohna toh Programme-te zatpih in etkaipih zel uhi.

II. THUMNA & KIPAHTHU GENNA DING:

1. Field sung a school omna teng a VBS lohchingtak a zatzoh thei a omtak ziak in kipahthu gen ni.
2. Field sung a school-te August 01, 2019 a a lut nawn chiat theih ziak un kipahthu gen ni.
3. Rongali mun a Saptuam member damloute (Kisan Timung, Menborop Hanse, Kache Timungpi) damna poimoh mahmah uh, a hong dam theihna ding un thumna ah phawk ni.
4. Bithilangso mun a saptuam member Mr Paul Hanse local sung a mi muanhuai mahmah stroke ziak a puk, damdawi inn a ki-enkol hong damsiangna ding in thumpih ni.
5. Tari Adong a om Mr Bijoy Ronghang Khristian a hong kipia a, aman Baptisma leng tang ngal hi. Pathian kiang ah kipahthu gen in, gingtu muanhuai ahong hih theihna ding in thumna ah phawk ni.
6. Waisong Rongkhelan a om Timung Innkuante Khristian lunglut, alunglut bang ua ahong kipiak theihna ding thumna a phawk ni.
7. Mr Honsing Hanse of Rongali singkung apan kia sawtpi damlou a om, paizoulou himahleh tuin awlawl a paitheita kipahthu gen in ahong damsiang theihna ding thumpih ni.
8. Dikrutso Fellowship Biakin neilou a om, Office tungtawn a huhna toh Biakin ding lamta ua, a zoh siangtheih nading un thumpih ni.
9. Pastor T. Pauzalian taksa lam damna/hatna poimoh ahihman in thumpih ni.
10. Rongchingri saptuam school chowkidar, Mangkhopau zi (Moi) damlouh na ziak in GMC hospital etkol in omlel, damna hoihtak a hon ngahna ding in thumpih ni.
11. Saptuamte thumna ziak in Evan. John Milik lung-am a puk in damna a ngahtak ban ah Evan. G. Haupu tapa Lalpu, Operation lohching tak a zoh a om thei ahihman in Pathian kiang ah kipahthu gen in, a hong dam hoih touh zelna ding un thumna in phawk lai ni.
12. Miss Johan Ingtipi of Dengaon Khristian lunglut, a lunglut bang a hong kipiak theihna ding thumpih ni.
13. Langrik mun a ginglou mi Mr Harlongbi Timung leh Amorsing Terang Khristian lunglut kikhawm leng kikhawm zel, kilan ngamlou thumpih ni.
14. Rajen Hanse leh a innkuante Khristian a hong kipiak ziak un a Nu-le-Pan hawlkhia ua, tuin Dengaon bazar ah a zi leh ta neu 2 toh innluah in om uh, thumpih ni. Kilohtawm a nekzong ahihna uah, thumpih ngai mahmah uhi.

C. DHEMAJI MISSION FIELD:
I. THU TUAMTUAMTE:
1. TBMC, EBCC Central Delhi in Pyangchapori Quarter a ding Inverter leh home tuition center bawlna ding a a thot uh pansan in inverter leikhiak hita. Vuahtui luanlouh hun in home tuition center bawl hiding. Kipahthu gen ni.
2. Naupang sinsakna poimoh mahmah ahihman in FWC in panlak sawm in BCD SS sinlai Beginner A & B thu kidawng leh Field Songbook “Stuti Gheet” enlarge & reprint ding in panla lel hi. Hiai project-te sepsuahna ding in TBMC, EBCC Aizawl in ` 11,000/- Headquarters tawn in thoh uhi. Toupa kiang kipahthu gen ni.
3. BYF, EBCC Bungmual in Dhemaji field a ding silh leh ten tamtak kaikhawm uhi. Hiaibang a tuailai Toupa nasepna a lunglutte ziak in kipahthu gen in, silh-le-ten kaihkhawm a omte tungtawn a miten Pathian thupina amuhna ding un thum ni.
4. Muktiar khua a missionary-te’n counselling a piak uh baptisma tangding tan tungdekta, himahleh Agency dang a semte’n va lutkhum in langva piak ding a va chiamziak un ki khahsuah hi. Pathian in mi gin om leh muanhuai hon piak zelna ding in thum ni.

II. KIPAHTHU GENNA & THUMNA DINGTE:
1. TBMC, EBCC Central Delhi in Pyangchapori quarters a zatding inverter leisak hi. Huan EBCC Guwahati saptuamte akipan Bike XCD 125 (Used) Toupa’ gam nasepna a zatding piak a i om man in kipahthu gen ni. Thilpiak petute Pathian vualzawlna ngetsak ni.
2. Pathian in July kha sung in gingtu Baptisma tangthak mi-2 hon piak ban ah Sawm-a-khat pethak leh missionary vakna a pangding hon pezel hi. Tamlou chikchik pia himahle uh thilpiak chii kituh panpan pen kipahhuai i sa hi. Toupa min phat ni.
3. EBCC Town fellowship ah BCD Sunday School naupang tamlou chik toh kipan theita in Pyangchapori khua a Evan. JK Mang Home tuition leng paitou theizel hi. Kisinsakna manpha tak ahihna ah hiai tan honpi Pathian tung ah kipahthu gen ni.
4. Semtute’n tulai a Pathian thu a houlim pih uh Miss Sunmoni Pegu, a vangkim in biakin kai theita, Mr. Roman Narah leh Mr. Sunil Chintey leh a pianna pa leh Mr Trinayan Kulite ban ah Mr Butki Doley leh Hemanto Doley-te houlim pihna nei uhi. Khrist hon muhchianna ding un Pathian kiang ah thumpih zomzel ni.

D. MANIPUR MISSION FIELD:

KIPAHTHU GENNA LEH THUMNA DINGTE:
1. Toupa’n i thumnate uh hon dawng in July in Gingthak – 02, Sawm-a-khat pethak – 06 leh MMV mi 03, Baptisma tang mi -01 honpia, kipahthu gen ni. Semtute Toupa’n a hon zatsak ziak a kipahthu gen in gah tamsem hon piak na ding in thum ni.
2. Mass Counselling programme tu kumtawp lam in a tamthei lam field in neih sawm hi. Semtute’n contact tamsem ahon neih ua, hiai programme tungtawn a khamangthang tamsem Toupa khebul a piilut a honghih theihna ding in naktak in thumna ah phawk ni.
3. Semtute’n houlimpih a neih zelte uh a ding in thumsak ni. Amaute’ houlimpih na tungtawn a Jesu Khrist a Hondampa ding ua hon san theihna ding un thumpih ni.
4. Native Casual a semtu Evan. L. Sonkumar’ zi Sanathoi in RIMS ah July 29 in tapa operation in neikhe mahleh sawt damlou in ni thum nung in hon beisan hi. Field Office Gari zang in a sepna khua uh Wapokpi/Sugnu puak tung in om a, tua mun ah vui in om hi. Pathian khamuanna, hihdamna leh a ompihna deihhuaitak mai ngen in thumsak ni.
5. August 16 in Field Office mun ah Field a naupang lam etkolna toh kisai Sunday school teacher’s orientation neih in om hi. Hiai hun in Rev Chinkhengoupau, Child Co-ordinator, EBC resource person in pang a, aman thupi tuam sinsakna nei hi. Kipahthu gen in, kisinsakna tungtawn a gah kipah huai tak field in hon neihna ding in thumpih ni.
6. Kumtawp khawmpi a din Field kisak kholhna pailel hi. Toupa’n i sepnate hon vualzawl a, saptuam det leh hing tak phuhkhiak ahong hih theihna di’n a Khasiangthou ompihna ngen ni.
7. Field a biakin leh quarters bawl lellel omte saptuamte tungtawn a zohkhiak ding lametna lianpi kinei hi. Toupa kha ompihna toh zoh khiak a hong hihtheih nading in thum ni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia