Gammial Aw | KTZ

Gammial Aw | August 2019

Amasa in Gammial Aw Simtute tengteng I Toupa leh Hondampa Jesu Khrist min in chibai aw. Toupan Mission field-te a gah hon muhsak anuai a bang in enkhawm nawn ni.

A. HIMALAYAN MISSION FIELD

I. THU TUAMTUAM:

1. UTTAREY mun ah school naupangte khawl sung suam in July 5-7,2019 sung “Be a Responsible Learner” chih thupi a nei in vocational training sai in om hi. Hiai hun in naupangte lunglutna leh sinlai manpha a sintheih na ding uh ngimna in Music, Arts leh Career Guidance ban ah Cyber Crime toh kisai pilvan tuak leh theihtuak omte leh Communication Skill ki-sinsakna om hi. I semtute: Evan. N Samuel, Evan. Jemson Ngaihte, Evan. T Ginzalun leh Evan. Thawnkhanlian te resource persons hi ngal ua, Programme master in Evan. Givson Jack Rai pang hi. Hiai bang sai a om pen Uttarey a omkha nailou ahihman in kipahpih mahmah uhi. Naupangte khualna leh deihsakna a programme sai ahih lailai in hiai mun a ginglou mite toh contact point hoihtak hi a theih ahi. I nnasepte mi nautang in ahon phawk ua, kizopna hoih i neih theih chiang in khalam vaite leng saizom ding i tunsawmna ahi. Hiai programme a tamtak kihel thei ahihman un kipahhuai i sa hi.

2. Plain Area Sunday School Teacher Fellowship June 30, 2019 in NEBCC Pathari ah lohchingtak a zatzoh in om ta hi. Hiai hun in Pastor Prem Raj Bantawa Rai sinsaktu in pang a, Sunday School heutu mi 17 vel paikhawm thei uhi.

3. June 22-23, 2019 sung NEBCC Tunibote Biakin ah Field BYF saina in Seminar leh Halhthakna kikhop om a, Tuailai mi 85 vel kihel thei uhi. Hiai programme ahihleh Tanggam lam a Pastor bial 3 teng huap a bawl ahi. Devotion hunte Pastor T Ginkhozam leh Pastor Ran Kumar in makaih ua, Seminar leh thutak genna hun Evan. Prakash Rai leh Evan. Dinesh Khadka in la uhi. Kidemna leh kipolhlimna hunte Evan. Philip Khapangi leh Evan. Ram Kumar Rai te’n makaih in programme nuamtak zang uhi. Gingtu kichi himahleh ki-theihchianna thak nei a Hotdamna sang thei mi 20 om uhi. Toupan thupina tangta hen.

II. KIPAHTHU GENNA LEH THUMNA DINGTE:

1. Uttarey station a zat ding Multimedia & PA System leikhiak hita. Pathian kiang ah kipahthu gen ni.

2. June 22-23,2019 sung Tunibote ah Field BYF saina a Chialpina hun manphatak Tuailaite ngimna bik in sai in om a, mi 20 in Hotdam hih kitheihchetna nei in kipahna thak toh kiik uhi. Pathian kiang ah kipahthu gen ni.

3. June kha sung a gingthak mi 13 te ziak leh baptistma tang mi 32 te ziak in kipahthu gen ni.

4. Damlou tuamtuam thumpih dia ki-gente ban ah Evan. Manoj Rana Magar zi leh a tanu, baby Unisma Magar damta uh, Pathian kiang kipahthu gen ni.

5. August 15 – 17, 2019 sung Dorcas Coordinator in Field veh a sawm, programme lamzangtak a zat ahihna ding in thumna in phawk ni.

6. July 3, 2019 nitak in Evan. Thonkhanlian-te inn luahna amau Workers’ Fellowship zang dia a zinkhiak kal un guta te’n ana luh ua, sum tang bangzah hiam leh Bluetooth speaker khat ana la uhi. Vandangte bel bit a, himahleh lungsim thawmhausak tuan mahmah ahihman in, hiaibang a tuah nawnlouhna ding un i thumna uah phawk ni.

7. Grace Bible College a kai thak dingte: Mr. Nirmal Laksam, Mr. Kushal Rai leh Miss Yereka Rai te’n a kilawpna bangbang ua Laisiangthou a sintheih ua, ahon sin mualsuahna ding un thumpih ni.

8. Nepal gam sung mah ah station ding zonna Field BMC in nei ua, FWC in report delhzuina mun 2, Gaur leh Bhojpur a etkhiaknadan a semtu koih ding gel hi. Pathian hon pina ngen in thumna in delhzui ni.

B. KARBI ANGLONG MISSION FIELD:

I. THU TUAMTUAM

1. Saptuam leh Semtute Vehna: June 10, 2019 in Field Dorcas Committee makaite’n Assistant Field Superintendent makaihna toh Dengaon leh Jiteplong a omte a inn-inn a veh in hasotna leh vualzawlna ngetsakna nei uhi. Hiai hun in Field BDFC-te’n semtute zat ding in Bedsheet & Pillow Cover pia ua, semtute kipak mahmah uhi. Hiai bang nasep manphatak Field BDFC in hon sepsuah theihna uah Toupa’n amaute vualzawlna tamsem in vuk leh i chi hi.

Huchimah bang in, FWC-te’n leng June 30, 2019 in EBCC Tari Adong vehna nei uhi. Hiai hun in bialtu Pastor Jacob Rongpi in biakna hun makaih a, FWC Chairman Elder Sundorsing Timung in Saptuam vehna ziak gen in kikhop tawp a kihoulimna makaih hi. Tuaban ah, Assistant Field Superintendent in “Christian Maturity” chih thupi zang in thu genna hun zang hi. Vehtute leh veh a omte kipak chiat uh ahihman in manpha i sa hi.

2. Kihahsiangna leh Tutna bawlsak: FCWC in New Langrik Saptuam leh schoolte zat ding kihahsiangna (zun leh ek buk) ding, concrete in bawlsak lellel a, AFS in enkai hi. EBCC New Langrik in a sing ding bangkim sutuah in Biakin tutna ding leng bawlsak lel uhi. Nasepte buaina omlou a zoh a hong hihtheihna ding in thumna in delhzui ni.

3. One Day Sunday School Teachers’ Orientation Programme: Field Khawmpi thupukna sepsuahna in June 14, 2019 in Sunday School Teacher’s Orientation programme EBCC Rongchingri ah nei uhi. Hiai hun in KAEBC nuai a Sunday School teachers 28 paikhawm in, SEVA Bharat te’n sinsakna va nei uhi. Buaina bangmah omlou a zoh a hihtheih ziak in kipahthu gen ni.

4. School Building Thak Hong: EBCC Bithilangso local saptuam in a etkol school, a building lui leh se mahmah FWC panpihna leh local saptuamte hah panna toh zoh ahihtoh kiton in, June 23, 2019 in school building thak honna leh latna Assistant Field Superintendent in nei hi. Programme zoh in TBSUC leh school a sem heutute toh an nekkhawmna nei in programme zou uhi.

5. Paklongkam Biakin Hon in omta: EBCC Paklongkam Biakin, DBMC Lamka North Division panlakna a kha nih veel bawl ahihnung in zohsiang ahih toh kiton in Pathian min a honna leh latna Rev. V. Thangkhangin, DS, LND in June 20, 2019 zinglam dak 11:00AM in nei hi. Hiai hun in DBMC, LND Chairman leh Vice Chairman ban ah member bangzah hiam in uap thei uhi. Amau Division min bang, Tualsung Saptuam min bang a hunzang in kipahpihna thilpiak tamtak piakna leng vanei uhi.

Field lam apan FS, AFS, Vice Chairman FCWC, Chairman FWC, Pastors leh Evangelists-te paikhawm in Biakin thak sung dim phiphet uhi. Field Office nihte min leh Tualsung Saptuamte apan thilpiak piakna leng om ngal hi. Biakin hon zoh in biakna kikhop om a, Rev. V. Thangkhangin in thutak genna hun zang in, Lamka North Division Missions Committee Chairman in Saptuamte hasotna thu gen hi. EBCC Paklongkam Saptuam leng kipak petmah in, programme zoh in vok khat gou in annkuang luina nei uhi. Toupa’n thil thupitak hon hihsak a i kipak mahmah ahi.

6. Two Wheeler Gari Laan: June kha sung in Saptuam mi, peinih nei gari lei mi 3 om uhi. Amaute – Evan. Sukursing Engti, Daniel Rongpi leh Jirsong Rongpi te hi uhi. Field sung a four wheeler & two wheeler neithakte ziak in Pathian i phat hi. Manphatak leh vualzawlna petu deihna bang a azat theih uh i deihsak hi.

II. KIPAHTHU GENNA LEH THUMNA/NGETNA:

1. Mathew Lekthe damlou a om hihdam a omleh Khristian a lut ding a kiman ahihman in thumna tampi toh delhzui ni.

2. EBC Karbi Anglong Mission Field sung a School teng in Half yearly exam hoihtak a azoh theihchiat ziak un kipahthu gen ni.

3. Bithilangso khua a Khristian lunglut a hanchiamte’n Khrist kichiantak a hon saan theihna ding un thumpih ni.

4. Den Arong khua a zu dawn Khristian teng a ding bik a June kha a Camp neihtheih ahihman in kipahthu gen in, gah kipah huaitak a suahna ding in thum lai ni.

5. Joiram Ingti leh a zi, Den Arong khua a teng te’n Khristian hih lunggulhna lianpi nei mahle uh, hong kipekhe ngam nailou uh. Thumna ah phawk ni.

6. 5KM ah Biakin mun ding kinei nailou. Pathian kiang ngen ni.

7. Waisong Rongkhelan Biakin ding kilam lellel, kipahthu gen in, hoihtak a zohsiang ahihna di’n thum lai ni.

8. Field sung a natna giltak thuak, Pathian in ahihdamte: Jasmine Milikpi, Mojari Phangcho, Sarmung Phangcho leh Sika Rongpipi-te ziak in Pathian phat ni. Hong damsiang vilvel nading un thum lai ni.

9. EBCC Bithilangso ah Sintawpni teng in Area Pastor makaih in Bible study pat theih in om hi. Kipahthu gen in, lamzangtak a sutzop leh gah kipah huaitak a suah na ding in thumpih ni.

10. Manja leh a kim a gingloute khauh mahmah uh. Pathian Kha Siangthou vehna ngen ni. Saptuam in Sound System leh Sunday School Hall thak neizou a om kipahthu gen in, zat manpha a hon zat theihna ding un thumpih ni.

11. Mr. Ajit Teron Khristian ahihziak a a khote’n a bawlsiatna uh om zelte, tu’n bangmah om nawnlou in vengta, Pathian kiang kipahthu gen ni.

12. Tulai in kholum luat ziak leng hi ding semtute leh saptuamte damlou leh omnuamlou chih tam mahmah. Natna ziak a haksatna tawpkhawk tuaklou a Pathian hihdamna ngetsak ni.

C. DHEMAJI MISSION FIELD:

I. THU TUAMTUAMTE:

1. Thumtute thumna Pathian in hon ngaih khiaksak in June kha sung in gingthak mi 2 in Pastor. S Thangbiakmang khut ah baptisma tang uhi. Hichibang a gingthak baptisma tangte’n khemna lam chi tuamtuam ah tuak nuam mahmah uh ahihna ah thumna ah phawkzui zel ni.

2. June 16, 2019 in multi-purpose building Upa Doukhanson, Chairman DMC/LND in honna leh latna aneih ban ah Chairman DMC/LND leh T/Upa Paukhanlian, Member DMC/LND te’n thugenna hun zang uhi. DBMC Lamka North Division-te’n nylon chair a leisak uh piak khiakna leng nei uhi.

3. Field office mun a biakna patkhiak ding field in lunggulh na lianpi nei a omlai in June 16, 2019 in EBC Town Fellowship, Dhemaji kichi patkhiak theih in omta hi. Naupangte awlmohna ziak in Mrs Niangngaihlian w/o Pastor S Thangbiakmang makaih in BCD Sunday school bulpat a om in, Beginner sinlai (Thu kidawng) sinsakna leh lasinna neihpih theih in omta hi. Fellowship in PA Sound system moveable (Zatlui hileleng) khat poimoh mahmah hi.

4. June 30, 2019 in EBCC Lachangaon biakin ah saptuam-5 kigawmte ading bik in Couple Seminar om hi. Hiai hun ah Arunachal Pradesh akipan Pastor S Jamzakap IEM leh a zi Evan. Haukhanniang-te’n sinsakna manphatak pia uhi. Kipahthu gen ni.

5. June kha sung in sawm-a-khat pethak mi 5, mimal missionary vakna pethak mi 1 leh nupa kitengthak kop 1 semtute nasepna tungtawn in piak in ki-om hi. A diakkhol in thilpiak tampi pe zoukei mahle uh a chii kituh pen kipah huai i sa mahmah hi. Toupa’n gah hon piak zelna ding in thum ni.

6. Mrs. Lily Patil a pasal in a sihsan nung tuni tan thawmhau den a om in, a tapa kum 6 lel toh khosa, zan chiang a lausek a Saptuamten thumna va neihpih zel ua, a tenna inn leng saptuamte’n repairsak uhi. Pathian khamuanna hon neih theihna ding in thumna in delhzui chiat ni.

7. Semtu te’n Pathian thu a houlimpih uh Miss Sunmoni Pegu (Dokhinchapori) a vangkim in biakin kaita ban ah Tv. Roman Narah (Kapurdwa) leh Tv. Sunil Chintey leh a pianna pa (Kapurdwa) leh Mr Trinayan Kuli (Dhemaji) te leng houlim pih ahihman un amaute’n Khrist hon muhchian ua gingtu muanhuai hong suahna ding un thumpih ni.

8. Evan. JK Mang makaih in Pyangchapori ah a tuition naupang teng toh summer ministry thu leh la kisinsakna ban ah outdoor games bangzah hiam neihsawm uhi. Lohchingtak a hon neih theihna ding un thumna in phawk chiat ni.

9. Field in naupang sinsakna poimoh ngaih mahmah in FWC panlakna in BCD Sunday School sinlai Beginner A & B Mising pau in let uhi. Hiai bang nasepna hoihtak a zoh ahihna ding in leh a print nadia poimoh sum leh pai a hun hun a Pathian in hon piakna ding in thum ni.

D. MANIPUR MISSION FIELD:

I. THU TUAMTUAMTE:

1. Field in Labu a neih a beisiang toh kiton in second edition bawl nawn sawm hi. Amau Music Sub-Committee leng kibawl ua, Labu zatlel a om pen a diklou omte bawldik a Meitei mayek leh Roman script a print ding in panla lel uhi. Buaina dang om keileh September kha sung a print sawm ahihman un thumna in phawk ni.

2. Field sung a nasep pailel Jiribam Biakin leh Quarters kithuah leh Wapokpi a biakin kilam lelte ahi. Hiaite buaina om lou a zohkhiak a hong hih theihna ding in a kul-le-poimoh om bangbangte a hunhun a ngah ahih theihna ding in thumna in delhzui ni.

3. Thamnapokpi a Pastor Quarters bawlthak poimoh mahmah ta. Pathian vualzawlna toh bawl ahih theihna ding in thumna ah phawk ni.

4. Maitram a field office lamna nasep pai hoih tou zel, lamzangtak a a poimoh om bangbang te sepkhiak a hong hih theihna ding in i thumna toh delhzui zel ni.

II. KIPAHTHU GENNA LEH THUMNA DINGTE:

1. Tukum year plan a field in a neih Saptuam kivaipuakna (Local Church Administration) kisinsakna neih ding chih ahi. Hiai hun ah Local Upa Committee, semtute leh sumsai tute tel ding ua, sinsaktu in Imphal DS leh FS pang ding uhi. Year plan lohchinna ding in thumna ah delhzui ni.

2. Gospel Harvesting programme tungtawn in Nachou MEBC ah gingthak kibehlap hi. Semtute’n pan nasazaw a hon lak ua, khamangthang tamsem Toupa khebul a tut ahihna ding in thumna in phawk ni.

3. Pathian vualzawlna ziak in field ah kumdang teng sang in kiteng hong om panpan ta uh kipahthu gen ni. Tuin leng naupai lel nupi bangjah hiam om lel ahihman in, chidamtak a nau a hon neih theihna ding un thumsak ni.

4. Saptuamte’n sinsak a aom bang un year plan leh project nei thei panpanta uh, kipahthu gen ni. Sum-le-pai saina ah leng budget neihdan sinsak hi ua, tua dung zui a audit leng bawlsak hi uhi. Masawnna hoihtak a hon neih theihna ding un thumpih ni.

5. Field in Indigeneous policy paipih a intuansak dingdan geelna sepkhiat ding maban ah om lel hi. Pathian kha ompihna toh time-frame plan/policy lohching leh gahsuah thei ding bawlkhiat ahih theihna ding in thum ni.

6. Awangjiri a saptuam biakin mun ding gam .10 alian lei sawm a panlak lel ahi. Agam lai saina ah buaina tuamtuam ziak in tunitan saifel siang theih in om nailou, Pathian ompihna tang a saifel a hong hih pah theihna ding in thumna ah phawk ni.

8. Field a semtu omte’n Toupa lau a, a thupiak zuite hong hihzel theihna ding un thumpih ni. Tuamah toh kiton a poimoh tuh veina mittui toh thumsaktu ding ahi. Toupa Kha vehna ngen in nakpi in thum lai ni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia