Gammial Aw | KTZ

Gammial Aw | June 2019

Amasa in Gammial Aw Simtute tengteng i Toupa leh Hondampa Jesu Khrist min in chibai aw. Toupa’n i thilpiak leh thumnate tungtawn a thil thupi hon muhsakte anuai a bang in enkhawm nawn ni.

A. HIMALAYAN MISSION FIELD
1. THU TUAMTUAM:
1) April 20, 2019 in Budhabare Saptuam leh NEBC Social Action Committee panlakna in Free Medical Camp, Government School khat pansan in nei uhi. Mi 183 in hiai camp hamphatpih uhi. Hiai hun in Living Hope PolyClinic in damdawi tamtak a thawn in hawmkhia hi. Hiai bang activity i seppatna ahi a, maban a leng sepzom touh zel hileh chih deihthu kigen tam mahmah hi.
2) Dorcas memberte awlmohna in ni 2 sung Field in Pathari Saptuam ah Kirtipur leh Chisang tel in April 10 – 11,2019 sung hun zat pih uhi. Hiai hun in Pastor Prem Raj Bantawa Rai in “Marital Life” chih thupi a zang in sinsakna pia a, Dorcas Coordinator Evan. Geeta Tamang in “Role of Mother at home and in the Church” chih thupi zang in sinsakna pia hi.
3) Hwaku Nepal Evangelical Biakin thak honna April 27, 2019 in Field Superintendent in nei hi. Hwaku Saptuam din nung kum 15 hita. Tua Biakin ki-lam amasa pen hilai. Member 17 ban ah saptuam upa 2 om uhi. Member a hong kibehlap ding lametna lianpi neih ahi. Hiai tan honpi Pathian min i phat hi
4) Area Pastor Paukhankhup in Angkhop ah gingthak mi 3 baptisma pia hi. Hiai hun in Local Saptuamte ading in Training a lawinu Chingkhansiam toh pe thei ua, manpha i sa hi.

2. KIPAHTHU GENNA LEH THUMNA DINGTE:
1) Himalayan Missions Field a Basic Bible School ading a huhna pia EBCC Aizawl te ziak in kipahthu gen ni.
2) Toupa’n April kha sung a gingthak mi 19 leh baptistma tang mi 3 hon piak beh ziak in kipahthu gen ni.
3) Evan. Dil Bahadur Lingden, Bungrung a i semtu in May 6, 2019 in Saptuam dan siangthou in koppih nei hi, kipahthu gen ni.
4) Field apan Grace Bible College a kai Mr. Prakash Shiwa in Bachelor of Theology a zohtak man in kipahthu gen ni.
5) Field Office ah Tally kizang panta. Accountant-te Pathian piina ngetsak ni.
6) Grace Bible College ah tu Academic session 2019-20 in Field apan in mi 3 Laisiangthou sin ding in kisa uhi. Sintu dingte’n daltu bangmah omlou a lamzangtak a a hon sin theih na ding un thumpih ni.
7) Field in Toupa gamna zazaw a septheih lunggulh in survey bawl ding lunggulh mahmah uhi. Ami ding leh amun ding kichiantak Pathian in ahon piakna ding in thum ni.

B. KARBI ANGLONG MISSION FIELD:
1. THU TUAM TUAM:
1) Baptisma tang: EBCC Rongali saptuam a tuailai mi 7 in April 19, 2019 in Upate leh Pastor pangkhawm in Hotdamna thu hoihtak a houlimpih khit ahih nung in hotdamna kichetna nei in baptisma Pastor Manthing Hanse khut ah tang uhi. Amaute ziak in Pathian phat in om henla, gingtu muanhuai a hong hih nading un thumna ah phawk ni.
2) Joint Palm Sunday Rally: EBCC Rongchingri malakna in April 14, 2019 in Diphu Taralangso Karbi People Hall ah “Hosana, Hosana, David tapa, Toupa min a hong pai ahampha hi” chih slogan a nei in Rongchingdon Baptist Church leh Messiah Baptist Church-te toh hun zangkhawm uhi.
3) Saptuam vehna nei: 5KM Rongchingri fellowship-te’n April 07, 2019 in Pastor Jacob Rongpi makaih in Waisong Rongkhelan fellowship vehna nei uhi. Huai hun ah Pastor leh Evangelist ten taksa leh khalam a dia phatuam di thute gen ua, lohchingtak in zou uhi. Hiai dan mah in EBCC Rongchingri BDFte makaihna in April 14, 2019 in EBCC Koilamati Fellowship Bolero gari nih(2) reserve in local committee te toh mi 20 in vehna nei uhi. Hiai hunah Rev Jemson Bey, AFS in Pathian thutak ankuang lui a, Dorcas ten nek leh dawn ding a suktuah ban uah bel(pot) lian huntawk tak Fellowshipte itna thilpiak in pia uhi.
4) Director of Missions & a team-te’n field veh: April 26, 2019 apan May 2, 2019 sung Rev K. Kamchinkhup, Director of Missions, Upa G. Joel Hangzo, Chairman CMSC leh Upa T. Paukhansiam Mission Co-ordinator te’n saptuam omteng leh fellowship omteng vehna nei uhi. Amaute vehna ziak in Field sung a Saptuamte, Field makaite, Bial makaite, leh Workers ten phattuamna lianpi nei a gah hoihtak ahon suah ngei lam-et ahi.
5) EBCC Paklongkam Church Building Construction: I thumnate uh ziak in EBCC Paklongkam Biakin lamna paizom tou zel a, local Saptuamte leng theihtawp suah in pang uhi. Pathian ompihna toh lamzoh pah a hong hihtheihna di’n thumna ah phawk ni.
6) Bial Dorcas Fellowship in nna thupitak sem: Bial Dorcas Fellowship Committee in, Dimapur Guest House, Manja Pastor Quarter leh Field HQ Guest House-te a zat ding steel almirah khat chiat ban ah FS Quarters ading water filter khat leh, FS Quarter, Accountant Quarter leh Guest House a ding purda lei khia uhi. Kipahthu gen in, amaute’n hiai bang a nasep hoih hon sepzom touh theih zel na ding un Pathian pina ngetsak ni.

2. KIPAHTHUGENA LEH THUMNA DINGTE:
1) Field sung a skul te’n 1st Quaterly exam buaina omlou a zoh ahihtak man in kipahthu gen ni.
2) Saptuam sung a i thumna ziak in New Langrik a om Mrs. Sika Rongpipi (cancer) Operation lamzangtak in neihtheih in om, ban ah Mr. Mathew Engleng accident ziak a ngal guh kitan hoihlam manoh a inn a ki-enkawl ta ahihman in, kipahthu gen in thumsak lai ni.
3) Evan. Vungngaihnuam, typhoid a damlou in hoihlam manoh in skul kai zouta. Kipahthu gen ni.
4) April khasung a tuailai mi 7 baptisma tangte ziak in kipahthu gen ni.
5) Den arong khua a numei pawlte thilpiak a biak piakna ah theihtawp suah in pang ua, pasalten leng thilpiak a biak piakna ahon ngaihpoimoh theih na ding un thumpih ni.
6) Lumding Road a om Deben Ronghang ginglou himahleh a damlouhna thumsak din semtute ngen hi. Khalam leh salam damna a muhna di’n thumpih ni.
7) Dikrutso Fellowship (Paklongkam area) te Biakin lam din kisakhawl lellel uh, fellowship Biakin ahon neihna ding un thumpih ni.
8) EBCC Paklongkam Biakin lamna lamzang tou zel a, hoihtak a zoh ahih theih nadin thumna ah phawk ni.
9) Manja EBCC ah member hong kibehlap zel a tun inn 13 phata. Pathian kiang’ kipahthu gen in thumpih ni.
10) Bimol Phangcho leh a innkuante Khristian hong lut ding utna nei ua, thupukna dik ahon neih theihna ding un thumpih ni.

C. DHEMAJI MISSION FIELD:
KIPAHTHU GENNA LEH THUMNA DINGTE:
1) April 10, 2019 in Evan. T Chinbiakmung leh Evan. Santush Doley te sepna mun Amguri ah gingthak mi 5 te’n Pastor S Thangbiakmang khut ah baptisma tang uhi. Pathian in a vangkim a i sepna gah hon piak zelte ziak a kipahthu gen kawm in khalam a hong pichin ua, Pathian vanzat manpha hong hihna ding un thumna ah phawk chiat ni.
2. April 19-21, 2019 Good Friday leh Easter Sunday sung in EBCC Itanagar ah Halhthakna Chialpi lohchingtak a zat in om hi. Hiai hun ah Evan. H Jamkhanmang in “Hon Hihhalh nawn in” (Sam 85:6; 80:18) chih pansan in thugenna hunzang hi. Saptuam mi bangzahhiamte’n kiphawkthakna leh kilatthakna nei thei uh. Kipahthu gen ni.
3. April 28, 2019 in EBCC Namgharia Biakin Pastor Thangbiakmuang Guite, EBCC Lamphel in honna leh latna nei hi. Biakin honna programme zang in EBCC Lamphel akipan mi 8 va kihel thei ua, Dibrugarh area a Government service nei bangzahhiam in thilpiak toh a va uap ban uah EBCC Itanagar akipan bangzahhiamte’n leng thilpiak toh va uap thei uhi. Pu L Suanthang Ngaihte Commandant, 31st BN, ITBP inleng programme uap in thugenna hun zang hi. Biakin lopna in voktal khat gou in paikhawm mipite’n ankuang umkhawmna nei uhi.
4. May 07, 2019 Missionary Day in semtu Evan. H Jamkhanmang in EBCC, Central Delhi ah zang in, Evan. Thangbiaksuan in EBCC Bethany, Bungmual ban ah Rev T Thangzasiam, FS in NLBC ah hunzang hi. Amaute’n Pathian kha ompihna toh lohchingtak in zangzou uh. Kipahthu gen ni.
5. FS Office Campus ah multi-purpose building bawlna nasep pat hita. Nasepna ahihleh DMC/LND te makaihna a bawl hi a, amau hiai bawl ding a mi 5 (nga) a sawlte un tuin sem lel uhi. Hiai nasepna EBC HQ leh DMC/LND te pangkhawm a bawl ahi. Nasepna bangkim haksatna leh nawngkaina om het lou a zoh ahihna ding in thumna in phawk chiat ni.
6. Tulai a missionary ten counseling a piak lellelte uh Pathian ompihna ngetsak ni. Amaute Pathian kha in hon kheksak a Jesu hon san theihna ding un thumpih ni.
7. Mr Deepak Doley (Dokhin Chapori) a Biakin gam neipa a U-paten police ah ka gam hon kek chiin case file sawm uh. Police in amun a etna uah thupi sa vaklou ua theih ahi. A U-te toh tengkhawm, a pianna pa Pujari (Siampu) nasem hi a, tulai in a nasepna lohchin luat louh ziak a sukbuaitheihna ding zong uh ahi diam chih in om hi. Gingtu hong suah tung inleng a U-pa zi in thuzuau bawl a case FIR a bawlsa ahi. Thupi lou a hong venna ding in thumna ah phawk chiat ni.
8. EBCC Lamphel a om Dr. (L) KP Guite min in a zi leh tate’n field a zat ding Projector leina ding FS khut ah pia ua, tuin leikhiak hita. Kipahthu gen ni.
9. Missionary day hun a semtute mun tuamtuam a thugen ding a a kalsuan khiakna Saptuamte un field awlmohna leh deihsakna ziak in huhna sum-le-pai ban ah silh-le-te’n tamtak ana pekhawm uh ahihman in kipahthu gen ni. Toupa’n petu Saptuamte tamsem pethei ding in a vualzawlna ngetsak ni.

D. MANIPUR MISSION FIELD:
KIPAHTHU GENNA LEH THUMNA A THEIH DINGTE :
1) Toupa’n i thumnate hon dawng in April kha in Gingthak - 09, Sawm-akhat pethak - 08 leh Mimal Missionary vakna pethak -19, Baptisma tang mi -07 hon piakthakte ziak in kipahthu gen ni.
2) Gingtute khalam biakna, thutak sinsakna leh kivaihawm/kimakaih dingdan sinsakna lam taksapna lianpi om hi. Toupan Mosi bang a lungneltak a gingtute kemthei semtu hon piakna din thumni.
3) Gospel Harvesting Camp, Thiyam Konjin ah April 23-25,2019 sung nei uhi. Piangthak aki behlap ban ah, nungtolh bangzahhiamte pikik in om uhi. Toupan hiai Project khamangthang matna camp hi dia hon vualzawl zelna ding in thum ni.
4) Semtute’n Seekers/contact a neihte un hotdam hih kitheihchetna diktak ahon neihna ding un thum ni.
5) Pathian huhna toh Field Sunday Skul, patnawn in om thei ta hi. Semtute’n ahon ngaih poimoh ua, awl a ma hon sawn zel theihna din thumsak ni.
6) Thiyam a Immanuel English School in First term exam hoihtak in zou siang thei nawnta uhi. Semtute kuhkalna leh naktak a panlaknate ziak in naupang hunkhop pha nawnta in kitoudelh zouthei zel hi. Thutak chi tuhna mun leh khamangthangte matna mun ahong hihna din thum ni.
7) Jiribam leh Wapokpi MEBC Biakin bawlna ban ah Field Office ding Maitram ah nasepna in masawn lel hi. Toupa ompihna toh tuktui luantam ma ngei a zoh ahih theih chiat na ding in thum ni.
8) Biakna mun ding lemchang nei thei nailou – Awangjiri leh Heisnam fellowship-te’n Pathian ompihna tang a amau a tuam ding Biakin lamna ding mun-le-mual ahon neih theih tak ziak un kipahthu gen in, Toupa ompihna toh Biakin hoih tak ahong kitunkhiak pah theihna ding in thum ni.

 

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia