Editorial

Nu Hihna a Pathian Pomtak Biak Piakna

“Numei Hoih…a man Rubi suang tunglam pek ah a om hi” [Paunakte 31:10]

Thupatna: Nute’ manphatna leh poimohna phawk in i Saptuam in Dorca Pawl phutkhia in, Nute ading in Hotdamna chialpi, Khristian Hinkhua Seminar, Inkuan sung a Nute’ mohpuakna seminar, etc. tatsat lou in i sai hi. Inkuan leh Saptuam in Khalam leh Salam ah i phattuampih a, i kipak mahmah hi. Hiai phawk kawm in Pathian Pomtak Biak Piakna hinkhua a hing Nute’ manphatna mawlchik in taklat sawm lehang chi i hi.

“NU” Thumal genchetna: ‘Nu’ i chih Hebru ‘em’ leh Greek ‘meter’ thumal apan a hong piangkhia, English a “Mother” ban ah, Hebru ‘issa/isshih’ leh Greek ‘gyne’ chih thumal, English a “Woman” apan hong kilakhia, eipau a ‘NU’ i chih ahi. Hiai thumal ‘Suangtu bul’ genna ahi a, ‘kidaih leh lian’ (vast and roomy) chihna zong ahi. Gam/leitang leh Pau/ham nangawn Nu (Feminine gender) bang a gen in om hi (e.g: mother land/mother tongue).

America President Abraham Lincoln in ‘Nu’ manphatna hichi in na gen hi, “Ka hihnasate leh hihlaina dingte ka Nu apan ka sin vek ahi” chi hi. Hiai thugen in Nute’ hinkhua thupidan, tate leh midangte adia sinsakna hinkhua a hihdan hon phawksak hi. Hiai bang hinkhua nei Nute Pathian toh kizopna chidam neite ahi ua, Pathian pomtak hinkhua a khosa Nute ahi uhi. Amaute hinkhua a muhtheih thil manpha tampite laka a poimoh diak lite i taklang ding:

Khatna, Biakna Limsak hinkhua: Pathian pomtak biakna hinkhua a hing Nute Biakna limsak lou omlou uhi. Biakna Pathian kiang a toukaina leh kipahthu genna thilhih ahi chih theichian uhi (Is.6:1-9; 40: 25; Rm.1:21; Diut.32:3,4; Sm.45:1; 23:5; 100:1ff.; 98:1-8). Biakna in mimal toh Pathian kinai sak a, Amah batna a khangsak gige in, Pathian adia pomtak hinkhua in hingsak hi (2 Kor.3:18). Pastor Jack Hayford in, Biakna in biak a om Pathian limlehmel sun ding in betute hinna khek lamdang hi, a chih bang Nu tampite ziak in Pathian min I phat hi.

Nihna, Laisiangthou sim Limsak hinkhua: Pathian pomtak biakna hinkhua a hing Nute’n Pathian Aw diktak zakna leh theihchetna omsun Laisiangthou ahi a, khalam nawitui, bangmah toh kihel lou ahi, chih theichian in limsak uhi (1 Pet.2:2). Pathian thu, sim gige in khalam a chidam, khang, piching leh gahsuah hinkhua in hing uhi (1 Pet.2:2; 2 Tm.3:16; Sm.1:1-3). Horace Greeley (American Newspaper Editor) in, Laisiangthou sim gigete lungsim leh hinkhua a salmat vual hilou uhi, a chih bang a Pathian pomtak biakna hinkhua a hing Nu tampi om uhi.

Thumna, Thumna Limsak hinkhua: Pathian pomtak biakna hinkhua a khosa Nute’n Thumna Pathian toh kithuahna (houlimna) ahi a, Khalam a Nakna leh chidamna ahi chih theichian in thumna limsak uhi (1 Thess.5:17-18). Abraham Lincoln in Ka Nu thumnate ka hinna a belh in hon zui den ahi, a chih bang a thumthum Nute ahi Pathian pomtak biakna hinkhua a hingte.

Lina, Thilpiak Limsak hinkhua: Pathian pomtak biakna hinkhua a khosa Nute’n Thilpiak kipatna Pathian ahihdan, mikhialte itna ziak a a tapa tang neihsun honpia ahihdan theichian in, Toupa gam nna sepna dia thilpiakte limsak gige uhi (Jn.1:1-5,14; 3:16; Rm.5:6-8; Philp.2:7-8; Is.53:10). Missionary C.T. Studd in, ka hinna leh pumpi, ka neih tengteng Toupa a ahi, avek in amah nna sepna ding in ka pekik hi, chi a a pumpi leh bangkim phal tak a a piakkhiak bang in Nu tampite’n a bangkim uh pekhe phal ua, Pathian pomtak biak piakna hinkhua in hing uhi.

Thukhitna: Nute’ manphatna toh tehpih theih ding thildang bangmah omlou ahihman in, Pathian pomtak biak piakna hinkhua a hing Nute hichiat ding in Toupa’n Nute tengteng khalam leh salam vualzawlna in hon vuk leh chih i lunggulh leh thumna ahi!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia