Editorial

Thilpiak a Nasep a Pathian Pomtak Biak Piakna

“…Pathian in kipaktak a pe mi ahi a it” [2 Kor.9:7c]

Thupatna: Pathian itna thilpiak thupipen ‘A tapa Jesu Khrist’ ziak a eite’n tangtawn hinna ngah i hihman in kipahna gen vuallouh ziak in thupina leh pahtawina i Pathian i pia hi. Hiai thilpiak thupi hon pia Pathian in amah gamzatna dia i hihtheih tawp suah a thilpiak a i thukkik ding hon lamen hi. Khristiante hiai mohpuakna ah kuamah kiawngsut thei i omkei hi. Hihtheihna hon piak zahzah a hon lamen ahihdan phawk thak ding in i kichial hi.

Thilpiak piakding gingtu chih kiawngsut theihlouh mohpuakna ahi: Piakkhiak ding a sum-le-pai hon kemsak a, hon vualzawltu Pathian ahi. Pathian in amah a mah, i etkol theih dingdan toh kituak in, Gingtute hon kemsak hi (Mt.25:14-30). I neih-le-lam tengteng Pathian hon piak ahi a, kisaktheihna ding a ziak neuchik leng neilou i hi (1 Tm.6:17: cf. Diut.8:7-10,17; Hag. 2:8).

Phal tak leh tampi sepkhiakna di’n Pathian in hon kemsak hi: Thilphal a, thil hoih tampi sepkhiakna dia Pathian in hon kemsak a hon piak ahi a, it tuntun a, angmasial tak a kep leh zat ding a honpiak hilou hi (1Tim.6:18). Abraham mohpuakna bangbang, midangte adia vualzawlna luanna hih ding, gingtute mohpuak ahi (Gen.12:1-3). I hinna pumpi leh neih-le-lam tengteng Pathian in hon phut lezong pedia kimanna lungput nei dia hon lamet i hi!

Gingtu chih in vualzawlna a don toh kituak (kimil) a a piakkhiak ding Pathian deihdan ahi: Sawltak Paul in Galatia gam a saptuamte kiang a a gen bang in Korinthte kiang ah – Michih in vualzawlna a dondan bang zel a a piakkhiak ding Pathian deihdan ahi! – chi hi (1 Kor.16:1-3). Tampi a a vualzawlte, tam a lamen a, tawmchik a a vualzawlte, tawm a lamen hi. Huchi ahihlai in, tawmchik a a vualzawl a, tawmchik a lametna a neih Meithainu’ thilpiak in Jesu nangawn lamdangsakna in dimsak hi. Aman sum a vualzawlna a don tengteng, avek sipsip in (100%), Pathian kiang ah pekik hilhial hi (Mk. 12:41-44; Lk. 21:1-4).

Gingtu in a lungtang a a tup bang a, kipaktak a piak ding Pathian deihdan ahi: It pipi a pe lou in, piak louh theihlouh a ngai hilou in, kipak tak in a peding ahi (2 Kor.9:6,7). Masidonia gam a gingtute’n sawina haksatak a tuahlai nangawn un Paulte kiang a ngen ngutngut in (hamphatna a ngai in) thilpiak a pia uhi. Pathian deihlam a kipe masa in leh heutute (Paulte) thu mang in, a neih utoh kituak a pia in, tua sang a thupi zaw in a pia uhi (2 Kor.8:1-5). Akhaia gamte’n Lungsim a kiman leh kithalawp tak in a pia uhi (2 Kor.9:2).

Gingtu’ thilpiak a manphatnate: Pathian kiang a kipahthu genna lahkhiakna leh Pathian bangkim honpetu’ min phatna leh thupina puanzakna nasep ahi (2 Kor.9:11-13; Jkb.2:14,17; Heb. 6:9f.). Sabiak siangthou leh gilou panglou, Pathian pomtak biak piakna ahi (Jkb.1:26f; cf. Rm.12:1). Pathian adia gimnamtui thillat, kithoihna pomtak leh Pathian kipaksak ahi (Philp.4:14-18: 1 Tim.5:8). Mangthangte’n tangthupha a ngahna dia Pathian thupiak thupi sepkhiakna ahi (Nas.1:8; Rm.10:14-15).

Thukhitna: Gingtu chih in hun paisate a Toupa gam adia thilpiak i piakdante kivel thak ni. It pipi a pelou in, lungsim a kiman in, phaltak leh kipaktak in i pe na hiam? Pathian hon vualzawlnate apan amah hon lamet zah i pe na hiam? Theihtawp suah a thilpiak pia i kichih lai a, Pathian pomtak louh hihkhak ding lauhuai lua hi. Thilpiak a Toupa nna i sepnate, amah adia gimnamtui, kithoihna leh biakna pomtak, amah kipaksak hi di’n panla thak chiat ni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: ebc.[email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia