Editorial

Thumna hinkhua a Pathian pomtak Biak piakna

“Tawplou in Thum un” [1 Thess. 5:17]

Thupatna:
Jesu Khrist in Thumna neih ngaih poimoh pen in nei a, Zingsang baihtak in thum a, Nitak in thum a, Zan khovak in thum a, Ann ngawl in thum hi [Mt.4:1-11]. Pathian Tapa hilhial in hichikhop a thumna a ngaih poimoh leh ei Khristiante, mihing leltak in, thumna neih poimoh ngaih luat ding ahi hon chisak hi. Thumna limsak Khristian a chidam a, khandan dik in a khang a, gah tampi a suah hi. Thumna limsak lou Khristian a chidam kei a, a khandan diklou in, gah a suah theikei hi. Thumna limsak Khristian leh Saptuamte i hih leh hih louh i khotang hinkhua in gen hi. I khotang hinkhua a chidam hia? Buai vengvung in a navak kei hia? Thusia lasia in a dim hia? Hiamgamna leh thagumsuahna in a dim hia? Ahih keileh, Tawldamhuai in a zalen hia? Michih a khamuang hia? chih kidot hun mahmahta hi.

Sawltak Paul in Khristiante adia thumna neih a poimohdan leh thumna, Saptuam kia hilou a, khotang leh khovel thilte tanpha bawlhoih a omna dia Pathian khut tangsaktu leh Pathian thilhihtheihna samkhetu ahihdan, Timothi kiang ah nakpi in gen hi [1 Tm.2:1-6].

Kuate Thumpih ding:
Vaihawmtute leh Thuneitute Pathian seh ahihman un nakpi a thumpih ding Pathian deihdan leh hon phut ahi chi hi [Rm.13:1]. Saptuam makaite kia Pathian seh hilou in, Khotang a makaite leh vaihawmtute – Gam-le-nam makaite, Politiks a makaite, Organization, NGO, etc. a makaite – Pathian in a seh ahi, chi hi. Hiaite ban ah, mi tengteng, Gingloumite tanpha, adia thumsak ding i mohpuak a hon koih ahi, chi hi. Khatvei-nihvei thumpih zeuhzeuh ding chilou in, ‘tawplou a thumpih ding’ [1 Thess.5:17] chih hon lametdan ahi, a chi hi. Pathian hon lamet bang lungput nei in na thum zel hia?

Thumna gah dingte:
Tawplou a mi tengteng adia thumsakna in i mihinpihte toh kilemna hon tun ding; Saptuam sung, i khotang vai tuamtuamte, Gam-le-nam sung thoveng leh navak a om a, galmuang tak a Toupa nna sem thei ding; Khristian mimal leh khotang hinkhua
a Pathian mitna leh siangthouna hinkhua muhtheih a om ding [1 Tm.2:2]; Khamangthangte hotdam a om ding veina leh puakgik a nei a, theihtawp suah a sem thei ding [1 Tm.2:4; 5:13,16] i hi, chi hi. Hiai a kigen thilte eite lak ah muhtheih leh sepkhiak ahi
na hia chih kidot tham ching hi?

Thukhitna:
Sawltak Paul in Pathian theihsak a Timothi a sinsakna thudik leh kingakna tham ahi, i chihleh tulel a i Saptuam, Khotang leh Gam-le-nam hinkhua a thil tung i muh leh zakte apan Thumna neih ngaih poimoh pen a nei Khristiante i hi, i kichi thei diam?
Jesu nungzuite i kichih leh Jesu bang in Thumna ngaih poimoh pen in i nei hia? Thumna ngaih poimoh pen a nei i hi i kichih leh Pathian thu in Thumna gah ding chi a ana gente i lak ah muhtheih in om hia? Thuchiampa zuau ngeilou a, eilam mah a
kisam hi gige i hi chih kiphawk in, thumna a i Pathian lungkimsak a, a thilhihtheihna samkhia a, amah pomtak biakna pia mimal, saptuam, khotang leh gam-le-nam hi dia kipan taktakta di’n Kha Siangthou in michih hong tokthou henla, i gam ah vai hong
hawm mahmah leh chih kideihsak mahmah in Toupa kiang i thumna in i ngen hi.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia