Editorial

KHA LEH THUTAK A PATHIAN POMTAK BIAK PIAKNA

“Pathian zaw Kha ahi a, a bemite’n Kha leh Thutak a a biak ngeingei ding uh ahi” [Jn. 4:24]

Thupatna:
I Pathian zahngaihna tang in tukum 2019 a Kha Nihna a pikai in i omnawnta a, Toupa min i phat hi. I thupi khennenna ah ‘Kha leh Thutak a Pathian pomtak biak piakna’ chih tu Kha thupi dia i neihna in, Kha leh Thutak lou leh Pathian pomtak louh biak piakna na omthei ahi chih hon phawksak hi. Kha leh Thutak a Pathian pomtak biak piakna neihtheih dingdan Laisiangthou in a gente lak a poimoh mahmah khat Jesu Khrist hondampa a nei gingtute’n i Khalam leh Salam atuam dan a khen theih hilou ahi chih i phawk. I Khalam hihna leh dinmun theichian a, tuabang a i Pumpi muhtheih a hinkhiak ding ahi. Gingtute hihna leh dinmun Laisiangthou in a gendan hiaibang ahi:

Lungsim thak nei [Renewal of Mind|Rm.12:2; 1 Kor.6:19]: Kha Siangthou huhna/makaihna a Hotdam hih kitheihtelna neita, Pathian thu theihsiamna neitheita a, zuih ding mohpuak hita chih theihna tungtawn a lungsim/lungput thak leh ngaihtuahna thak neite i hita!

Etsakna khat gen ni: Sapgam a mi khat in Vok (Pig) a nei a, a deihthoh mahmah a, a silsiang in a giahpih a, lawm hoihpen in a nei hi. Nikhat Bazar a vakpih leh lamkiang a buannawi a muh in, a tawmlut a, buannawi ah a kibual hi. A Pu in kaikhia in a silsiang hi. Anawn in tuabang in buannawi ah a tawmlut zel hi. A Pu lungdong in Gan Doctorte kiang tonpih a, Doctor in a lungtang khek kul ding chi in, Kel (Goat) lungtang in kheksak hi. Huai hun apan in buannawi lak leh ninlak utnawn mawngmawng lou hi. Lungsim thak nei i chih hiai bang ahi.

Mi kikhek [Transformed|Rm.12:2; Eph.4:24]: Lungsim/Lungput (attitude) thak a kikhekna in hinkhua lui – khelhna, diktatlouhna, thangtatna, etc. – tawpsanna [Suahkhiakna] tun a, hinkhua thak – Pathian batpih a siam, sianthouna, diktatna, itna, etc. a hinna [Silhna] tun hi. Hiaibang kikhekna in muhtheih a hinkhua leh omdan thak a hinna suahkhia hi.
Etsakna: Lung chikhat, chizauhuai leh bii natak nei, mel et a kihhuai, hong pichin chiang in singhiang leh nahpa dang a hong kikhai in, sawtkuam a hih chiang in a pumpi hong kikheng in, asung apan pangpalek kilawm, mittaihuai leh deihhuai tak hong suakkhia a, pakzu khum in kivakta hi. Kikhek i chih hiai bang ahi.

Thilsiam thak [New Creation| 2 Kor.5:17]: Lungput thak in Hinkhua thak tun a, hinkhua thak in Siam thak hihna hinkhua a suahkhe sak hi.

Etsakna: Pulpit/Tutna hoih leh kilawm mahmah sing apan kibawl ahi. Atung a Singkung, lim-le-mel kilawm nei lou, singsiamte’n hoihtak a at in lem thak ua, mel kikhek leh etlawm tak pulpit/tutna hong suak hi. Hiai bang ahi thilsiam thak i chih.
Thukhitna: Khristian mimal chih in i hihna leh dinmun theichian a, Khalam leh Salam kikhen theilou ahihdan phawk in, i Khalam hihna muhtheih louh, i Salam hinkhua muhtheih a, Lungsim thak nei, Mi kikhek leh Thilsiam thak i hihna, i hinkhiak pih chiang in, Pathian adia pomtak Kha leh Thutak a biakna pethei ding i hi. Tuabang gingtu mimal hi chiat di’n Toupa’n Saptuamte hon ompih hen aw!

 

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia