Editorial

GAM-LE-NAM LEH KHOTANG VAI TUNGTAWN A PATHIAN POMTAK BIAK PIAKNA

Gen.12:1-4; Mika 6:8

Thupatna: Gam-le-nam leh Khotang vai tungtawn a Amah Pomtak Biakna pe ding in Pathian in a tate hon lamen hi. I lunggulh a i tup nak leh, Pathian Misiangthou pai masate’n a hihtheih bang un, ei adia zong hihtheih louh ding hituan lou hi. Tutung in Israel hinkhua apan sinkhawm lehang chi in i kisa hi.

Khatna, Gam-le-nam leh Khotang Vai a Diktatna hinkhua (cf. Jer.22:3I; Isai 1:17): Diktatna hinkhua a gamtat theihna dia lampi omsun “Pathian thupiakte zuihna ah” ahi. Abraham in Pathian sapna leh sawlna theichian in, paulam bawl selou in A thupiakte diktat tak a zui di’n kiman a, Pathian Pomtak Biak Piakna hinkhua in hing thei hi (Gen.12:4).

I Gam-le-nam leh Khotang Vai a i muh leh theihte akipan Toupa thupiakte zui a, Amah Pomtak Biak Piakna nei i hi i kichi thei diam chih Israel hinkhua apan eimah kivel ni:

Israel: “Pathian thutak Pate’n a zui kei ua, a tate uh lampialsak uhi” (Amos 2:4)
Khalam leh Salam hinkhua a etton leh thuhilhtu dia om lou (Dt.6:7-9); Gamsate sang a hai zaw leh thulimlou zaw bang in Israel om hi… (Kahlate 4:3-5).

Israel: “Pathian thutak gen a taihilhmite mudah uhi” (Amos 5:10)
A gitlouhna uh genkhete melma a en, hiamgam tak a hemkhe zel (Mika 7:2)

Israel: Toupa Thudik kaikawi a, Thutak gen lou dia Jawlneite vau (threaten) (Mika 3:9; Is. 30:10f), Toupa mite (Nazarites) Uain dawnsak teitei… (Amos. 2:12).
Amau bang a hihte lawmbawl; a neupen apan a lianpen tan a kithubup a semkhe khawm a, ne khawm (Mika 7:4; Rm.1:32)

Tulai gingtute: Nek-le-dawn, Khamtheih, Numei-pasal kal thangtatna leh Diktat louhna in hon tuam a, Khalam leh Salam a etton tak leh sinsaktu hih vual hilou in, Pathian Pomtak Biakna kipe thei lou hi. Sakhi a pi a san leh a nou san chih kibangta! Kha/Salam a deihsak a taihilhmite mudah, hemkhe zel! Thutak, thudik leh diktatna genkhe ngam mi muh ding tawmta! UK/USA gamte a Thudiktak gen Pastorte saptuamte’n deihlou hiaihiaita, a chih bang un ei lak ah zong hi simsimta! Mimal dikna leh zalennate- Economic/Civil /Political /Social /Cultural Rights, etc – kinelhsiahsak vek phialta! Sem lou a tamsemsem nek ding lunggulhna a dimta! Mohsakhuai i sak mahmah Israel toh i kibang maimah hia?
Nihna, Gam-le-nam leh Khotang vai a Zahngaihna neih (To love mercy): (cf. Mika 2:1-2; 3:1-3; 1 Tm.6:10)

Zahngaihna ziak in Abraham in a sanggampa’ tapa Lot gam teelsak masa hi (Gn.13:8-13)

Israel: Sum-le-pai deihtakna in nawmvalh a, zahngaihna omlou! Israel Kumpi Ahab in Naboth Grephuan deihgoh… a tan theihna dia zuau thu bawltawm a mulkimhuai tak a thatsak! A mizatte “Khua Upate leh Makaite” hizomah (1 Kmp.21:1-16).
Israel: Thuneihna tawi nading ahih nakleh hiamgam tak a mite hinna lak nangawn poisa lou! B.C 800 hun in Israel/Juda kumpite thuneihna leh dinmun deih ziak in mulkimna bei in kiban thah ua, minautangte tanpha mulkimna bei in hemmang zel uhi.
Thuneihna nei zahzah in diktat lou tak a zang (Mika 2:1-2). Kinek huan kheukhou (Ngia gilkial, gamsa ne bang in); Govt/Khotang a hamphatna tangtu dingte’n thuneitute’ khatehnen kia tangkha ban hamham…!
Misuamna sumte a Kumpi inn thupi taktakte lamkhia: Tua sumte a Saiha a bawl Phalbi leh Nipi innte lam (Mika 3:10; Amos 3:15). Pathian in “Luah/Ne tuan lou ding uh” chi in gen hi (Amos 5:11).
Israel Makaite a mite negaitu (Exploitation) a pang (Mika 3:2-3): A mite tan ding laksak kia hunsa lou a; a mite taksa mahmah siat ding leh manthat ding poisa lou a negai!
Tulai gingtute: Sum-le-pai deihtakna in nawmvalhta, zahngaihna bei! Thuneihna lenkhate gam leh nam negaitu a pangta! Politics/ Khotang/ Saptuam a dinmun leh thuneihna deih ziak a hiamgam tak a gamtat poisa nawnlou! Hitler/ Saddam Hussein/ Muammar Gaddafi-te toh kilamdang lou! Zoudawn a unau gentheite hamphatna tan ding teng Lamka zang a om “a chetheite’n” huisiang sipsip!
GK Pillai (Home Ministry, Delhi) in NE makaite - Gam it kuamah ka mukei, Sum deih a zong ngen (Businessmen) ahi lel uh, chi hilhial hi. Zumhuai chih in gen banlou hi.
Thumna: Kingainiam a Pathian toh tonkhawm (To walk humbly with God): cf. 2 Kump.22:19; Isai 57:15.

Abraham Pathian ma a kingainiam gige a, A thupiakte sel ngei lou in Pathian in tonpih den in vualzawl hi ...
Israel: Pathian toh tonkhawm thei dia kingainiam lou ahihdan Khatna leh Nihna a i kikupnate apan kilang chian mahmah hi.
Tulai Gingtute: Pathian toh tonkhawm gige thei ding khop a kingainiam muh ding tam lou bang hi! Pathian toh tonkhawm hinkhua thupi sim nawnlou - Biakna, Thumna, Bible sim, Thilpiak - limsak a nei nawnlou (Jakob 4:10; Sam 84:2,4,10; 119:11,97-100). Pathian Dan leh Thupiakte zui hinkhua limsak nawnlou - Diktatna, sianthouna, itna hinkhua - suahkhiak ding neilou bang a khosa (Sam 119:105, 165; 2 Kor.5:14a.; Rm.13:9; Mt.5:5).
Thukhitna: Tulai Gingtute dinmun - Pathian khahzan leh taihsat nam, siatgawpna manoh lellel i hita! “Aman a hon botkekta a, a hon damsak ding hi; a hon sat a, a hon tuam dam ding hi” (Hosia 6:1). I puksiatna apan hihdam a i omna ding lampi omsun “Diktatna leh Zahngaihna hinkhua toh Kingainiam a Pathian kiang a kiknawn” ahi. Gam-le-nam leh Khotang vai tungtawn a Pathian Pomtak Biakna pethei di’n, a zekai luat ma in, Toupa kiang ah kiknawnta ni chi in i kichial hi!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia