Editorial

Nektak Zonna leh Nasepna a Pathian Pomtak Biak Piakna

“…Na hih peuhmah uh Pathian thupina ding ngen in hih un...” [1 Kor.10:31b]

Thupatna: Pathian in mihingte nektak zonna ding hon pe chiat a, khelhna ziak in gim-le-tawl a sem a nektak zong ding in hon hamsiatta hi (Gn.3:17-19). Michih nektak zong lou a om theilou in, i buaipih pen ahi chiat hi. Khristian leh tian lou hitaleh Pathian in a “principle” a a koih “nna sem a nek muh ding” ahi. I nektak zonna leh nasepna, Pathian Pomtak Biak Piakna ching hi dia Pathian in hon lamen ahihdan saulou in kikum khawm lehang chi i hi.

Khatna, Pathian in nektak zondan chituamtuam hon pia hi:

Khenkhatte Thagum a nektak zong di’n Pathian in hon sep hi. Pathian in Adam kiang ah, “tal a kho-ul kai in nektak na zongta ding” chiin na gen hi (Gn.3:19). Khenkhatte Pathian in nektak zonna di’n Govt./Mission/Private nna hon pia hi. Khenkhatte Pathian in i nektak zonna di’n Sumsinna nna hon pia hi. Mimal chih i nektak zonna dia hon piak a, i nasepdan ah, Pathian Pomtak Biak Piakna chingzou a sem di’n hon deih a, hon lamen hi. Hiai mohpuakna ah kuamah i ki-awngsut theikei hi.

Nihna, I Nektak zonna leh Nasepna Pathian adia Pomtak Biak Piakna ching ahihtheihna dia poimohte:

Khalam a Pathian Pomtak Biak Piakna ching: Nna i sep tengteng Toupa adia sem bang a sep ding ahi (Kol.3:23). Nna i septe Toupa pahtawi a om ding tup a nei a sep Pathian deihdan ahi (1Kr.10:31b). Nna i septe Thanuamtak leh theihtawp suah a sep ding ahi (Ekles.9:10a). Nna i septe Polammite muh a kilawm leh bangmah tasam lou dia sep ding ahi (1Thess. 4:11-12). Thadah a, mi-a athawn a neksak tup louh ding ahi. Nna sem peihlou in nek zong ne kei hen, Paul in chi hi (2Thess. 3:6-11).

Sawltak Paul in, nasepna a a thanopdan leh kuhkaldan a, amah etton a nei di’n Philippi saptuamte thuhilh hi (Philp.1:30; 3:17; 4:9). Joseph in, Pathian nasem a kingai in, milimbia Aiguptate leh a Inkuante dia ettontak in sem a, Pathian in pomtak sa hi (Gen.27-50). Daniel in, milim bia Babulon leh Persia gam adia a sep, Pathian nasem a kingai in sem a, Pathian adia Pomtak Biak Piakna chingzou hi.

Atung a Pathian Misiangthoute’n a omdan leh nasepdan uh Khrist Tanchin Hoih toh kituaksak in, Pathian nasem a kingai in sem ua, Pathian adia Pomtak Biak Piakna hinkhua in hing thei uhi (Philp.1:27).

Salam a Pathian Pomtak Biak Piakna ching: Pathian in, Silh-le-ten, Nek-le-dawn, Siamna-pilna, Neih-le-lam, In-le-lou leh Chidam-ludamna ah kiningchingtak in hon vualzawlta hi. Hiaite tengteng amah Pomtak Biakna i piakna vanzat dia hon piak (kepsak) vek ahi (Abraham, Gen.12:2). Phaltak a midangte piakkhiak di’n hon kemsak hi (1Tim.6:17-18). Sumlem in lawmte bawl un chih in, leitung sum leh neih-le-lamte vanzat dia zang genna ahi! (Lk.16:9). Atawm-atam gen lou a PHALTAK A PIAK Pathian in kipahpih a, Amah Pomtak Biak Piakna in simsak hi (Ets. Meithainu thilpiak – Mk.12:41-44).

Abraham bangkim ah kiman a, Pathian vanzat thupi leh pomtak suak hi. Peter, mimawl himahleh, bangkim nuse ngap a kiman in zui a, Pathian vualzawlna vanzat thupi leh pomtak hi kha hi. Dorca – Hausa/Thupi hikei mahleh, phaltak in midangte huhna nna sem a, Pathian in pomtak sa in, Laisiangthou a gen det di’n minloh hial hi (Nas.9:36-42).

Thukhitna: Pathian in nektakzonna hon piak a, Amah nna sem a kingai a, diktattak, muanhuaitak, thanuamtak leh siangthoutak a sem a, i Khalam leh Salam hinkhua amah adia Pomtak Biak Piakna ching hi ding in hon deih a, tua ding in khalam leh salam vualzawlna in hon vuk hi.

Noah in, Long apan a pawtkhiak a, a thilhih/nasep poimoh pen leh masa pen a a koih PATHIAN BIAKNA ahi. Pathian kipak mahmah in, Noahte Inkuan biakna pomsak a, vualzawlna tampi chiam hi. Noah leh Inkuante bang a, i nektak zonna leh nasepna, Pathian nna sem a kingai a, Pathian a masa pen a i koih chiang in, Pathian adia Pomtak Biakna Hinkhua in i hing thei dia, Mimal, Inkuan leh Saptuam a Pathian vualzawlna thupitak dongtute i hi ding hi. Tu kha thak ah, tua bang Khristiante hichiat ding in, Toupa’n hon vualzawl hen aw.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia