Editorial

LAISIANGTHOU, PATHIAN AW, HINPIHNA A PATHIAN POMTAK BIAK PIAKNA

“…noumau kikhem in ngaikhete leltak hilou in, thuzuite hizaw un” [Jakob 1:22]

Thupatna:
Tu khang hun a omkhate, i khotheih apan Pathian thu za, sin leh thei a om in, Pathian deihsakna hamphatna genvuallouh dongte i hikha hi. Jakob in a laikhak a a poimoh ngaih mahmah “Pathian thu a zatu kia hilel lou a, zakte a zuite leh hinpihte hih ding, leh Pathian thu za a, zui a hinpih tuanloute amau kikhem ahi uh” chih ahi. Tulai Khristian tamtakte’n Pathian thu chimtakhuai khop in i zata a, thei mahmah in, a gen leng i siam a, himahleh, zui a hinpih taktak ngap kitawm lua ahi diam hon chisak hi.

Khristian tampite eimah kikhem hilel i hi hon chisakte – Khami leh khalam a sang mahmah a kikoih, lah i kampau, omdan leh hindan a i khami louhdan im vuallouh a dawk zel. Pathian thutak, thudik leh siangthou gengen kawm a, tuabang a hinpih tuanlou zel. Kam a pianthakdan gen siam mahmah kawm a, piangthak loute omdan a hing lailai zel. Eimah kigen hoihhoih lehang leng i mimal, inkuan, khotang hinkhua leh thil tuahte’n i hihna leh dinmun diktak phoulak toutou ahihman in, eimah kikhemkhem hiding i hi hon chisak hi.

Tulai Khristian tampite hinkhua hiaibang lel ahihman in, Laisiangthou, Pathian Aw, hinpihna a Pathian pomtak biak piakna nei theilou in, i mimal, inkuan leh khotang hinkhua segawp in lungzinhuai mahmah suakta hilou hiam, hon chisak hi.

Laisiangthou, Pathian Aw, hinpih lou hinkhua in a tutte tamlou i taklang ding:

1. Laisiangthou sim ngeilou a, kitheisak tak a midangte sang-a a theizaw bang a gen thangsak. Hiai in thudik theiloupi a kiselna haihuai tun in, a ngaikhete adia siatna tun hi (2 Tm. 2:14).

2. Hindan diklou a tun (khosakna chidam lou) (Rm. 1:21-32; 1 Kor. 1:18,22): Pil kisa mahmah napi in, a lungtang uh mialgawp a, a taksa uh thanghuai tak a zang in, thil kilawm lou leh khelhna chiteng hih a zongsang in om uhi (e.g. tep-le-muam, nek-le-dawn, numei-pasal).

3. Laisiangthou thu sinsakna diklou a tun a, mi tampi a pikhial/mangthang (1 Tm.1:3-7; 4:1-5; 3-5):

3.1. Laisiangthou dau tak a ngaihna a tun (Liberalism = Ecumenism/Universalism)

3.2. Laisiangthou polam kilakna uangbawlna a tun (Extra biblical Revelation = Kha/ Pau tuam/ Mengmuh/ Experience thupi pen a koihna leh Kha toh kisai uangbawlna)

3.3. Dan hun a kiknawnna a tun (Ni tan-hun tan/Kithoihna/Kitenna, etc. (Jn.3:20; 10:4).

Laisiangthou sim i limsak gige ding ziak:

1. Jesu Khrist, Pathian Tapa a hi chih gingta a, a min a hinna neihna di’n (Jn. 20:31).

2. Pathian kilakna (mihingte houpihna) bukim sipsip ahihman in (Is. 34:16; Kil. 22:18f).

3. Pathian Kha a hatkhiak, banglam peuh a dia phatuam ahihman in (2 Tm. 3:16).

4. Khalam ann (Nawitui), bangmah toh hellouh (Hihnit nai louh) ahihman in (1 Pet. 2:2).

Laisiangthou limsak gige in a tut dingte:

1. Khalam a khangtou ngitnget hihna di’n (Hotdamna muh dong in) (1 Pet.2:2).

2. Hindan dik leh kilawm a hing a, Khalam mit vakna di’n (Sam 119:105).

3. Thutak thu diktak a zang thei (handle) gingtu hihna di’n (2 Tm. 2:15; Heb. 4:12).

4. Kha a dim (Pathian thu bang a hing), khang leh gahsuah hihna di’n (Eph. 5:18; Sam 1:1-3).

Thukhitna:
Laisiangthou, Pathian aw sim gige a, a deih leh lamette theichian a, thumang tak a zui a hing gige gingtu hih ding Pathian hon deihdan ahi. Horace Greeley, American Newspaper Editor khat in, Laisiangthou sim gigete lungsim leh hinkhua a salmat vual hilou uhi, ana chih dik mahmah ding hi. Diabol zekhemnate dou zou a, khalam a bah a puk lou a, khalam a pichin dong a khang a, gahsuah hi ding in KHA NAMSAU, PATHIAN THU niteng a la in sim gige lehang, Pathian pomtak biak piakna hinkhua in i hing thei ding hi (Eph. 6:11,13,17; Sam 119:82). Pathian Aw ngaikhia a zate kia hilou a, hinkhua a zuitute hiding in Toupa’n hon vualzawl chiat hen!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia