Articles | KTZ | EBC

UNAUTE KITUAK DIAMDIAM A OMKHAWM ANAK HOIH IN ANUAM MAHMAH HI

Simtute tengteng Jesu min in Chibai! EBC in Kum 2019 thupi a i neih “Pathian Pomtak Biakna” Romte 12:1 gendan tuamtuam tampi i na ngaikheta a ngaikhe touzel ding i hi. Kha lui September thupi etkikna a bangsim na a, khotang vai leh gam leh nam vai a kituah diamdiam poimohna sutkhawm leng uthuai ka sa hi.

I. Khotang vai tungtawn a Pathian Pomtak Biakna:

Sawltak Paul in Romte 12:9-21 a Khristian gamtat ding dan a gente viz. Itna lepchiahlou, kilainat tuah, kideihsak tuah, thadahlou a Pathian nasem, gimthuakna lam ah kuhkal, kiliansaklou, kituaktak a tengkhawm (Living in Harmony) leh adangdang kizui zou himaizen leh Toupa i khotang ah lungkim mahmah ding in i gingta hi. Avek a kikum man lou ding i hihman in Toupa sikha kumpi David in Sam 133:1-3 a a gen unaute kituak diam diam omkhop anop dan leh ahoih dan i enkhawm ding.

Chang 1- “Ngai in, unaute kituak diam diam a omkhawm a nak hoih in, a nuam mah mah hi”. Thil hoih tengteng nuam vek lou hi. Thununna leh Sawina a hoih mahmah hang in i thuaklai in nuam hetlou hi (Heb. 12:11). Thil nuam tengteng leng hoih vek zenzen lou hi (Pau. 25:16). Himahleh kituak diamdiam a omkhop tuh hoih leng ahoih a nop leng anuam hi. Laisiangthou siamte’n Kumpi David, a tapa Absalom in a doukhit a Israel nam 12 heutute’n David lam a pang a lalgam hong kigawm (unified) nung a a gelh hiding in gingta uhi. Kumpi David in a gintak thu gen hilou in a thiltuahsa (experience) gen ahi. Ahinkhua thiltuahte et in amah kan a kituahna nopdan thu gen dia kilawm zaw om din i gingta kei hi.

Chang 2: “Lu a thau manphatak, khamul a luangkhia, Aron khamul ngei a luangkhia bang ahi”. Exodus bung 29 na ah Toupa thupiak zui in Mosi in Aron siampu hidia sathau a nilhna i mu hi. Hiai thu mah David in a hong kamteh hi. Hiai thu apan sinlai la leng i chi ahi.

i) Pathian in Aron siampu hihna a pompih bang in kituak diamdiam a om tuh Pathian pompih gamtatna ahi.

ii) Sathau in gimlim a ensak hi. Thukhun lui a siampute sathau zat ngial gimnamtui chi 4/5 a kibawl gimlim mahmah ahi kichi hi. Mi kituak diamdiam a aomkhop chiang in kim leh kiang a omte a ding in leng a gimlim a mite ahip a etlah huai hi.

iii) Aron puanaktual in poimohna a nei hi. Israel nam 12te min teng toh kikhuikhawm ahi kichi hi. Unaute kituak diamdiam a i omkhop chiang in ginna a Israel suan tengteng a ding in leng let zungzung a kidaih gimlimna ahi.

Chang 3: “Hermon daitui chim zion tangte a kezel bang ahi; huai ah Toupa’n vualzawlna thu a pia a, khantawn a hinna ding ngei”. Israel a mual sangpen tuh Hermon mual ahi. Khokhal hun a tui kiningchin louh hun chiang in hiai mual apan vuktui hong luangsukte Jordan lui luanglut in Jordan phaizang leh Jericho gamkeu tanpha sunomtu in pang zel hi kichi hi. Kituak diamdiam a i om chiang in mite ading a vualzawlna nak kihi ahi chih hon sinsak hi. Toupa mahmah in kituahna omna mun ah vualzawlna thu apia hi. Toupa thupiak himhim tangtung lou omlou hi.

Romte 12:16 ah “Ngaihtuah kibang in omchiat un...” kichi pen English version ah “Live in Harmony” akichi hi. Harmony kichi tumging kammal (musical term) ahi. La aw khat hilou awkim (Suprano, contralto, tenor leh bass) a la kisa genna ahi. Kituaktak a tenkhawm theihna ding in mi tengteng ngaihdan kibang neih ding chihlam sang in ngaihdan tuam chiat nei kawm a Jesu Khrist a luangkhawm in kingaihniam a poimohna mun a kingainiam a kituak tak a khosakkhawm genna hizaw hi. Tulai i khotang dinmun lapawlsa toh tehkak bang hileng mite’n i lasak a ngainuam di uam hon chisak hi. I lasak in mite a hip nadiam chih kidot tham ching hi. I panna pawl chiat a i aw dawksak ut chiat in a sangthei pen a kikou chiat hileng i kilawm hi. Lapu omlou lapawlsa toh i kibang a, a ngaikhete a ding in aphuai mahmah kha ding i hi. Unau kituak diamdiam a i om chiang in i gim alim a, mite adin a etlah huai in abelhtak hi. Huai mah tuh Toupa pompih (approved) gamtatna ahi a huaibang mite Toupa vualzawlna in a ompih den hi. Michih in lam tuamtuam ah khotang chidam i hihtheihna ding in mohpuakna nei i hi chih phawk thak ni.

II. Gam-le-Nam vai tungtawn a Pathian pomtak Biakna: (Nehemia 1:1-11)

Nehemia Persia khopi Sushan ah a taksa om mahleh a lungsim Jerusalem ah om hi. A unau Hanania leh Juda mi khenkhat hong zinte apan Jerusalem ah Judate tanchin ana za hi. Gimthuak leh simmoh a om uh ahi chih a thei hi. Kulhbang omlou, kongpite mei in kangtumvek hi. Nidanglai in khopite kulhbang a kium vek ahi. Kulhbang neilou khopi tuh mite simmoh ahi. Melmate khut a puk gige thei khopi chihna ahi. Vengbittu neilou khopi ahi. A sung a teng numei naupang lungmuanglou a, huai khopi ah van manpha omthei lou hi. Eite lak ah leng Upate’n khonawl a naupang kimawlte apan khosung dinmun ding kitheithei ahi chi uhi. Jerusalem khopi kulhbang omlou bang in i khopi leh i minam sung leng bitlou in i om hi. Namdang gal lau hilou eileh ei kilau in galmuanglou in i om hi. I khopite ah kongkhak chabi kikalh dante apan in leng i bitlouh dan kilang hi. Mite simmoh leh deihlouh in i om hi. Tuma zek in Shillong ah College kai dia kuan in luah ding muzoulou Lamka mi ahihziak in chih thu a om hi. Kum tamlou paita inleng Assam gam ah Chingpi (Rhino) kap akimat chiang in i khopi apan leh eimi mahmah kitel theizel hi. Tulaitak in namdangte chiamnuih buk i suak ahi. Jonah in dotna poimoh lou tampi Tarsas lampi a a tuahna ziak i ngaihtuah ngei hia unau? Tulai namdangte’n Paite nam tung a ngaihdan a ut dandan ua abawl theih uh bangziak ahi di? Jonah bang a Toupa taisan i hihlam i lunggel ngei hia?

Judate tanchin a zak in Nehemia a tusuk a a kap hi. Jerusalem a it dan, Pathian mite a it dan Toupa’n a mu a, na thupitak semdin mohpuakna a pe ut ahi. Jerusalem tunding nawn nadia Jerubabel (Political leader) leh Ezra (Religious leader) in a sep maban uh Nehemia (Layman) sunzom sak ut ahi. I nam kulhbang lamkik nading in i politician-te leh i saptuam heutute kalsuanna i theivek kei a himahleh i theih khat a om a; i namsung chidam nailou ahi. Toupa’n nang hon ngak himaithei ahi. Nehemia apan sinlai 3 enkhawm le i chi hi:

1. Nehemia in muhtheih a kulhbang kichim pen aziak diktak tuh muhtheihlouh a Israelte leh Pathian kal kichip ziak ahi chih a theichian hi. Israelte lohsam dimdem uhi; kidouna ah, saltanna ah, thumanna ah, kulhbang lamna ah. Toupa thukhun pialsan uh a, milim biakna lam tuamtuam a neiden uh ahihman in Pathian in milim biakna munpi Babylon a pilut hi. Khopi insawng sang taktak omna khat ah insawng 42na ah lauhuai tham dia kikek (crack) hon mukhia uhi. Patau in Engineer a sam uhi. Hun bangtan hiam khit in building enkoltu Manager hongpai in sawng 42na delh pah hi. Himahleh huaimun ah Engineer pa ana omlou in in sawng 6na ah ana om hi. Sawng 42na kikek pen kipatna tuh sawng 6na ahi chih engineer pan theichian hi. Adiktak in sawng 6na a security guard pan amah in ah gari buk (garage) bawl nading in vante ana gukkhiakzel ziak ahi hi. Paunakte 16:7 ah, “Mihing lampite’n Toupa a suklungkim chiang in, a melmate nangawn amah toh kilem din abawl hi” chih i mu hi. Toupa i tung ah a lungkim leh melma nangawn toh hong kilemsak thei ahih lai a ei leh ei i kilem kei leh bel i lampite’n Toupa a lungkimsak kei chih a chiang mahmah hi.

2. Phun leh mi mohsa in Nehemia in hun a zang kei hi. B.C 516 vel in Persia kumpi Cyrus in Judate Jerusalem a kik phalna ana pia hi. Kik masate kiknung kum 90-100 vel bang beikhinta hi. Nehemia phun ut hileh aziak (reason) a nei mahmah hi. Jerusalem a tengten kum 90/100 vel sung in bang hih na hi ua chih a mohsak theih mahmah hi. Himahleh Nehemia in phun nading ziak a zong kei hi. Nam phunchiak leh heutu kimohsaktuah nam chikmah in kilemkik (reconcile) ngeilou a, kitungding kik omlou hi.

3. Pathian kia in huai buaina a vengsak thei chih Nehemia in a muchian ahi. Kumpipa zu pepa ahi a, kumpipa’n a muan mahmah kinaitak-a khosa khawm ahi uhi. Kumpipa toh a kinaihna uh (political affiliation) sang in Toupa toh a kinaizaw uhi. Kingainiamtak leh angmasial loutak in amite a ding in gensaktu thumna anei hi. Lungngai mahmah leh ginna thupitak toh thumna ngaihnop huai leh lohching Bible a kichiamteh khat a suak hi (Neh.1:5-11). A thu a zak pen Kisleu kha (Nov/Dec kha tehtuah) ahi a nasep apat hun Nisan kha (March/April tehtuah) ahi. Nasep apatma kha 4 vel (120 days) thumna leh an ngawlna hun a zang hiding a gintat ahi. Nasep ahon pat in Ni 52 in a zou ahi. Nehemia in Ni 52 project a neih kingakna (foundation) tuh Ni 120 thumna ahi. Nehemia thumna apan in sinlai tampi om in i thei hi. Eite leng i thum tei thou uh hilou maw? Jacob 4:3 ah, “Na ngen ua, na nget diklouh ziak un na mukei uhi, na nopsak bawlna ding ua zat na tup ziak un” a chi hi. Thum mite leng i kivel nading om kha ding hi. Mi kuahiam mohsa a Toupa kiang a ahinna bang le ladia ngen hial khop a i thum chiang a zaw Toupa’n honza theilou hikha ding ahi. Thumna kia hilou in amah mah hong kipan hi. I nam in Nehemia leh a formula zat i poimoh petmah hi.

THUKHITNA: Israelte kumpi gilou mahmah khat Manasi kichi ana om hi (2 Kum. 21). Kum 12 ahih in kumpi a pang ahi. Toupa deihlouh khelhna chiteng ahih a, Jerusalem a sisan a luang sak hi. Dawite bia in a tapa hial leng a lan hi. Manasi in Israelte a lampial sak ahi (21: 9). Hiai Manasi tuh Kumpi Hezekia tapa ahi. Pathian in kum 15 a hinna a behlapsak hunsung a ahinkhiak a tapa ahi. Evangelist minthang Billy Graham in, “Mi khenkhatte khovel ah a damsawt lawzen ua ahi”, a chi hi. Tunung chiang in khang thakte’n huai mipa/minu, huai inkuante khovel ah a damsawt lawzen ua, Paite nam hon lampial sak ahi chi a genkhak a i om ding lauh huai lua hi. Nam it i tam hiaihiai leh nam a dam hiaihiai ding tuh nam itna diktak gahsuah ahi. Himahleh i namsung dinmun i et chiang in lehpai hileh kilawm hi. Huaiziak in, mi khenkhatte’n i nam huchi lawm lawm in it kei zaw maileng i nam a damzaw diam chih lungsim a lian mahmah hi. 2 Kronikil 7:14 ah, “Ka minpu ka mite kingaineu a a thum ua, hon zon ua, a omdan giloute uh a lehngatsan uh leh van akipan in ka na ngaikhe ding a, a khelhna uh ka ngaidam ding a, a gam uh ka damsak ding hi”, a chi hi. Pathian in i gam damsak ut in hon ngak hi. A dam na ding a formula zuih ding hon hilh a ei i kiman hiam huai ding in chih mimal kidong chiat leng i chi hi. Toupa’n simtute hon vualzawl chiat hen aw.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia