Articles | KTZ | EBC

KHRIST NUNGZUIHNA

(Luke 14:25-35)

Khrist nungzuihna ah hatlouhluatna nei i hihkhak ding uh lauhthawngna lianpi ka nei hi. Tuakia hilou in Toupa Jesu’n Ama’ nungzui dia hon deihlou ahihkhak ding lauhuai mahmah hi. Tamtakte’n mahni deihna tanchiang kia a zui a, sup leh piakding omchianga zuilou zel i hihkhak ding zong lauhuai hi. Tuate teng khong veina toh Tanchinhoih Luke 14: 25 apan 35 sung pansan in Khrist nungzuihna toh kisai bulpi enthak le i chi hi. Bible Study pian in a bawngbawng in ka hon gelhsuk hi:

25 Huan mipi thupitakte a kiang ah a hohsam ua; huchi in amah a kihei a, a kiang uah,

25a: Toupa Jesu in thillamdang tampi hih khinta ahihman in, Judea gamsung muntuam tuam apan in mi tampi takte a kiang ah hong paikhawm uhi. Amaute bel - a thillamdang hihte en ut, hihdama om ut, neek-taak athawn a ne ut, Toupa Jesu kua hi hiam chih theichian ut, Pathian’ Tapa/zawlnei ahi chih gingta a a nungzui utte bang ahi uhi. Khenkhatte a melma bang, khente ama’ nungzui ut taktak bang le a om uhi.

Toupa Jesu huai lai in Jerusalem khua zuan a pai ahi a, mipi a zuite’n bel a kumpi gam tungding ding leh kumpi tutphah a tu dia gingta a zui a hilim uhi. Judate’n bel Messiah hong pai chiang a Juda Kumpi (Political Ruler) dan a hong pai ding, Jerusalem a kumpi tutphah ah tudia a lamet uh leh a kisinsak dan uh ahi. Tuabang lungtang nei uh ahihdan Toupa’n haihlou ahihman in a nung a pai mipite kiang a hiai bang thute gen ahi.

Chang 25a apan sinlai:

Toupa Jesu nung a pai kichi leh Toupa Jesu nungzui kichi kibanglou ahi. Tuni in eite’n Toupa Jesu i zuihna san enthak le ut huai i sa hi. Khrist Jesu nung a pai hinapi a a nungzui hihlouh khak ding lauhuai mahmah hi.

Tuma in heutute Dhemaji a camp nei di’n ava zin ua, a khomite inn khat ah ann ava ne uhi. A neek khit ua a pawt khiat uleh innkong ah mipi hunkhop ana om ua; upa leh naupang kigawm, innteekte kiang a “hiaite banghih ahi ua?” chi a a dot uleh innteekte’n, “mundang apan zin hong hoh uh chih a thei ua, tua zinte omna lamlam ah sa meh val omding ahi chih ngaihsun a hong paikhawm ahi uh. Sa khing ngak a om ahi uh” chi in a dawng uhi. Tuakia hilou in huaimun a va paikhawmte bel gingloute ngen hizomah uh hi.

Tuabang dan deuh a eilawi le Jesu i zotna san, saptuam i zopna san, Khristian i kichihna sante adik mah hia chih etthak poimoh hi. Khrist nungzui dia tuabang a kichiamna la i hi mah hia? Ahih keileh thildang lamen a la i hikha hia? Saptuam leh khotaang a minhoih deihna bang, neek muhna di bang, mundang a nasepna ah lamzanna di bang a Khrist nungzui dia kisa i hi kha hia?

Toupa Jesu nung a paite Toupa’n a thei a, a zuihna hang uh diklou tampi om ahihdan zong a thei hi. Eite leng mihing’ mai ah i hihna kithei pah kei lehang le Toupa’n i hihna diktak thei ahi. Tuabanga ki etthak zel poimoh ahihdan i gen bukim zoukei ding.

I kipatdan dik mahleh lamkal a lamhaih theih ahihman in, tuni in hiai Laisiangthou chang tungtawn in tulel a i dinmun velthak le uthuai i sa hi.

1. Toupa Jesu nung a pai tengteng nungzui hivek lou
2. Jesu thupiak toh kituaklou lametna nei a a nungzuih khak theih
3. Thupiak toh kituak a zui hinapi a lamhaih khak theih
4. Dinmun kiveel thak zelzel poimoh lua.

Hiaite tengteng ban ah belampu leh makaite adia poimoh mahmah khat enlai le i chi hi-

*Toupa Jesu nung a paite a tam ua, a husa uh le ngaih mahmah di’n a gintakhuai hi. Tuahun laitak a Jesu pen ei di bang a i ngaihsut leh; lungkim huai mahmah leh kilawm ka sa hi. i nung a mi pai dupdup, i thugen za ut, i thillamdang hih mu ut, i mel maimai le mu ut a hong paikhawm mipi huaizah om himaizen a.

Saptuam i kepna ah i nung a paite etthak zel kul ahihdan Toupa’n hon sinsak hi. Thugen chiang a kikhawm bang tam dupdup, i thil hih peuh saptuamte’n hon paakta, hon deihsak hunkhop nei chihte khong ziaka nnahoih sem leh lohching bang a kingaihtuah khak ding lauhuai mahmah hi. Mipi tam ziak bang, pahtat loh ziak bang a khemzoh a omding hilou ahi. I ministry ah nungzui hau mahmah, saptuam kepte kikhawm hoih mahmah himahleh a sunggil a a dinmun uh theihchiang hetlouh omkha thei ahihman in kiveel zel poimoh hi.

Hiai bangteng chang khat (a) na apan i sinkhiat theih ahi.

25b na ah “huchi in Amah a kihei a, a kiang uah” a chi a; a kihei a chih pen saulou in veelchian le uthuai ka sa hi. A greek pau ah strepho chi in a kigelh a, tua bel kinunghei/ lungsim ngaihtuahna khek chihna dan ahi.

Toupa’n tuabang mipi lamet leh ngaihtuahna tuamtuam neia zuite a itdan leh pampaih lou ahihdan a langsak hi. Ahangbel, ut hileh bangmah genlou a paisuak thei hi a, ut hileh nungzuihna lampi diktak sinsak lou a a nasep di sem thei thamtham hi. Himahleh Toupa’n a melma te hi in a theikhialte hitaleh itvek ahihman in, a lampai lai khawl phot in- tuabel- anasep lel pen khawlsan phot in- a nung a paite nungzuihna lampi dik a sinsak hi.

Eite ading in hiai thumal “a kihei a” chih lungdam huai/hamphat huai mahmah ahihdan i theihchet kul hi. Saptuam sung a kizang mahmah i hih lai in Toupa hong ki nunghei a nang kiang/kei kiang a gennop nei hikha ding hi. Nungzui muanhuai i kichih lai a Toupa’n “Bawite, na lampi zuih uh enthak un” hon chi nuam hikha thei hi.

Toupa Jesu’n huai hun laia a nung a paite a ngaihsak a a sinsak bang in eite leng hon phawk lai hi.

Eite zong tuahun lai a mite bang a Toupa’ sinsakna poimoh thakthak kihi ahi.

Tuamah bang in, i kep saptuamte zong i nung a pai ahihman un khatveivei kinung hei a a dinmun uh veelthak, sinsak thak zel poimoh uh ahihdan phawk thak di’n i kichial hi.

Ahihleh mipite kiang a a sinsak bang ahia? Tamtakte adi’n i simsim sa, i veelveel sa, i suutsuut sa, i zuih lellel zong hikha ding hi. Tuni in bel a thu suutthak in Toupa’n nungzuihna toh kisai a a gennop enthak le lunggulhhuai ka sa hi. A zui lelte ading in thathak lakna a zui zounailoute ading in kipatna hong suak leh chih i thumna zong ahi.

26- “Kuapeuh ka kiang a hong pai in, a pa, a nu, a zi, a tate, a unau a sanggamnu, leh amah hinna nangawn a huat kei leh ka nungzui ahi theikei ding. (Matt. 10:34-39; Gen. 29:31; Exo. 20:3-5; Rom. 9:13; Mal. 1:2).

Hiai thil atun laitak lungsim ah ngaihtuah sin mah le uthuai ka sa- Jesu leh a nungzuite kilom khawm deuh a pai, mipi tamtakte a nungdeuh a pai, Toupa Jesu kinunghei guih a hiai bang thu gen. Judate tawndan ah innkuan leh innsung kichi poimoh mahmah hi a, innkuan leh beh-le-phung ngai poimoh mahmahte hi ua, lah Toupa’n hiai bang genkhum ek mawk hita. Dai khepkhup mai di’n a gintakhuai hi. Lungsim a ngaihtuah in bel, hiai mipa mawngmawng a ut-ut mawk gen hi chih khak baihlam mahmah leh kilawm hi.

Simzual in bel, thil haihuai leh mullithuaipi khat abang hi. Huai mipa zuihna dia i it leh i ngaih teng huat di chihpah mawk pen thil hithei le ahidia hia? Toupa’ gen hiven a didan khat om nave chih mai di adiam ah (chiamnuih).

Hiai chang ahi bangbang a letsuk ding hile innkuan sung a kihuatna leh kimelmakna Toupa’n hon sinsak chihtheih ding hi.

(Sutzop ding)

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91 8259014118
Email: [email protected]
Locate us

MINISTRIES

© 2019 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia