General News

Youth Centre hon in om

Tuailai pawl kiphuhkhiak nung kum 50 a chin toh kituak a Baptist Youth Fellowship in Jubilee kum chiamtehna ding a “BYF Golden Jubilee Youth Counselling Centre” bawlkhiak ding chih CEC/Khawmpilian in thukimpih in tuni November 8, 2016 zing dak 7:00 in Ophel Building, Ground floor, Central Lamka ah a honna neih in om hi.

Hiai hun Youth Coordinator, EBC in makaih a, Director Missions EBC in hunpatna thumna nei in Centre hong piankhiakdan tomkimtak a genna Director of Ministries EBC in nei hi.

Centre honna leh Pathian kiang a latna Rev. S. Vung Minthang, General Secretary EBC in nei a, tuazoh in Chairman CEC leh Chairman CBYFSc in thugenna tom neituak ua, Upa L. Velson in thumna toh hunkhak hi.

Chairman CBYFSc in a thugenna ah, Heb 5:2 leh Sam 23:3 Siampulian Jesu Khrist counselling muanhuai pen ahi a, hiai counselling centre in atup "to restore the losing soul and body" ahi chi hi. Khristian Tuailai Pawl (BYF) October kha 1965 in Hiangtam Lamka ah muhkholhna nei Heutu ten ana pan uhi. Kum 2015 in Golden Jubilee thupitaka lawm ding chi in i kisa uhi. Himahleh Pathian in ei adia hoihzaw gel ananei ahingei dia i gam buaina ziakin i zangthei kei uhi. I zattheih louhna ziak leh i gam buaina ziak uh; i lak ua diktatna leh thutakna atawmluat ziaka kuamah Heutu leh makaite natawm kimuangngam omlou, chih ahi. Miten Jubilee building leh Jubilee suangphuh thupitaktak aphuhlai un eiten huaibang hihthei dinmun ah i dingkei uh chih ngaidan neih ahi. Hiaite tengteng ngaituah kawmin leh tukuma i thupi uh azazaw a puanzak na ding in- Tuailai 1434Pro i pan uhi. Huai banah, hiai mipi laka thugen zakhalou akilkhat ah; kingaisia, lungkia leh mangbat ziaka amau hinna analate awlmoh na in ziak in Counselling Centre panni chi in CBYF meeting ah kigenkhawm hi. Himahleh hiaite sepsuah nangin Heutu liante phalna leh khawmpilian thupukna tan poimoh ahihna ah akul leh poimoh banga pan hongla Heutu te tung ah CBYF leh Tuailaite tengteng sikin kipahthu ka gen hi. I Tuailai ten haksatna atuah ziak uh; innten-louten ah tua stage omlel leh mabana hongpai didan Rural to Urbanization to Cosmopolitanization ahihman in i lak uah tu leh tunungin hinkhua a miphalou a kikoih leh kingaisia tam deuhdeuh dinga, tunung in counselling centre kia hilou recreation centre leng i poimoh hun uh hong om ding hi. Huaibanah, tuni a i honkhiak counselling centre pen ihihkhelh leh tununga Saptuam zahlakna munpi hong hithei ahih man in michih leh saptuam chihin i thumna uah delhzui gige ni, chi hi.

 

 
© 2021 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia