General News

SAPTUAMTE KIZAKSAKNA

SAPTUAMTE KIZAKSAKNA
March 19, 2020

No.EBC/GS/1(01)/20: Tulai a leitung pumpi huap a natna hileng COVID-19 (Coronavirus) toh kisai EBC heutute’n genkhawmna nei in Saptuam mite haksatna lak a Pathian deihdan a i om ding deihna in anuai a bang a kizaksakna bawl ahi (Vide EOM 512nd Resln. 5, dt. 19-03-2020):

1. Pathian’ Khamuanna toh om ding: Patauh thoh (panic) lou a, Bangkim tunga thunei Pathian nei i hihna phawk a khovel piak bang hilou Pathian apan khamuanna toh thum kawm a om ding in i kichial hi.

2. Pilvanna toh vaihawmte thuman ding: Pataulou chi a pilvanglou leh kikemlou a om pen mi dangte a dia vualzawlna hilou a, natna leh sihna tan tuntu hihtheih ahihman in ei hoihna ding a nasem vaihawm thunei government thusuahte thuman ding in i kingen hi. I omna mun dungzui a mimal, inkuan leh mihon kikepna ding thusuah om a, tua dungzui a nidang a ihih bang a biakkhawm leh kithuahkhawm lemtanglou omkha thei hi. Hiai bang aloutheilou hihna a om hial leh leng mimal, inkuan leh Immanuel Pathian toh manphatak a kithuah khawmna hunlem zang ding in i kingen hi. Huaiziakin, tualsung saptuam heutute’n thumkawm a, i omna mun toh kituak a panla chiat ding in i ki theisak hi.

3. Itna thupiak mangngilhlou ding: Hiai bang a pilvan poimoh hun ah, Pathian itpen ding leh ei i ki-it bang a invengte it ding thupiak thupipen ahihna phawk poimoh i sa hi. Khalam-salam dangtak lai a tui pe ding, gilkial lai a ann pe ding; a poimoh leh melnihna tan pai ding, pilvanna dingte a pilvang kawmkawm a panpihngaite panpihtu ihihna mansuah louh ding ahi. Patauhna toh kidim mite a ding a bitna leh damna kim omna Jesu Khrist theihpihtu i hihna ah huai hunlem om mangngilh louh ding ahi.

4. Thumsak ding: Hiai natna ziak a lungdong tak a omte, lusun inkuante, damlou kemtu Doctor leh Nursete, natna dalna ding damdawi muhkhiak sawm a panlate leh hiai natna apan bitna leh a sukkhak buaina omtheite enkai dia panla Government, NGO leh Saptuamte ading in naksem in thumsak ni. Huai ding in, March 29, 2020 (Nipini) a Tualsung saptuam chih in eimah lemtan bang a thumna hun zang chiat ding in i kitheihsak hi.

Saptuam te’n, chiklai peuh a hon ompih gige, I thiltuah tengteng hon theihpih gige, itna a dim Pathian nei i hihman in, “Mial a hii leng (pestilence) na lau kei ding a,… na sik ah sang (1000) a puk ding ua, na taklam ah sing (10000) a puk ding uh; himahleh, nang hon naihkei ding hi….hii (plague) himhim in leng na puanin a hon naih sam kei ding hi. Na lampi teng a hon humbit ding in… Angelte thu pe ding ahi ngal a!” (Sam 91:1-16) chi a hon khamuanpa i Pathian khut hat ah kitulut chiat ni. Saptuamte Toupan bit leh chidam in hon kem hen!

 

Sd/- Rev. S. Vung Minthang
Director of Ministries

Sd/-Rev. Paukhanmang Guite
General Secretary

DOWNLAOD PDF

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Locate us

MINISTRIES

© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia