Reports | KTZ

Reports

KIPAHTHU GENNA:
Division Missions Committee, Lamka North Division in February 3-7,2020 sung Himalayan Mission Field (HMF) vehna neih ahih hun a, EBCC Dimapur Pastor leh Saptuamten singpi leh sang limtak toh honna vaidawn ban uah Heutupa T Ginvanglian in honna makaih in train station tan hong kha hi. NEBC Buttabari Saptuam in nitak ann limtak honna bawlsak ua, biakkhawmna hun nuamtak hon neihpih ban uah giahna ding honna lemgel sak uhi. Rev Lalmalsawm, Field Superintendent, HMF leh Rev Dilip Kumar Samal, Asst. Field Superintendent ten a poimoh bangkim honna saisak ban uah Field Workers Empowerment Programme ah hun manphatak honna bawlsak in Nepal Gam map hoihtak honna present uhi. Field Sub-Office apan veh phak NEBC Saptuam omte: 1) Chisang, 2) Pathari, 3) Damak, 4) Padajungi, 5) Dharampur, 6) Haldibari leh 7) Budhabari ten nek leh dawn a hon kithuahpih ban uah a nam dial uh (Khada) honna baatsak chiat uhi. NJP apan Guwahati a kikna ding Rel (Habibganj) dakkal 20 val a delayed man in nawngkaina lianpi hong om hi. Himahleh EBCC Guwahati a Pastor Thangbiaksang, Local Chairman Upa Lianzachin leh heututen zanlai chilou in honna vaidawn ua, nuamtak leh tawldam tak in honna zintun uhi. Heutupa Siamzamuan Valte in lenna ticket hihhing sak theih hon neih man in kithawnsen vek lou a suak hi.

Hiai Pathian leh Saptuam min a kalsuanna hun a honna kithuahpihte tung a kipak lua ka hi uh chih Khristian Thukizakna tungtawn in ka hon taklang uhi. Na hon gimpihnate uleh sennate uh Pathian in a leh tampi in hon vualzawl leh chih ka thumna uh ahi.

Sd/-
Upa V Doukhanson
Chairman, DBMC,
EBC Lamka North Division.

PATHIAN LEH EBC TUNG A KIPAHTHU GENNA:
Amasa in, i biak Pa Pathian leh amah vang a Kum 40val sung hon kem Nu-le-Pa munchih a om EVANGELICAL BAPTIST CONVENTION tengteng na vek un Karbi Anglong Evangelical Baptist Convention nuai a om Saptuam 9 leh Fellowship 7 a kipan a itna Chibai ka hon buk hi.

KAEBC ki-inntuanna khawmpi thumnate, thale-zung tampi seng a kisakkholhna toh khawmpi Programme thupitak a neih ding i kisaklai in, melmapa Setan in nakpitak in hong dalsawm in sihna manna tanpha hong tung mahleh Pathian in lamdang tak in hon makaih a khawmpi hon zang zou sak tak ziak in kipahthu i gen masa a hi. Huan hiai Khawmpi ngai poimoh a hong uap leh hongtel EBC Saptuam a kipan Dorcas Hall a heutute, Division level a heutute leh local a heutute ban ah EBC Central Choirte leh kuapeuh na vek ua tung ah kipahthu ka hon gen tuantuan hi.

KAEBC Intuanna hi, field mite utna ziak hiam, Dorcas Hall a i heutute utna ziak hiam hizenzen lou ahi chih ka chiang mahmah uhi. Ahihleh KAEBC bang in hon intuansak hiam i chihleh, hiai lam ate ana muhdan leh ana theih dan hiai bang ahi. EBC Saptuam hi tup-le-ngim kichiantak leh Policy hoihtak nei a mailam a saptuam neitu Pathian toh ton a kalsuan Saptuam ahi chih ka chiang uh ahi. Tua ahihman in, i Saptuam Policy in hon intuansak hizaw ka chi uhi. EBC in Mission Policy himhim a etkol fieldte Toupa Jesu Khris hongpai matan enkol ding chihna omlou hi. “Field mite amau leh amau kimakaih thei dia sinsakna pia in, fieldte amau khe a dinsak ding” tua dan ahi i paipih. Huaiziak in Karbi miten EBC ngai nawnlou, ahikeileh EBC in Karbi mite a it nawnlouh ziak hiam hilou ahi chih ka mu chiang uhi.

Bangteng hileh KAEBC sik-le-tang in kipahthu Pathian min thupina ding in ka Nu uh leh ka Pa uh EBC tung a genlou theihlou in ka ngai ua, kipak lua chih kammal khat bek hon gen leng chi in Khristian Thukizakna ah hon gelh ka hi. Kum 1976 a kipan 2020 tan in chu kum 44 bang pha ahi a, kum 43 hoihtak ching chihna ahi. EBC in khalam a na tate na etkoldan thupi ka sa law mahmah mai ua, kam a gensiam thu a gen ding hileh genkhiak theih vual ahikei ding. Huaiziak in ka kipak mahmah uh chih tomchik in KAEBC sik in kipahthu kon gen hi. Dorcas Hall a kipan a gam mite tutpih a khalam salam na hon makaihna, 1975 a kipan heutu na hon sawlna a kichiamteh dan a FS 22 phazou ahi a, tua FS te tel in missionary mi 70 phial phazou hi, thupi mahmah! Huaiziak in EBC tung a ka kipahna uh alian mahmah hi.

Kum 43 sung Karbi mite adia EBC in mittui, naptui tampitak seng a hon thumpihnate, tha-le-zung, neih-le-lam leh hun tampi hon piakte manpha ka sa mahmah uhi. EBC Saptuam tungtawn in Pathian min ka phat uh ahi. Khalam a kou na tate uh tungtawn in tasawn tusawn tampi nei thei Nu leh Pa a ka hon neihkhak hi hampha ka kisa uh kia hilou in manpha sa in ka kipak law mahmah uhi. Pathian min phat in om hen. Kum 43 na hon kepna sung uah, Nuching Paching te mah bang in, itna toh, lainatna toh ahih keileh thuaksiamna toh, it theih dingdan a ka omlouh lai ua na hon it teitei nate, hehpih theih dingdan a ka omlouh lai hun un leng na hon hehpih teitei nate ka ngaituah chiang in na dohzohnate uh thupi lua hi.

Kum 43 na hon kepna leh na hon enkolna sung ua na tate thulimlouhnate khempeuh Pathian min in KAEBC sik in na hon ngaihsiam leh na hon ngaihdam ka hon ngen hi. Mihing dan a, a piantung a kipan a piching tan a, Tate kep kichi kep a omte sang in kemtute tate kepna toh kisai bangchituk a haksa leh anuam chih ka thei uhi. Huaiziak in azu-aham EBC in Pathian gamthu ziak a taksa mahmah a na hong thuaknate, mel-le-puam kilamdang zen a na hon etkolnate leh hun nanung a Karbi Mission field adia hinna tanpha hong kipiaknate ka ngaihtuah chiang in thupi in manpha ka sa a hon chou mahmah hi. Huaiziak in kum 43 sung Karbi field adia EBC in anasepte tungtawn in thupina pahtawina tengteng i biak pa Pathian in tang hen.

EBC HQtrs tungtawn in Karbi field intuanna kipahpihna thilpiak tuamtuam Kum 40val naungek kep a na hon kep khit nung un, KAEBC khawmpi hun a, Divisionte, local Saptuamte leh mimal malte a kipan sumtang leh vante huhna leh deihsakna ban a thumsakna tampitak ka dong lai ua, hiai bang itna thilpiak or huhna tampite ziak in kipahthu i KTZ tungtawn in kon gen uhi. Pathian in karbi field adia nasennate, na tawlnate aleh tampi hon din henla hon vualzawl chiat hen. I biak Pa Pathian in thupina leh Pahtawina tengteng tangta hen aw.

REV JAMESON BEY
Executive Secretary, KAEBC

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Locate us

MINISTRIES

© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia