Innsung Thu | KTZ

InnInnsung Thu | May 2020

ONLINE SERMON OM GIGE
Khovel pumpi in Coronavirus Pandemic Hipi thuak a pumbuai vengvung ziak in kuamah nasem thei lou in March 22 akipan India pumpi lockdown in om hi. Himahleh hiai hun sung in EBC Dorcas Jubilee House Mini Auditorium akipan in online live sermon khahkhiak in om thei hi. Hiai sermon tungtawn in mi tamtak in pianthakna leh Pathian naih a kibawlthakna nei uhi. Buaina namenlou i tuah lai in Khasiangthou in hong veh a, Pathian in eilam hon en lai hi, thupi in kipahhuai mahmah hi. Hiai lai gelh ahih ni tan in khovel ah coronavirus case veithak zah kibehlap lailai hi. Hiai bang haksatna tungtawn a hon sam lailai, hehpihna kong hon honsak lai i Pathian limsak lou a omte ading in sapna dang omnawn lou thei ahi. Jesu Khrist tuak ding in michih kiman chiat leng uthuai mahmah hi.

EBC CENTRAL CHOIR IN LA THAK NIH KHAHKHIA
EBC Central Choir-ten Pathian gam nasepna hi ding in EBC Official YouTube channel ah Phatna lapawl nih “Tua Huan Sung (BL. No 106)” leh “Nang leh Kei Di’n (BL.no 389)” te date 10 leh 12 in khahkhiakna neita uhi. Pathian in Central Choir leh a late uh vualzawl in a ngaikhate’n khalam vualzawlna tamsem a ngahna uh suak leh chih i thumna ahi.

SUM MUH MASAKPEN PATHIAN GAM NASEPNA DIA PIA
Mr Suan Muanlian Tonsing s/o Upa T Khamzagou, EBCC Dimapur Nagaland a om in July 2019 in ‘Junior Research Fellowship’ (JRF) a na gelh ching in tu’n Fellowship UGC hong om panta hi. Tua Fellowship a sum muh masakpen Pathian gam nasepna a poimoh bangbang a zat ding in pia hi. Pathian in makaih in vualzawl zel hen chih i deihsak hi.
Unaupa S Ginsonpau s/o Upa S Langkhotuan in Manipur Police Department nuai ah sepna mu thak a, Pathian kiang a kipahthu genna in EBCC Mata Mualtam ah a loh lak masak pen pia hi, Pathian in makaih in vualzawl zel hen chi’n i deihsakna i lan hi.
Mr Kamsianlal s/o Pauchinsuan Hatlang EBCC Vaikhawtlang Mizoram in Assam Regiment ah sepna a muh thak ziak a Pathian kiang a kipahthu genna in Saptuam ah hiaite pia hi. A kha khat loh leh PA System @ Amplifier 1, Sound box 2, Microphone 1. Toupa’n ompih in vualzawl zel hen

EBC DORCAS HALL STAFF QUARTER DING HONNA LEH LATNA

March 31, zing dak 7:00 in Rev K Kamchinkhup Director of Missions in EBC Centenary Hall khang a Dorcas Hall Staff te quarter ding kilam nihte honna leh latna nei hi. Hiai quarter-te ah semtu Pa Zampu, Driver leh Pa Velbiaklun, Grade IV te’n luah uhi. Hiai quarter-te Supplementary Budget pansan a bawl ahih toh kiton in Rs. 27, 95,276/- seng a kibawl ahi.

REPORT LEH THUMPIH DIA NGETNA
Amasa pen in i Hondampa Jesu Khrist min in Bethel Home Mission (BHM) innkuante’n itna chibai kon buk uhi. Toupa hoihna hang in Amah nna tuni dong sem thei lai dia i hinna hon na kepbit lai man in zong Toupa tung ah kipahthu i gen uhi. Ban ah noute itna leh deihsakna tuni dong ka tang ua Toupa min in kipahthu k’ong gen hi. Toupa’n pha ahong sakpih leh tukum in le naupang kilakbeh sawm ahihman in ahong pai theihna ding un thum ni. Hiai natna (COVID-19) hilengte lak ah Pathian in khamuanna leh lungmuanna hon pe chiatta hen. Kha lui ni 18-22 tan Kangkon khua ah hotdamna chialpi nei in ka kuan a, Pathian ompihna toh manphatak in ka nei thei ua, Toupa tung ah kipahthu gen ni. Hiai chialpina a kimuhthakna neiten Pathian kha thopna a tandet theihna ding un thumpih ni. A niteng nekzonna uh haksa mahmah hi. Nikum in zusa in haichi teng a suksiat man in buh nei omlou in hehpihhuai mahmah uh. Nakpitak in thumpih ni. Ka kipak.

B. Pauven leh innkuante
Bethel Home Mission

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Locate us

MINISTRIES

© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia