Gammial Aw | KTZ

Gammial Aw | May 2021

Amasa in Gammial Aw simtute tengteng i Toupa leh Hondampa Jesu Khrist min in chibai aw! Toupa’n field i neihte leh pangkhawm a pawldang toh i sepkhawmna a semtute tungtawn leh A misiangthoute thumna ziak a gah hon piakte hiai anuai a bang in enkhawm nawn ni.

A. HIMALAYAN MISSION FIELD

KIPAHTHU GENNA LEH THUMNA DINGTE:

1. March kha sung in semtute tungtawn in gingthak 7 leh baptisna tangthak mi 4te ziak in kipahthu gen ni.

2. Headquarters, Divisions, Local Saptuam leh mimalte tungtawn a Field sung a nna poimoh taktak sep a omte leh vanzat poimoh station a ding kipe zelte ziak in kipahthu gen ni.

3. March 18 & 20, 2021 in Taplejung ah Apologetic Youth Seminar neih in om a, semtute tel in tuailai mi 50 vel in hamphatpih uhi.

4. Phidim a i saptuam gam ah semtu quarter ding leh biakinn poimoh kin ahihziak in March 02, 2021 in nna sep pat in om hi. Tua zoh in, inn lam pat in om ngal a, April 09, 2021 in Quarter dia kilam latna Area Pastor T Ginkhozam in neita hi.

5. April 04,2021 sunnung in Taplejung a Jail vehna Field Dorcas min a Area Pastor, semtute leh gingtu mi 09 te’n a neih hun un puankhuikhawl, guitar, volley ball, Thukhunthak bu leh gospel tracts tuamtuam leh dawn ding theitui va puak in Pathian thutak genna nuamtak in va neithei uhi.

6. Tuailai Laisiangthou sinnuam piak a omzel i hihman in kipahhuai i sa hi. Tuabang mi 7 tukum session a lutthak ding ahihna uah, nawngkaina om lou a amau mimal leh a kaina ding uh lemtang ahong omna ding in thum ni.

7. Nepal sung a i sepna station thak, Gaur mun apan gamla lou ah gingtu inkuan 5 om ua, tuate amun mah a kep hoih sakna om ahihman in Pathian hon pina ding in thumna in ngen ni.

8. Nepal sung a survey i bawlna mun 2; Kapilavastu leh Birganj munte etlahhuai mahmah hi. Pathian in tua munte a septheihna ding kong a hon honsak a, semtu ding leng hon piak na ding in Pathian kiang ah thumna in lan ni.

9. Mr. Paul Gautam, Bhuttabari Saptuam apan tuailai Bachelor of Theology sin i neih ahi. Lockdown ziak a bangtan hiam class la theilou a om, April 07, 2021 in a kaina Northeast Theological Seminary ah lutnawn hi. Kha 3 sung tuabang a kaizoh chiang ua, graduate thei ding a lamet ahi. A sinlai ahon zoh theihna ding in thumpih ni.

B. DHEMAJI MISSION FIELD:

KIPAHTHU GENNA LEH THUMNA DINGTE:

1. Mrs Oitoporba Chintey, thagui ton ziak a pai theilou thumna tungtawn in paitheita in biakin zuan zouta ahihna ah kipahthu gen ni.

2. Hun sawttak mimal kal kilemlou a om Mr Keshav leh Mr Baskar Panginte, Evan. Haukhosiam Guite makaih in kilemna bawl theita uhi. Tu’n khat leh khat kingaidam in biakna nuamtak nei khawm theita uhi.

3. Lachangaon a semtu Quarters zohsiang ahih ban ah, semtu a luah dingte’n kipaktakin luahta uhi. Toupa gam nasepna ah nuamtuam sa mahmah uhi.

4. March 2021 khasung in i sepna gah uh baptisma tangthak- 10, Saptuam dan a kiteng thak kawp-3, naulat-2 leh sawm-a-khat pethak-2 te ziak in kipahthu gen ni.

5. Mrs Bobita Doley (Dimoruguri khua) in Jesu Khrist sang in baptisna tang nuam mahleh a pasal in naktak a adal man in tuni tan piak in omtheilou hi. Pathian in a pasal lungsim a hon kheksakna ding in thum ni.

6. Mun khenkhat a i gingtu hisate kikhop thadah mahmah simpawl om uh ahihman un amaute’n khalam kipahna thak hon ngahna ding un thumpih ni.

7. Toupa’n gingthak mi-10 hon piak, baptisna tangte khalam a hong pichin theihna ding un thumpih chiat ni.

8. Field in hunlem masa pen ah Lachangaon area ading in Salvation Camp sai sawm uhi. Pathian’ kha vehna tang a lohching leh gahsuah tak a sai ahih theihna ding in thumna in phawk ni.

9. Field sung ah semtute’n a houlimpih uh mi bangzah hiam tak om lellel uhi. Amaute a min un ki genvek zoukei mahleh Pathian hing hon muhchianna ding uleh sahkhua dik hon lunggulhna ding un thum ni.

10. Tulai a taksa damlou tuamtuam nei Evan. Haerbaswar Ngate, Mrs Pluto Pegu (brain tumor), Miss Priyanka Pegu (lungsim lam buai) te thumpih ngai mahmah uhi. Pathian hihdamna hoihtak hon ngahna ding un thum ni.

11. May 06 - 08, 2021 sung Missionary day leh Tualsung Mission Khawmpi kithuah EBCC Hiangtam Lamka a om ding ah Rev T Thangzasiam, Field Superintendent in thugenna hun zang ding hi. Hiipi leng nuai a om i hihman in Pathian deihdan ngen in thum ni.

12. Tukum naupangte’n a maban chiat uh sunzom in school lut nawnta uhi. Covid-19 second wave kigen vengvung kal ah a kuapeuhmah Pathian venbitna ngen in thumzom zel ni.

13. Field Working Committee, Dhemaji Missions Field in tu Financial year 2021-2022 sung a muhsuah ding leh zatding budget `,11,75,000/- (Rupees Eleven Lakhs Seventy Five Thousand) only pomna nei uhi. Pathian gam nasepna a muhsuah ahih theihna ding in thumna ah phawk ni.

C. MANIPUR MISSION FIELD:

KIPAHTHU GENNA LEH THUMNA DINGTE:

1. Toupa’n March kha sung in Semtute tungtawn in piangthak, Baptisna tang thak, Sawm-a-khat pethak, leh Mimal missionary vakna apang thak hon piakte ziak in Pathian kiang ah kipahthu gen ni.

2. A vualzawlna salam leh khalam a hon tansak gige ziak in Toupa tung ah kipahthu gen ni.

3. Tangthupha gen a khamangthang matna nasep sutzop a omtheih lai ziak leh semtu ginom leh chihtaktak a nna semte ziak a masawn zel i hihman in kipahthu gen ni.

4. Tatsat lou a, itna khitui toh thumna a ana pang gige saptuam mite ziak in kipahthu gen ni.

5. Semtute’n Pathian thu a lunglut mi 29 apaisa March kha in i nei hi. Itna toh bohzui ahih ua, counseling hoihtak a neihpih nung a khelhnate kiphawk a, kisik lunghei a Jesu a Lal leh Hondampa ding ua ahong san theihna ding un Pathian khasiangthou ompihna, vehna leh thopna ngen in thumsak ni.

7. Field Office a Office Assistant na mohpuakna lenthak Evan. Kh Binoy thumpih ni. Pathian in hihtheihna, pilna, leh sepsiamna a piakna ding in thumpih lai ni.

9. Thoubal saptuam a member 209te biakin a tazoulou in kekna nasep laklohtak in dinkhawl uhi. Toupa’n a vualzawlna a piak a huhtu ding leh deihsaktu ding a piakna ding in thumna ngetpih ni.

10. Field BDFC te’n Anngawl thumna khateng kiginni 2na in saptuam 2/3 kigawm a neih touh sawm uhi. Toupa kha ompihna tang a, sawm ahih bang a lohchingtak a sepsuah ahih theihna din thum ni.

11. Field in tukum kisinsakna atamthei lam kipiak sawm uh ahih bang in Field Superintendent in khateng fellowship lemtang a la a saptuam kivaipuak dante sinsakna piak zel sawm hi. Toupa kha ompihna ngetsak ni.

12.Semtute’n target, budget leh goal setting local chih a abawlte uh ahon seppichin theihna ding un Pathian vualzawlna ngen in thumsak ni.

13. Field BYFC in kumteng a Gospel Youth Camp asai zel uh tukum in Tamnapokpi ah March 29, 2021 ni kia zat in om hi. Tua hun in, tuailai 268 paikhawm thei ua, thugenna thumvei om a, choreography leh Bible quiz competition chihte neih in om hi.

14. Field in Office Building First Floor bawlna ding Rs. 5,00,000/- (Rupees Five Lakhs) only Joint Project in nei uhi. MEBC member chih in Rs. 100/- chiat thoh ding in thupuk uhi. Huchih lai in EBC Headquarers huhnate zang in nasepna nasatak in pai lel hi. Lamzangtak a na sepnate zoh ahong hihna ding in thumna in phawk ni.

D. INTERN MISSIONARYTE TOH KISAI

KIPAHTHU GENNA LEH THUMNA DINGTE:

1. EBC in Missionary nna sem ding a a lakthak mi 5 te’n (Mr Jamkhanlian Tangpua, H Ginkhanjam, Nangsonlian Ngaihte, B Kaisuanlal leh Lianbiakmawi) tuin mohpuakna kipia bangbangte sem/sin in om lel uhi. Amaute etkhiakna hun a om lel uh ahihman in a kalsuanna peuh uh hong lamzanna ding un Pathian pina ngetsak ni.

2. Mr Jamkhanlian Tangpua leh H Ginkhanjam-te, a zi leh tate utoh tu in OTI, Hosur (Chennai) ah training in omlel uhi. Amaute’n chidam a lamzang leh lohchingtak a a sin bangbangte uh hon sin theihna ding un thumna in phawk ni. Lamzang a hon sintheih uleh September 2021 kha tan tua mun ah training ding uhi.

3. Nangsonlian Ngaihte, B Kaisuanlal leh Lianbiakmawite April 07, 2021 in Himalayan Missions Field Exposure ding in kuan ua, chidam in ava kalsuanna ding mun uh tung chiat uhi. Amaute’n Field exposure a zoh hun un, June - August 2021 sung NECTAR, Shillong ah training dia kuannawn ding uh ahihman un thumna toh delhzui zel ni.

E. OMF LEH WEC TOH SEPKHAWMNA AH

KIPAHTHU GENNA LEH THUMNA DINGTE:

1. Rev Khaikhuphang leh a lawinu Nianggelvung, OMF toh sepkhawmna a semtu i neihte’n thumnate ziak in ministry maban sunzom tou theizel uhi. Pathian in Saptuamte tungtawn a thumtu ding leh thilpiak a pang ding mi a hon piakte ziak in kipahthu gen ni. Amaute sepna mun a Khristian tamlou omte lak ah a tamzawte neektawm zong/vanzuak khong hi uh ahihman in Covid ziak in a summuhna uh nakpitak a sukbuai in om hi. Pathian vualzawlna leh ginna a a dinkipna ding un thumpih ni.

2. Pathian in i thumnate hon dawngzel in Mr Thangbiakmuan Naulak in Thai Language exam A2 zouta a, tu a masawn tou thei ding dinmun a hong om ahihman in kipahthu gen ni. Maban a a zilpat nawn hun a B1 pan ding ahihman in thumna toh lamzang a hon ziltheihna ding in thumpih ni.

3. WEC toh sepkhawmna a kuan Miss Angela Lunhoih, Myanmar gambuaina ziak in heutute deihna bang in April 01, 2021 a hong paikhia, Delhi a zankhat giak in April 02, 2021 in a omna Lamphelpat, Imphal chidam in hong tung hi. Myanmar gam buaina in Toupa’ gamna sem ding a i kalsuanna leng hon subuaikha ban ahihman in a gammite leh vaihawmmite adia i thum kawmkawm in, Miss Angela Lunhoih maban ding Toupa pina ngetsak ni.

4. Miss Zamhoihkim in pau leh tawndan zilna lamzangtak in neitou theizel hi. Maban a siamsinnate lamzang a hon sintheih a, a sinkhiak leh a muh bangbang te tunung a Toupa gamna sepna a manphatak a hon zattheih nading in thumpih ni. Banah, tulai khohun kikhek zelte ziak in a Sinus uang sim mahmah ahihman in tuate’n a sinna a sukbuailouhna ding in leng thumna in phawk zelzel ni.

 
© 2021 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia