Editorial | KTZ

SAPTUAM’ KIBULPHUHNA LEH PAIDAN

Guest Editorial

Tulai khovel thuthang tuamtuam kintak a zak theihna leh kintak a mahni ngaihdan taklat theihna khovel ah awlmoh ding kibehlap mahmah a bang hi. Hiai tungtawn in a hoihlam a kibawlphatna ding tampi om ding a, huchih kawm in, pilvanna ding leng om hi. Hiai thiltung leh ngaihdan tuamtuamte Laisiangthou thu toh velkhawm poimoh sem a, i saptuam paidan mah leng tuabang ahih poimoh sem ding hi.

Pathian hehpihna toh i saptuam paidan ah, kibulphuhna kichiantak gelhthoh a nei a paite i hihna ah i pai dingdan tangpi kigitsa i nei a, kipahhuai i sa mahmah hi. Hiai kibulphuhna i neihte khovel paidan koppih a, khovel pilna toh kibawl mawk hilou a Pathian Thu apan i laksawn ahihman in khamuan huai leh kingakna tak i sa hi. Thuthang leh ngaihdan tuamtuam omte ah, saptuam in i kibulphuhnate velthak a tua bang a i kalsuan hong poimoh sem in kilang hi.

Tua dungzui in, EBC saptuam in tup leh ngim i neihte velkhawm leng i chi hi. I saptuam in saptuam masate suangphum tung a lamtou in, amau kalsuanna leh sep leh bawlte sunzom in hiai thil nga(5) tangtun i sawm hi (Nasepte 2:42-47 leh EBC Kivaipuakna Article 3).

PATHIAN BIAK DING: “Saptuam in ahih ding poimoh pen Pathian biak leh phat ahi.” Hiai dungzui in, mihing khat leh nih hiam, ahih keileh a pawl in hiam tuate thupina ding zon hiam, huai dia zat hiam pen thil hitheilou ahi hi. Saptuam in Laisiangthou tang 31000 val omte lak ah, 1 Kor 3:11 “Suangphum lepkhitsa loungal suangphum dang kuamah in a lem theita kei ua, huai suangphum Jesu Khrist ahi” chih i thutawi ahi a, ahihtouh zel ding leh saptuam a ding a, a loutheilou ahi hi. “Pathian bekhawm pawlpi” hih ding i mengmuhna leng ahi hi. Covid 19 ziak a biakkhawmna a ngeina bang i neihtheihlouh lai in leng, mimal leh inkuan biakna i kilamlah dan ahi hi. Tua, bekhawm thei nawnta i hih bang in naksem a kalsuan ding in i kihanthawn hi.

TANCHINHOIH PUANZAK DING: Pathian biak leh phat a poimoh pen ahihbang in, ginglou mite’n tua bang a Pathian a biak ua a phat sam theihna ding un saptuam in Tanchinhoih puanzak ding tup in i nei masa hial hi. “Tua nasep tualsung (‘E1 Evangelism’ kichi) ban ah kim-le-kiang (‘E2 Evangelism’) leh leitung a namte lak a Khrist Tanchinhoih puanzakna (‘E3 Evangelism’) ahi” i chi hi. I lak a Tanchinhoih genna (E1) kum 110 bang gen in na omta a, i kim a mite a bik in unau Meiteite lak ah kum 54 bang i kalsuanta hi (E2). Jesu Khrist nagot thupi dungzui a “namte lak a Tanchinhoih puanzakna (Global Missions, E3) pen pangkhawm a napi a neih ding ahi” chi in i na tungnun hi. Hiai dungzui in, tukum in leng namdang lak a sem ding EBC missionary 5 leh support missionary 20 bang neih beh i sawm hi. Tua bang a, hiai nagot thupi i tangtun theihna ding in, i mission thilpiak saidan leng luangkhawm sem a om ding deihna toh paidan omsa puahthak in April 2021 apan zat i sawm hi.

KHRIST NUNGZUI BAWL DING: Tanchinhoih zalou a ginna omtheilou, ginna lou a Pathian lungtaisak theih hilou ahih dungzui in, Tanchinhoih phuanzakna tungtawn a ginna a kibulpuhpen napi i chi hi. Himahleh hiai pen a zohna hilou in a thupizaw khat a dia bul kipatna ahi leng a chihtheih hi. Huai bel, Khrist nungzuihna ahi. Pathian batna nei a kibawl leitung mihingte khelhna ziak in i puksia hi. Himahleh, Jesu Khrist a pianthakna ah siamthak in i om a, “Tapa bangtak a om ding” chih ahih bang in nungzuihna ah tua i tup ahi. Huai ding a kisinsakna tuamtuam nei in, kal i suan a, kalthak suanna ding tampi i nei lai hi. Tanchinhoih gentu hoihtaktak i neih bang in, nungzui bawltu hoihtaktak pulpit leh biakin sung nasepna khenlam a i neihna ding a i thum leh i kisak poimoh mahmah hi. Tulel a i poimoh pente lak a hikha ding hi.

NNA HOIHTE SEP DING: Jesu Khrist nungzuihna i chih niteng hinkhua a amah batna latsak a, khovel adia “chi leh meivak” hihna toh nna hoih sep ding ahi. Jesu’n huai bang dia lamlahna hon neih bang in, saptuam in tup in i nei hi. Tua dungzui in, hiai sai ding bik department tuam bang nei in, school omlouhna ah school, fee lam a haksatna neite ading in DORCED project, DOTPROJ chih leh khotang siatna lak a kibual mite lak ah leng i sem hi. Pathian vualzawlna i thohkhawmte zang in tutung Covid 19 buaina ah leng salam khosakna leh taksa damtheihna vai a kalsuanna tuamtuam i neithei a kipahhuai mahmah hi. I khotang dinmun et in kalsuanna ding tampi om lai ding a, i pankhop sem poimoh ding hi.

KITHUAHKHAWM DING: Saptuam masate’n kithuahkhawmna manphatak zang a, nekhawm, thohkhawm leh kiphattuampih a a om bang un, i saptuam tualsung leh division ban ah “ki-convention” in a chil apan in kithuahkhawmte i hi hi. EBC polam mite toh leng kithuahkhawm in kal i suantou zel a, i suanzel na ding tam mahmah lai ding hi. Huchihlai in, kithuahkhawm a munkhat a i paikhawmte ban ah, saptuam’ i tup-le-ngimte tangtunna ding a lungsim munkhat a, i sep-le-bawlte a leng i luankhawm sem poimoh mahmah hi.

Hiai bang tup-le-ngim i neihte tangtunna ding in i saptuamte tualsung, division leh convention level ah Laisiangthou sinsakna bang a paidan “kilawm leh kilem dimdiam” (1 Kor 14:40) hi a i theihte i bawltou zel hi. Subcommittee bang kibawl in, i ngimte tangtun sawm in a mi i sukkhak dingte dungzui a kum a kilem (BCD, BYF); akum leh amei-apa a kikhen (BDF) leh a nna leh mun dungzui a kikhen (Building, School, Missions, etc), tuate ban ah a piilpi a hon khaikhawm ding TBSUC/DWC/CEC chih bang i nei tiltel hi. Committee 5/6 i neihte lak ah chituam deuh, Missions Committee tungtawn in polam i sai hi. Hiai lousiah ei sung bik kipuahna leh tualsung vai ahi tangpi a, huai ding in committee-te malakna tungtawn in i tha leh sum i lak ah naktak in i suk hi. Missions pen polam nasep liantak, leitung a namteng lak a nasepna (global missions) ahih bang in, mal panlou a luangkhawm a sep ding chi in “pangkhawm-a napi” in i nei hial ahi. Tua dan in, maih neilou a inn gua hah ding leh gam gua hah ding nei a pai i hihman in paidan kilem dimdiam nei tadih in i kithei hi.

Huaiziak in, a thil tuamtuam leh ngaihdan tuamtuam omte i ettouhzel kawm in, i paidan omasate zunthak in Jesu Khrist saptuam thiltupte tangtun ding in kisa thak leng chi in i kichial hi.

 
© 2021 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia