Editorial | KTZ

NGAIHDAMNA IN A TUP

“Huchiin Pathian in Khrist ah khovel amah toh kituaknawn in a bawl a, a tatleknate uh tatlekna a sehsak lou in, kituahnawnna thu hon kemsak ahi” [2 Kor.5:19]

Tukum kha nihna tan chidam a hon pikai i biak Pathian leh i Hondampa Jesu Khrist min in, saptuamte itna chibai kon buk hi! Tu kha thupi Ngaihdamna in a tup chih ahi. I thupi in thil lianpi nih tunkhawm a, tuate kikum nawn lehang chi i hi.

Ngaihdamna in a tup masa leh poimoh pen Pathian toh kilemna ahi. Pathian siangthou leh mikhial kilemna ding in ngaihdamna poimoh hi. Mihing ngeinadan ah, ngaihdam a omna ding in a khial pen in a khelhna mi tung a kisikna toh a khelhman pia a, ngaihdam a nget chiang in ngaihdamna om thei hi. Pathian in zong amah lungkimna bang a mikhial in a thupiakte zui a, a deihdan a hihbuchin chiang a ngaihdam a om a, kilemna omna ding gel in, lam tuamtuam ah pan na lata hi [Heb.1:1]. Dan thupiak, Jawlneite, Kilaknate, Thillamdangte, Siampute leh Kumpite zang in kilemna ding lampi na sialsial mahleh, mihing kuamah Pathian lamet bang a a thupiakte zui a, diktat leh siangthou zou omlou in, ngaihdamna tangzou omlou hi [Rm.3:10-11]. Huai ziak in, mikhial in a khelhman piakna dia thuak a a sih teitei ding Pathian in phallou in, a Tapa Jesu Khrist thuaksak hi [Isai 53:4-6]. Jesu Khrist thuakna Pathian in mikhial sikletang a thuakna a simsak ahihdan thei a, nasep leh thilhih ngiat omlou a, GINNA lel a Jesu Khrist mimal hondampa dia sangte ngaidam in, amah toh kilem in Pathian in bawl hi [2 Kor.5:19]. Huchiin Pathian in “Kei, keimahmah, keimah leh keimah ziak kia a, na tatleknate uh nulmangpa ka hi, na khelhnate uh leng ka thei gige nawnta kei ding” chi hi [Is.53:25].

Ngaihdamna in a tup poimoh nihna tuh Mihingte kala kilemna ahi. Mihing khatlekhat hiam, a pawl hiam, a beh hiam, a nam hiam kala kisiatna leh kimelmakna om chiang in, kilemna ding in ngaihdamna poimoh masa a, hiai lou in kilemna om theilou hi. Mihing ngeinadan ah, ngaihdamna omna ding in a khial ka hi chipen in, a hihkhelhna mi tung a a khelhna kisik ahihdan pulak a, ngaihdam ngen in kingaihdamna om thei hi. Pathian in ngiat neilou a a tapa Jesu Khrist a ngaihdamna hon bawlsak bang in, ei Khristiante/Gingtute khatlekhat kal a ngiat neilou a kingaihdam ding a deihdan leh hon lametdan hi a, “Pathian in Khrist a nou a hon ngaihdam bang in, noumau leng kingaidam tuah chiat un” chiin thu honpia hi [Eph.4:32].

Pathian hon lamet bang ngaihdamna lungput mihing ah om thei ngeilou hi [Mk.7:20-23]. Himahleh, Gingtute/Piangthakte, a phu louh Pathian itna, lainatna leh ngaihdamna tangte, Pathian Kha Siangthou in sungtenkhumta [Sungluah] [1 Kor.6:19f] ahihman in, Kha Siangthou huhna toh amah tung a bangzahta a khial hiin, ngaihdam ahihna ding ua hoihna leh chitna himhim neiloute hitaleh, bangmah ngiat omlou in ngaidam thei a [Rm.5:8], ngaidam zou hi [Stephen kampau-Nas.7:60].

Huai ziak in, “Na tung a khialte na ngaihdam leh ngaihdam louh lungput in Piangthak diktak na hih leh hihlouh gen ahi” chih thei a, Piangthak diktak na hi hia — hilou chih kivelthak chiat ding in Toupa min in i kingen hi. I tung a khialte i ngaihdamna ding ziak — a kisik ziak uh hiam, ngaihdam hon nget ziak uh hiam, ngaihdam tak dia a kibawlhoih ziak uh hiam, sumlepai lungkimna tan hon tawi ziak uh hiam, amau apan banghiam lametna i neih ziak hiam, hilou in Pathian in mikhial it taklouh apan bangmah ngiat neilou a hon ngaihdam bang a, enleng bangmah ngiat neilou a i ngaihdam ding [i right tengteng surrender in] – aziak omsun ahi chih theiin, kuapeuh kingaidam tuah chiat ni [Eph.4:32]. Kingaihdamna leh lemna omna dia a detdou leh hoihpen ding tuh, midangte hon leptuah ding ngak lou in, a kilemloute mah in panla a, kingaidam tuah a, eimah i kilem ding ahi hi.

Pathian ngaihdamna lungput bang ngaihdamna i neih chiang in, mimal, inkuan, insak-inkhang, ulenau, gamlenam kal ah lemna, damna leh khamuanna hon gahsuah ding a, Pathian vualzawl mite, gam leh nam nuamsa hiding hihang! Hiai bang hun muhkal ngaklahhuai na maizen e!

 
© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia