BYF, BDF, BCD Corner | KTZ

KIGENHOIHNA LAI BANG NA NEI A?

“Noute ka lai uh, na lungtang ua gelh, mi tengteng theih leh sim na hi uhi” 2Korinthte 3:2

April 2021 muthei nawn dia damna hon pia Pathian kiang ah kipahthu gen in a min i phat hi. Simtute na vek un Toupa Jesu Khrist min in chibai k’on buk hi.

Sawltak Paul, Pathian sikha in Korinth saptuam mite, amau nasepna a piangthakte kiang ah, mi khenkhat in phatna leh kigen hoihna laithon a poimoh bang ua, amau tua bang a kigen hoihna laikhak ua amah a kipan poimoh lou ahihdan gen hi. Jesu Khrist tanchinhoih gen a mite kiang a puanzak a tup pipen kikheng ngeilou a, mimal nasem hilou ahihdan phawk gige hi. Mahni ki thupi sakna ding a tanchinhoih zat tuh Paul in khelhna bang in ngai hi. I changtel in a gen bang in Korinth mite kiang a tanchinhoih a gen uh zui a, a lungtang ua Pathian gingtate ahihtak man un, a gamtat khohei ua Khrist mel lang in, laipek a gelh a kigen hoih sese ngailou in a tatdan uh en in Paul leh a lawmte nasep mite’n sim in muthei uhi.

Tulai khovel siamna, pilna a san dungzuiin kua’n bang sem a, bang siamna nei hiam chih theihtheihna tuh laipek lian lou khat a ‘Certifcate’ chituamtuam amau hihna zil in kipia hi. Mi tampite’n tua certificate pen chitna, hihna, siamna in ngaihtuah uhi. Tangpi theihna ah certificate pen hihna genna ding in poimoh mahleh, a certificate kia in genching zoulou hi. Nasepna ding a chinna, siamna genchetna hoihpen tuh i nasep in mite hinkhua kikheng lamdang ding khop in a lungtang ua vom in a gamtat khohei ua muhtheih a hong om khiak a poimoh hi. Huai tuh, ‘Khrist lai, kou hon gelhsak laitui a gelh hilou, Pathian hing Kha gelh hizaw, suangpek a gelh hilou, sa lungtang pek a gelh hi zaw na hi uh chih chiantak in na taklang ta uhi’ a chih bang in, mihing hoih sak leh kithalawp zual a hih hilou in Pathian hing Kha nasep, a sepna mi’n chiantak kithei a a taklat a hizaw hi (2Kor.3:3).

Ahihleh tuni a Khrist tatna tangsam ei gingtu Pathian misiangthou kichite’n tua laithon Pathian hing KHA gelh mahmah mite’ simtheih ding in i taklangta hiam chih kivel thak lehang a uthuai hi. Mi tampite’n khovel siamna toh kisai in a phakna chiang uah certificate hoihtak nei mahle uh, huai toh kituak a sem theilou pawl om uhi. Tuabang mah in Khristian gingtu tampite lak ah khalam pianthakna khatvei kia leng hilou tamveipi piangthak kichi ngal in, a gamtat uleh nasep dan ua kipan a mite’n Khrist melmutheilou uhi. Nek-le-dawn, tep-le-muam, kampau, gamtat-khohei leh a dangdang Pathian deihlouh dan theikawm napi a leng tawpsan tuanlou a, pianthak ma leh pianthak nung leng kilamdanna a omtuan kei lebel Pathian hing’ kha in nangtung a nasem kha nailou hi kha ding hi. Phatuamngai in theihnate zang in kisuk mah lehang bangmah phatuamlou ding hi (Romte 10:2).

Midangte’n nang a Jesu Khrist mel a muh ding uh thil poimoh mahmah ahi. Belamnou, gensiat bei leh ninbanglou sisan bang a, Khrist sisan pha a tatte, goutan setheilou, tultheilou luah dingte, Pathian thuhing gige leh om gige chisetheilou lak a piangthakte na hi zaw uhi (1 Pet.:4,19,23) chi a i Laisiangthou a i muh bang in, chian zawsem a mimal in theithak in, a thupina koppih leh hinkhua a mite’ simtheih ding a taklang ding in panla thak ni. Paul in, “Thil bangkim hih a siang a, himahleh thil bangkim hih a hoihkei hi. Thil bangkim hih a siang a, himahleh thil bangkim hih in mi a bawl hoih kei hi” (1 Kor.10:23) a chih bang in eite leng i utdandan a om a, ne leh dawn a mawk om ding hilou in, Pathian deihdan zong in Amah siangthou bang a hinkhua siangthou leh pomtak hiding a i hinna pethak ding in i kichial hi. Paul in Pathian vang leh chitnate ziak a siangthou hinkhua zangthei, mite simtheih hinkhua zang, ban ah midangte hinkhua a simtheih ding khop a Pathian thu a lungtang ua gelh leh lang khesak uh a hihdan a gen bang in eite’n leng Pathian hatna mah suang in i hih zoungei ding ahi. “Huan Pathian lam ah huchibang muanna Khrist vang in ka nei uhi; Bangpeuh koumau a kipan a pawt a sim ding in koumau kia in ka chin uh ka chi kei ua; ka chin theihna uh Pathian a kipan a hizaw. Amahmah in thukhun thak nasemte hiding in hon chingsak a; a lai thu a gelh lel nasemte ding hilou in, a Kha a nasemte din a hizaw hi; laithu gelh lel in zaw a hihlum nak a, Kha in bel a hih hing hi” (2 Kor.3:4-6). Na kigen hoihna lai a pek a om lel hia? Ahih keileh midangte’n na hinkhua ah muh bang a nei ua?

DORCED HUHNA
1. Nu Vanlalruat BBC Lailam Veng Rs 1,000/-
2. Mizoram a naupang i chawm Mr Khammuanding in Rs 2,000/ Dorced huhna ding in hon pia hi. Amah Mr Khammuanding ahihleh Class VI-X Dorced chawm in Mimbung English High School a sim in 2019 in Mizoram Board of Secondary Education nuai ah Class X First Division in zou hi. Nek-le-tak zonna baihlamzaw ding ngaihtuahna in a nu-le-pate’n Sihphir lam a pempih uhi. Kum paisa 2020 sung college kai hoihlouh toh a hihtheih khamkham a niteng nasem a kiloh in kuanzel a, tua amah lohkhiak mahmah a pan a Dorced huhna hon khak ahi. “Regular a sepna hoih ka neih hun omleh chiklai peuh in Dorced huhtu in ka pang ding” chih hanchiam lai hi. A kipiak zohna thupi i sa a Toupa’n a maban laisimna leh khosak zelna ah makaih in vualzawl zel hen chih deihsakna leng i pia hi.

Toupan Dorced huhna petute hon vualzawlzel hen.

 
© 2021 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia