BYF, BDF, BCD Corner | KTZ

DORCAS’ DAY THUPUAK 2020

Tukum 2020 Dorcas’ Day leh Nute’ Ni zangthei ding a hinna, damna hon pia i biak Pa Pathian leh a Tapa Jesu Khrist min manpha in munchih mualchih a om ka Dorka hihpihte leh saptuam mite itna toh Nute Ni chibai kon buk masa hi.

DORKA MIN
Pathian in mihing masa Adam a siam a, huai panpihtu ding in numei hon siam hi. Pasal siam masak a om dungzui in numei sang in banglam peuh a siamna, hihtheihna, lemtheihna leh thahatna nei zawtham uhi. Numei mawltaktakte makhua ding gel in Dorka pawl kiphuhkhiak a insung khalam kikepna a panpihtu hi ding a sinsakna piak ding chih pasalte’ lungsim ah om a, Dorka pawl dinkhiak ahi. Tuni chiang in insung a ta-le-naute khalam leh salam kepna ah, awlmohna nei in NUTE kipang theita hi. Huan nektak zonna ah, siamna pilna ah hitaleh numeite dinmun nasatak a dopkang in i omta hi. Tuaban ah i min lakkhiakna Dorka dungsun in sum-le-pai Pathian vualzawlna i tante tungtawn in thilhih hoih leh thilpiakte a genthei tagah zawte enkai in midangte ading in mahni munchiat ah vualzawlna nna honsemsakzel a kipak mahmah in thupina Pathian i pia hi. Thilhoih hihding a Khrist Jesu a siam a om, amah khutsuak numeite; huai thilhoih hih i khosakdan ding a Pathian in a bawlkholh pansan a ‘DORKA’ min honna phuahsak heutu masate zahna i pia hi. “… Tabitha minkhiakna tuh Dorka ahi, huai numei in thilhih hoih leh thilpiak a hau mahmah hi” (Nas.9:36).

DORKA NASEP
Dorka pawl mahni omna saptuam bing chiat a heutute tungtawn in ei toh kikhom a sep ding omchiat hi. Tuabang i sepkhiakte a thawn omlou a midangte adia vualzawlna leh kitundingna hizel ahihman in thasiallou in semzom zel ni. Dorka in a damlai in meithaite ading puanak leh puante abawlsak zel chih Laisiangthou ah i mu hi (Nas.9:39). A puanak leh puanbawlte ahoih leh hoihlouh lam akigen kei, a thilpiak tawm leh tam leng kigen lou, himahleh thilhih hoih leh thilpiak hau ahi chih i muh bang in NUTE aw tuni in lungsim tawng a kipan in thilhih hoih ding Pathian vualzawlna i tante khatkhat a sim in thilpiak hau ding in hanchiam thak ni. Tuimal neuchik leh leimal neuchik in tuipi lian leh gam kilawm abawl bang in, tawmchikchik Khrist min ziak a midang genthei zawte adia i piakte Pathian in amau kitundingna ding kia hilou in ei a pekhe tute ading in leng kipahman tampi hon piakbeh lai ding hi, “Kuapeuh Khrist mi na hihziak ua tui nou khat dawn ding hon pia tuh, chihtaktak in k’on hilh ahi, a kipahman a taan kei hial ding” (Mk.9:41). Sem theizel ding pe theizel ding in Toupa’n hon makaih hen aw.

PROJECT NIH
Dorcas Children Education Department (DORCED) leh Dorcas’ Tailoring Project (DOTPROJ): Hiai Project nihte Headquarters tungtawn a i sepkhawmna uh project poimoh mahmah ahi. Antangpham Headquarter a submit-te lak ah 15% leh deihsaktu mimal leh pawlpi bangzahhiamte’n khateng a pepawl leh mahni lemtan hun a pezelte ziak in tunitan hoihtak in paihoih tou hi.

1. Dorced ah tulel in naupang chawm 130 kinei hi. Amau omna division sung a a school kaina uah theihtawp suah a pang in maban sunzom uhi.

2. DOTPROJ ah puankhui course thak April, 2020 a sinpan mi 10 omlel hi. Amaute instructor makaihna nuai ah ginomtak in niteng in amau sinlai chiat sin uhi.

Niamchik leh mawltaktakte tuni chiangchiang a nna thupi leh thilhih hoih leh thilpiak tampi pekhethei in midangte panpihthei ding a honvualzawl leh domsangtu Pa Pathian in thupina tengteng tangta hen!

“TOUPA’N THIL THUPITAK HON HIHSAK A I KIPAK MAHMAH HI”.

DORCAS’ DAY & NUTE NI ZANGTE TENGTENG TOUPAN HON VUALZAWL HEN!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Locate us

MINISTRIES

© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia