Articles | KTZ | EBC

EBC SAPTUAM MABAN POIMOH KINTE

Thumasa: Jesu Khrist in, “Hiai kon hilh ahi: Nang Peter na hi. Hiai suangpi tung ah ka saptuam ka lam ding a, misikhua kongpite’n a zou kei ding” chi in ‘na gen hi (Matt 16: 18). Saptuam khenkhat in saptuam kingakna suangphum Peter ahi chi ua, diklou hi. Laisiangthou in Jesu Khrist ahi chih kiteltak in ‘na gen hi (1 Kor 3: 11; 1 Kor 10: 4; Ef 2: 20). Tua ahihman in, Saptuam a khan ding Pathian deihlam ahi. “Misikhua kongpite’n” zoulou ding chih ahi (Matt 16: 18b). Pentikost Ni tun ma-a gingtu masa, Pentikost Ni ngakte 120 hi uhi (Nas 1: 15). Pentikost Ni hong tung a Peter thugen gah in gingtu 3,000 in kibehlap hi (Nas 2: 41). Peter leh Johan thugen gah in 5,000 phatou pah uhi (Nas 4: 4). Tua ban ah zong kibehlap touden uhi (Nas 5: 14; 6: 7; 9: 31, 35, 42; 11: 21,24; 12: 24; 16: 5; 17: 12; 19: 20).

Saptuam khanna a kigen chiang in: Khandan chi li kichi pahpah i zata tham ding uhi. 1) Gingtu nu-pa apan piang tate apan a khanna ahi. Piangthaksa hi kei mahle uh Saptuam a telsa hipeuhmah uhi. 2) Mun khat apan mundang Saptuam a pem a kibehlapna ahi. Mun khat a Saptuam a kiam lai a mun dang khat a khangsak hi. 3) Piangthakloute piangthak-a Saptuam kibehlapna, a deihthusamhuai penpen khanna ahi. EBC Saptuam in hiaite i sep kawmkawm in, maban ah, hiai anuai a i gente bang a khanna ding om ding in i lamen a sepsuah pah hileh deihhuai mahmah thukup kon bawl hi. Tuate abanban a etkhawm i sawm ding ahi:

Biakna Ataktak Nei a Khalam a Khanna: “Biakna” tamveipi i sinkhawmta uhi. Maban ah, ataktak a biakna neih hunta hi. Kikhopna adiak in, Pathian ni zing leh nitak in, Pastor in a hihtheih pah leh a hoihpen a, aman a hihtheih keileh, ama sep ding bel om law ding ahihman in, Biakna Pitu neih ding ahi. Kikhopna item dangte patma a, Biakna hun biik neih masak ding ahi. Tua hun a hun zat dingdan hi bang hi ding ahi: 1) Pastor in a pi theih pahleh ahoih a, a hihtheih keileh Saptuam sung a a kiva khat in biakna pi ding ahi. 2) Biak sapna (Call to worship): Sam a biakna toh kisai kigennate sau lawlou kiteltak a sim a, Pathian, biaktaakpen, phattaakpen, pahtawitaakpen ahihna tomfeltak a gen a, mipite Pathian thupitak mai a bekhawm ding a chial a chou ding ahi. Et. Sim ding: Sam 86: 8-12; 95: 1-7a; 96: 1-9; 100 adg. dg. 3) Pathian phatna, pahtawina, thuphatawina, kipahthugennate kia nei ding, ngetnate, ngetsaknate tellou phot ding ahi: a) Dingkhia a thum nuam mi 5-10 bang ding a abanban a thum sak. b) Khatvei thu a mipite thumkhawm zong hi thei hi. c) A tawpna ah pitu in a zohna bawl ding hi. 4) Phatna Pite toh: Pathian Phatna la, Biakna Late 2, 8, 15 & 29 etc. 2 & 3 sa khawm ding. 4) Thohlawm lakkhawmna & latna nei ding. 5) Sinsakna: Nipi Skul kisinsakna/Thugenna. 6) Hunkhakna: Vualzawlna/Thumna/Toupa Thumna/ Doxology sa ding.

Thugenna: NEIG Mission hong lut chil-a nasep a pat tung lai un, Saptuam kem a thugen ding, sinsak ding leh Schoolpu dingte D.M. Bible School ah, Bible sinsak masa in, tua khit chiang in sawlkhia in zang pan uhi. Tu hun chiang in tua bang paidan om nawn lou in kiniamkiak zaw mah bang hi. Tua ahihman in, Saptuam a thugen a kizang ding leh i zat ding peuhmahte Bible sinna nei ahih hunta hi. Saptuam a i kep mite laisiam– Secular a: Class X, XII, Graduate, Post-graduate khawng hita ahihman un amaute nek theih ding leh, nektak an piak theih kiphamoh lawta hi.

Upa Chinna: EBC Saptuam in “Upa” orden i neihte, hunbit a khasum sang a nasemte ahihlouh hang un, phatuamtak a kizangte ahihman un, Saptuam gou manpha mahmahte hi uhi. A kizatna uleh a mohpuakna uh thupi a lian ahihman in, Upa chinna ding a kigente lak ah, GBC a MTC zou ahih ding ahi, chih behlap ding in hoih hi. Ahang bel, amaute thugen bang, sinsak bang, innlut chialpi bang, mimal chialpina bang a a kizatna uah, phatuam in manpha mahmah ding hi. MTC hoih hun i sak keileh a course subject-te puahphat hoih ding hi.

Division Nih Bawl Behtuak Lawta: Saptuam kepna a hoihzaw leh thazohzaw a kikep theihna ding, mi zattheih ding tampi kizang kha loute zat theihna ding, kikangkoih tampite a inntekpan theihna ding uleh, mohpuakna lenkha tam a manphazaw a, mi tamzaw kizat khak theihna ding, Pathian vualzawlna a gam nasepna ding a zang kha loute leh phawk loute phawksuah sak ahihna ding in “LAMKA EAST DIVISION” kichi Vengnuam, New Lamka area ah, “LAMKA WEST DIVISION” kichi Bungmual area ah bawlkhiak ding in plan kibawlpah leh kum 2-5 sung bang a piangkhe zou ding hi. Tua in, EBC ading in nakpitak a khanna tun ding hi. Tu kum 2020 in “Supplementary Budget” in amun ding kileikhia henla, a sai ding Committee kiseh pah henla, plan hon guang uh henla, kum 2-5 sung a piangkhe zou mahmah ding hi. Huan, Lamka North Division in Bungmual area a pen mohpua henla, Lamka South Division in Vengnuam area pen mohpua in, nasep hoih in kitaiteh leng hoih mahmah ding hi.

Mun Omsate a Biakinn Lam: Lamka-zang a Saptuam lian khat a heutu hih khak chiang a nuam sakthoh a, Saptuam ki-inntuan ding sawm nuam hetlou a kiphawk mohbawl heutu om zekta uhi. NGV ah mun leisa om. Laimanai, ah zong om sawt kikoihdap lawta! Mun hoihzaw zong lai i hia? Biakinn lam pat hun lawta hilou hia! A mun a teengte a kipankhe ngam a om keileh, Headquarters leh Division beek in fund sehkhiak a patsak ding ahi. Hiai bang khannate’n Missionary nasep zong hatsak ngeingei ding ahi i chingam ahi.

Thukhupna: Paunak ah, “Muhkholhna omlouhna ah, mipite a mangthang uhi” (Pau 29: 18a KJV) chi in hon hilh hi. Makai khat in bel: Mite muh ma-a muh ding, mite muh sang a sauzaw muh ding, mite muh sang a chiangzaw a muh ding, mipite zong muhsak vek ding-a, amaute toh pangkhawm a sepkhiak ding ahi (cf Jer 20: 9). Zekai nilouh lehang, van man tam hiaihiai, eimah angsung khualna lian hiaihiai khalam lalgam ading a kikhualna sang a, khawvel lalgam ading a kikhualna lian hiaihiai, hun lah beibei, hun lah se hiaihiai, i septheihna ding hun tawm hiaihiai hilou hia sanggam!! (cf Matt. 6:19-21; Lk 12:16-21) Pathian in hon vualzawl hen.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Locate us

MINISTRIES

© 2020 Evangelical Baptist Convention. All Rights Reserved. Designed & Maintaines by 🔵🔴⚪ EBCMedia