Reports | KTZ

NECTAR Report tomkim

NECTAR report sim khempeuh itna chibai kon buk hi! NECTAR a i nasepna uh report tangpi hiai anuai ah i taklang ding:

North East India a Khristian omte’ Khamangthang zonna leh matna a a kilunglut ziak in, kisak kholhna lam poimoh hi a thei in NECTAR (North East Centre for Training and Research) chih February 1, 2002 in kipankhia hi. Hiai in a tup leh ngim (vision) tuh North East India minam tampi Jesu Hotdamna Tangthupha kawlmong pha a a za nailoute kiang a Jesu Hondampa Tangthupha gen a, nungzuite bawl ding chih ahi.

Nasep tangpite: NECTAR nasepna ah North East India a Saptuam omte khentuam om lou a Missionary nasem dia lunglut sak leh a mohpuakna uh theihsak a tangtung sak ding a theihtawp a panlak ahi. Tuni tan a nasep tangpite i taklang ding:

1. Cross-cultural Training (CCT) kum khat in khatvei May - August, sung a hi. Hiai pen Missionary-te leh saptuam makaite ading ahi.

2. Teaching English to Speakers of Other Languages (TESOL), kum khat in khatvei, February & March sung ahi.

3. Bible Translation toh kisai tulaitak in pau 8 in Laisiangthou kilet lel a, Sakachepte NT October 27, 2017 in latna kinei hi. Tukum tawplam in pau 4 a NT latna neih ding kilamen hi.

4. Bible Translator te kumkhat in kha 2/3 training kipia zel hi.

5. North East India a pau chi-ngate ading A.B.C Sintung Bu, Tangthu Bu leh Milim Bu khawng kibawlsak in, a sim ding dan uh training kipia hi.

6. Huan amau pau a a gelh neiloute ading A.B.C bawlsak ban ah a sim dingdan sinsakna leh a sinsaktu dingte ading workshop kineihpih zel hi.

7. A poimoh leh kul dungzui in Missions nasepna toh kisai Workshop, Consultation, Seminar leh Conference kinei zel hi.

Tuni tan in NECTAR a graduate mi 545 phata ua, amaute mun tuamtuam ah Pathian nasem in om uhi.

Thukhitna: NECTAR ading a hon thumpih gigete leh sum leh pai a hon panpihte tung ah Pathian min in kipahthu kon gen uhi. EBC Mission Board in NECTAR nasepna ading in kum teng in Rs 30,000/- (Singthum) in hon kithuahpih ua kipahhuai in manpha petmah hi. Tuaban ah, NECTAR Support tu tuamtuam Local saptuam, innkuan, leh mi malmalte na vek ua tung a ka kipahna uh KTZ tungtawn in kon taklang uhi. Pathian in hon vualzawl chiat hen.

Toupa leh A gam adia na seppih uh,

Sd/- Rev S. Nengzakhup
Executive Director, NECTAR.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC