Reports | KTZ

GRACE BIBLE COLLEGE THU TAMLOU

Thumasa: Grace Bible College July 4, 1981 kum in Dorcas Hall, New Lamka ah Rev. Lalngaisang in honna nei a tukum a kum 37 chinna hita hi. GBC apan Bible zilzou tengteng 1,356 phata hi. Amaute lak a tamzaw EBC leh mun dang ah Pastor nna sem leh Missionary in a kuan uhi. Huan GBC a membership hihna tuamtuam nei member 2,743 omta hi.

Grace Bible College tup-le-ngim: Pathian min thupina ding a ‘Khamangthang it, sikha lungput nei, kingainiam heutu sekkhiak a, khalam a piching a Bible sinsakna diktak zui leh a sepnamun mite tondan toh kituak a nasep ding’ chih ahi. Huan Pathian nasem ding a sap a om, numei-pasalte, Bible theihna, laisiamna leh khalam pichinna a thawp ding chih ahi. Tua ban ah, Laisiangthou toh kituak a Pathian thutak sinsak ding a a hinpih uleh khamangthang man ding a kuankhiak ding uh chih tup pipen ahi. Huai ding in GBC Motto, “Sinsak in, Kemsak in, Theihpih in” chih a kizui hi.

Admission toh kisai: GBC in kumdang a Admission kum khat a nihvei a neih, 2017 apan kum khat in khatvei hita hi. Kum teng in July kha in Admission lak ahi. Hiai paidan thak toh kituak ding in Curriculum leh syllabus lepthakna zoh hita hi.

GBC a Semtu: Tulel in GBC ah semtu EBC Regular Workers- 8; College in a vak semtu- 12, Office staff EBC sawl- 5, a vek a gawmkhawm-25 in sem hi. Amaute thumna ah phawk zel ding in i kingen uhi.

GBC Membership dinmun: GBC neitu EBC Saptuam ban ah College a intek pente Patron memberte ahi. Hun bangchik a kipan hiam in membership lam hong awlpai deuh a theih ahi. Tuni a simtute’n bang lam ah pan theihna om hiam chi a thanuam tak a pan lathak siausiau ding in i kingen uhi. Member dinmun leh hihtheihnate hiai bang ahi:

Special Patron member ah Rs 10,000/- a tunglam, Group Patron ah Rs 5,000/- a tunglam, Individual Patron Rs 2,000/- a tunglam, Life member Rs 1,000/- a tunglam, Memorial/Anniversary Rs. 500/- a tunglam leh Annual member Rs.100/- ahi.

Tulel a GBC a Naupang Omdan: Kum lui, 2017, July Fall Semester ah Naupang 180 vel pha a, naupang tampen kum a chiamteh ahi. Kumlui a zou mi 30 om ua, amau tellou in tulel a Naupang 88 ahi. Semester teng in a zouthak om zel ua, May, 2018 in naupang 37 in zou uhi. Naupang hong lut nawn ding 121 om ua Pathian tung ah kipahthu i gen hi.

Naupang Chawmna: Saptuam pumpi pangkhawm a ‘Naupang chawmna’, kumlui a i pat uh lohching zel a tuni tan in naupang chawmna Rs.500 tunglam khateng a pia mi 374 phata hi. Naupang chawmtu tamsem om henla, Mission Fieldte a tuailai piangthak, 10/20 chawm thei lehang a zohchiang ua amau field chiat a nna a sep chiang un Missions nasepna gahsuah mahmah ding in lamet huai hi.

Studentte Academic Puahhoihna: College kaisung in heutu leh naupangte’n free internet zang uhi. Hiai pansan a naupangte’n assignment leh lai pawimohte heutute mail ah thonta ua, heutute’n naupangte mail ah thonkik zel uhi. Hiai in nasepna leh naupangte laipoimoh hihna nakpi tak in panpih in lamzangsak tuan mahmah hi.

Library Puahhoihna: Library leng naktak a puahhoih hi a, Laibu 20,000 volumes vel kineita a, automation zong kisem lellel hi. Laibu, dohkan leh chair leng tamtak behlap ahi. Tukum in computer 3 kikoih beh a, computer 2/3 kipoimoh beh lai hi.

Kitchen Hall Improvement: Hostel siangthouna leh chidamna ngai poimoh in kumlui a kipan in sing a anhuan nawnlou in Gas zang in ann ki huanta hi. Hostel a om naupangte discipline hoihsem ngimna in numeite amau building ah dining hall leh table kibawlsak a, pasalte’n anhuan in a dining hall mah a zanglai uhi. Tulel in hostel ah pasal 61 leh numei 27, naupang 88 om uhi. Naupang tengteng, inn a pan galkai omlou a, Hostel a kep vek kal ngaklah huai mahmah hi.

Thukhitna: Pathian muanhuaina ziak in GBC Day 37na i zangthei ua, kipahhuai hi. College in a kallak in haksatna tuakzel mahleh Pathian in hon taisan lou in, sintu ding naupang tamsem, inn leh lou kiningching zawsem hon pia hi. Vanzat hoihzaw in honthuam a, mailam muhkholhna hoihsem nei heutute hon pia hi. Naupang laisiam, B.A., M.A., zousate hon pia a Toupa gam adia mi suanhuai ahi uhi. Mailam ah Pa Pathian in honpi ding a, College taksapte, a misiangthoute tungtawn in hon pelai ding in i lam-en hi. Toupa’n thupina tang hen.

Sd/- Principal, Grace Bible College

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC