Reports | KTZ

Thailand Vision Trip Report

Na puan in mun kek in, na omnate puan in tung kaipalh in; chil ken: na khaute sausak inla, na kaihgakna khet-te kipsak in. (Is 54:2,3).

China gam a missionary nasem James Hudson Taylor in 1865 kum in China Inland Mission (CIM) a na phutkhia hi. CIM in China pumpi Toupa Lalgam suahsak sawm a theihtawp a a kalsuan lai in Communist China in missionaryte hawlkhiak a hon pat ziak in omthei nawnlou in 1950 kum in CIM China nusia uhi. Huchiin Singapore a inluah in nasep hon pan ua a min leng Overseas Missionary Fellowship (OMF) in khek uhi. EBC in OMF toh Feb 9, 2017 in MoU suai kaih ahi. Tua hun a kipan a gen dawk pah uh OMF heutute toh kimuh poimoh ding a hon chih uh sepzuina ahi. Hiai Vision Trip a tel dia a partner pih organization thum a hon chial te uh: ABAN (Ao Baptist Association, Nagaland) apan mi nih Rev Dr Mar Atsongchanger & Mr Liphok, IEM (Indian Evangelical Mission) apan Rev Jonathan Chavan & Rev Khaling Mocha leh EBC GS leh Director Missions vatel uhi. Kizatdan tangpite:

1. Singapore: March 4, 2018 in Kolkata ka tung ua Pastor S Khamzalam in hong pi a nitak an nekhawm in zankim in Singapore zuan in ka lengkhia uhi. Kolkata airport ah heutupa S Pauzakham Deputy Commissioner of Customs, Special Investigation Branch, Air Cargo Complex in zankim in a seppihte hon sawl a sawtpi pi que a dinglou in bangkim hong saisak ua, kong kiklam un tawldamna ding mun hon na bawlsak zomah a kipahhuai petmah hi. Singapore lenna phual ah OMF International Director Sydney Witbooi in hong dawn a, OMF HQ Guest House ah ka tung uhi. Hiai mun ah OMF paidan leh nasepdan topic tuamtuam heutu tuam tuam in dakkal a kikhen in hon sinsak ua navakhuai pah hi.

2. ChiangRai: March 7, 2018 nitak dak 10 in Thailand mallam Myanmar toh gamgi zul khua khat Chiang Rai ah ka lenglut uhi. Hiai mun ah Missionary Rev Asholi in lenna phual ah hong dawn a Hotel khat ah ka tung uhi. Asholi bel Manipur mi Mao te ahi a, a zi Puii bel Rev Thanzauva Thailand missionary tanu ahi. Amau ‘Akha’ kichi tribal mite lak a kum tamtak sem ahita uhi. Akha te khota nih ka va veh ua eilam toh kibang in bi inn khawng leng ka va mu uhi. Akha te bel China, Laos Myanmar leh Thailand mallam ah teng uhi.

3. Biang Chai: Tuakhit Nitaklam in ‘Tailuay ministry’ kichi a heutu Singapore mi Sam Lim in a na sepdan leh Buddhist biakna mun Biang Chai mun a Hell City te hon etpih hi. Thailand ah Buddhist Maktaduai 67 om ua, Khristian 1% hizou nailou hi. Missionary khat in Buddhist 1,75,000 tangpha hiin gen uhi.

4. Mae Sai: Hiai mun ah missionary Robert Neel in hong makaih a Mae Sai Ethnic Church kichi Myanmar apan galtai tribal nam tuam tuam eg. Lishu, Karen, Shan etc ten a bawlkhiak tutan in Chinese saptuam nuai ah omlai uhi. Nasepdan leh testimony lungkhoih pipi honna kum uhi. Burma pau in a gen ua, Mr Sawmchai in Thai in alet a, Robert Neel in sappau in a gensawn zel hi. Nitak lam in Chiangmai zuan in motor in ka paikhia uhi.

5. Chiang Mai: March 9, 2018, 5:30 PM vel in Chiangmai ka tung ua, heutupa Rev Dr Ginneithang te nupa, a tapa uh Khup toh hon na dawn ua, hotel ah nitak an hon nekpih uhi. Asian Cross cultural Training Institute (ACTI) omna mun ahi a heutupa Ginneithang te nupa sepna mun leng ahi. Khup bel kou hong makaih ding a Bangkok apan hong lengtou ahi. A zing March 10; 8:30 AM in Mekong Centre ah Field Director Brian leh staff-te toh houlimna kinei hi. Mekong Field ah OMF in member 140 vel a nei hi. Nitaklam in heutunu Ching in ACTI student-te toh kou India Teamte outing hon hohpih a mun poimoh khenkhat ka va pha uhi. Azing Nipini in Inter Tribal Church ah ka va kikhawm uhi. Kikhawm tawp phet Lopburi zuan in ka pai ngal uhi.

6. Lop Buri: Kholianlou himahleh OMF te pausinna mun ahih ziak in mun poimoh khat ahi. Hiai Language Center ah OMF nuaia missionary nasem ding peuhmah in pau a sin uh a kul hi.

7. Sing Buri: A zing March 12 in Central Thailand Church Planting mun vapha in Rev Eng Kian leh a zi Anong te’n hon na makaih uhi. Tuma deuh a a saptuam uh khat Thai saptuam pawlpi khut ah a na pekhia uh chih a gen uhi. Amau testimony leh a sepdan uh hun bangtan hiam ka kikumkhawm uhi. Lunglut huai mahmah khat ahi nawn.

8. March 13 in Daniel Lopburi Learning Center (LLC) ah pausinte toh hun zang ding in ka hoh uhi. LLC Coordinator Mr Bak in a nasepdan tangpi uh genchetna hon bawl hi. Khatvei thu in mi 19 tan ading seat a nei ua, class a laklai uh hon ensak ua sinsaktu khat leh sintu khat in room tuam chiat ah class a la uhi. Nitak in teacher-te leh student-ten an hon nekpih ua 8:20 PM in Bangkok manoh in ka taikhe nawn uhi.

9. Bangkok: Bangkok 10 PM vel a tung in OMF Home ah ka tung uhi. Bangkok pen Thailand Field adia a munpi uh ahi. Hiai mun ah Khup Ngaihte serve Asia Coordinator in a na tu a ki-intek tuan mahmah hi. OMF a lut ding Missionaryte saitu na hidan ahi. March 15 in Muslim ministry mun ah ka va hoh ua Mark Mitchell in hon makaih hi. Nitaklam in Bangkok Urban Poor Ministry ka va en ua Stefan Keller leh a teamten hon na kithuahpih uhi. Hiai nasepna leng lunglut huai mahmah khat ahi. Hun nanung ah Thailand Field Director Ulrich Kohler toh houlimna hun office ah ka nei ua manpha mahmah hi.

Muhkhiak khenkhatte:
1. Tutung Vision Trip ah OMF leh New Horizon-te vision a letdan hong kilang hi. A seppih dingte uh a muanzohdan uh, a kisen ngam dan uh, hun a piak ngap dan uh thupi hi. Kou hon makaih ding in Guido Braschi International Director England apan hong pai a, Khup Ngaihte Bangkok apan hong pai in Guido toh amau gel in hon makaih den uhi. Field leh center tuam tuam a semtute hon ngaihnatdan leh hon kithuahpih dia a kiman dan uh thupi petmah sak in om hi.

2. OMF nasepna khatpeuh hoihtak a study bawl masa, back up system hoihtak neisa a, thumna leh evangelical thugin kiptak a len kawm a nasem pawlpi ahi uh chih muh thak in a om hi.

3. International Leadership Team: Leitung buppi a OMF te ki sehkhen dan amau bel ‘Team’ a chi mai ua, hiai dan ahi.
3.1. America leh Canada
3.2. Europe leh Africa
3.3. East Asia North – Hongkong
3.4. East Asia Central - Thailand
3.5. East Asia South – Singapore
3.6. China and Beyond – Indonesia
3.7. Fellowship Services – Australia
3.8. New Horizons – Hiai pen OMF Office neilou gamte toh direct a kisaituahna dia department tuam a bawlkhiak thak uh ahi.

4. Thailand gam a Saptuam Pawlpi liante (Umbrella Organizations):
4.1. Church of Christ Thailand (Presbyterian)
4.2. Evangelical Fellowship of Thailand –Hiai pawlpi toh OMF Thailand kizom uhi.
4.3. Independents
4.4. Thailand Baptist Convention

5. OMF makaite toh houlimna ah khovel gam tuam tuam apan paikhawmte sepna ahih man in principle hoihtak zui a gamtang ahi uh chih a uanggen uhi. Atangpite hiai bang ahi.
5.1. Makaihna tuh thupiak leh thuneihkhum (control) hilou ding thuzohna (influence) ahih ding.
5.2. Thuneihna zatdan ah kipanpih utna toh kidotkual diam diam pha kisakpih tuahna sung a zat ahi (Authority is expected to be exercise in a spirit of service with full consultation and in the principle of consensus).
5.3. Thupukna peuhmah pha kisakpihtuahna om nung a bawl ding, kithutuahna a om theih kei leh khawlsan phot a Toupa kiang thum phot ding (Decisions are based on consensus, if consensus is not achieved we adjourned and pray upon it for His will). Bangkok a heutulian Dr Ulrich Kohler in a genna ah ka nuai ua semte ading in thupukna ka bawlsak kei ua, thupukna dik bawl ding in ka panpih zaw uh. ‘Influence in leadership’ ka chih uh ahihleh ka nuai ua semte’n thupukna dik a bawl theihna ding ua information kiching pia in leh buainate sai (analyse) ding dan hilh in ka panpih uh, a chi hi.

6. Finance leh Missionary sawldan:
6.1. A sawltu Saptuam’ velchetna (confirmation): A sawltu Saptuamte’n mihoih, mimuanhuai a chih ngam uh, etkhiakna/interview i chih ahi mai ding.
6.2. Field lamte velchetna (Confirmation): Kipiakna, chihtakna leh damtheihna ah tunung in buaina om thei ding hiam chihte velchetna.
6.3. OMF pen funding agency ahikei a, a role poimoh pen Pathian nasem dingte gahsuah tak a a sep theihna ding ua panpihtu (facilitating role) ahihdan a gen uh.
6.4. OMF paidan ah Hudson Taylor hunlai akipan in kuamah kiang a support ngen ngeilou, thumna toh Pathian buan, Pathian in mite lungtang a thu a gen bang a support ngah uh ahi zaw.
6.5. Missionary sawltu pawlpiten 100% a support uh a kul hi. Huai omdan tuh khaloh kia hilou in, visa fee, medical, tate laisimna, pausinna, cultural training, inluah man, ahunhun a home assignment hiam vacation adia senna te huam vek ding. Khateng hiveklou a kul bang bang chihna.

7. OMF in missionary dia a deihte atangpi in hiai bang in a gen uhi.
7.1. Jesu Khrist a it mite - People who love Jesus Christ
7.2. Mi chitak leh kingainiamte -People who show perseverance and humility.
7.3. Pathian lalgam bawlsawm a, amau lalgam bawlsawmloute -People who want to build God’s Kingdom not their own.

8. OMF in member care a hahbawl uh a pichinna uh kilatna khat ahi. Field mun a buaina, haksatna, khalam bahna, lungkiakna chihte om gige thei ahih man in a training, workshop, kithuahkhawmna, vacation chihte a vangkim a hih zel dan uh ahi.

9. Pawlpi vision leh mission pialsan hetlou a nasemte ahi uh chih houlimna ah a dawk hi.

10. Missionary dia chinna ding in khalam hinkhua a chinna a hah gen ua, lungsim chidam mi tuamtuam toh chidam tak a khosa thei ding chihte a gen uh.

11. Siamna leh degree lam gen kei mahle uh missionary thak dia training lelte leh a heutute uh background i houlimpih leh engineer khawng lam tuamtuam a professional leh doctorate khawng leh university zousa khawng ahi tangpi uhi. Himahleh OMF chindan (culture) ahi diam (Eilam a i poimoh ngaihluat uh) kuamah in Rev, Sir, Pastor, Doctor chihte kisapna hiam laigelhna ah a zang khol hetkei ua, i theihchet nop leh va dotchet a ngai hi.

12. Semkhawm dia kilemna pansan a sum tampi seng a amau sung a member bang mai a it leh deihsak tak a kalnih sung exposure hon neihpih uh hichibang i theih ngeinailouh ahi a thupi lua hi! Toupa lemgel khat om hidin i ngaihtuah a, hiai kong kihong ahun lai tak a i lut keileh Toupa’n midang tampi nei ahi chih i phawk a deihhuai hi. Laisiamte, professional-te, a lunglut mite na thumthum un.

Report tangpi kon bawl theih uh hiai bang ahi phot ding. Pathian in Amah awlmoh leh veite semkha ding in Saptuam pawlpi leh mimalte hon makaih tawntung hen.

© 2018 Evangelical Baptist Convention. All Rights Reserved. Designed By EBC