July 2018

Nu Chiinzanem in apasal ittak Thanggou Guite, KTZ ngaina mahmah ahihziak in a pasal sih champha (July 16, 2014) theih gige na ding in KTZ panpihna Rs. 100/- pia hi.

KIPAHTHU GENNA LEH REPORT
CEHS Sinzawl Kipahthu & Report- CEHS Sinzawl in 2017-2018 sung Convention English High School, Sinzawl ah anuai a bang nna kisem a, kisemtou lai diing hi. Pathian panpihna ziak in Saptuam a heutute leh mi tuamtuam zang in a vualzawlna hon pezel a tuate:

Building (First Floor): School building sawngtung zou in luahtheih/zattheih in omta! Tulel in Staff Room leh Class room in kizang hi.

Electrification: Building thak sung a room teng ah meivak/light ki fit suak a, phatuamtak in sun hun leh nitak hun ina poimoh bang in kizang theita hi.

Siamsin Hostel: Naupang 33 leh Staff 3 omna Siamsin Hostel, building kilam masate (kum7/8 a upa) dengdel mahmahta, tun pucca building ah session kipattung apan in kituah a, tu’n naupangte khamuangtak in omta uhi.

Water Tanky: Kumteng a tui toh kisai a haksatnate dawn zaangkhaina diing in tanky liantak tui 1,02,300 litres tatna diing kibawlzou ta hi. Tuilawng zang in gamlak luita (brook) apan in tui kizawllut hi. Tu 2018 a tui hong hak mahmah lai in, hostel naupang tuitawi a buailou in om uhi.

Hostel Extension & Electrification: Tulel a hostel building a kinehdeuh ziak in Headquarters panpihna mah in hostel building (27’x15’) ki lambeh in luah diing in manta hi.

Bed & Mattress: Hostel a zat diing lupna thak leh Mattress 35 kineita! Naupang khualgam gamlapipi apan puanlompi toh hong kuante’ di’n nakpitak in zangkhaina ahi hi.
Tu-le-tu a itaklat theih hiaiteng ahiphot diing. Ahamphatpih Saptuamte, kho mipi leh kim-le-kiangte’ sik in kipahthu Pathian leh heutute’ tung ah ka hon gen uhi.
Upa H Thuamzasiam, Chairman, CEHS

KIPAHTHU GENNA TUAMTUAMTE
Evan. Manzarual apan kipahthu: Evangelist Manzarual Karbi Anglong Mission Field a sem in damlouhna (thana) a neih ziak in Doctor kienkolsak in April 23 in Lamka ah hong pai hi. Imphal a doctor siamte etkolna a inn a hong omsung in, Saptuam min bang leh mimalmal apan vehna, thumsakna, Pathian min a itna leh deihsakna tampi a donte ziak in a kipahna KTZ ah taklang hi. Aman June 20, in a sepna mun Karbi Anglong zuan nawnta hi. Dam siang sipsip nailou ahihman in chidamna ding leh gahsuah sem a Toupa’n a zatna ding in thumna in phawk zui zel ni.

Gundung Pastor Bial Kipahthu: EBCC Gundung Pastor Bial, L/N Division in EBC Doctrine Kisinsakna April 28 & 29, 2018 sung EBCC T. Khuangkhai ah nei ua Rev. Paukhanmang Guite, Director of Ministries in sinsak hi. A telten theihthak tampi a neih ziak un phattuampih mahmah ahihman un KTZ tungtawn in kipahthu gen uhi.

EBCC T. Khuangkhai kipahthu genna: EBCC Dorcas Veng, New Lamka ten EBCC T. Khuangkhai Biakin tutna ding tampi a piak ziak un kipak mahmah ua a kipahthu uh KTZ tungtawn in hon gen uhi.

Doctorate Degree ngah uh: Thukizadan in Lutheran School of Theology, Chicago USA ah a unaupa Nengsuanthang Phaipi in D Min zou a, a zi Nu Ngaimuanching Phaipi in Ph.D O.T zoukhia hi. Amau Bungmual khomi ahi uhi. Maban ah Pathian in manphatak in zang zel hen aw.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC