Gammial Aw | KTZ

Gammial Aw | November 2018

Amasa in, Gammial Aw Simtute tengteng i Toupa leh Hondampa Jesu Khrist min in chibai aw. Thumna leh thilpiak a Toupa’ gam na i sep khawmna gah anuai a bang in enkhawm nawn leng i chi hi.

A. HIMALAYAN MISSION FIELD
1. ANNUAL FIELD CONFERENCE 27NA REPORTS: Field Kumsim Khawmpi a 27na September 27-30, 2018 sung EBC Birtamode Nepal ah zang uhi. Khawmpi Honna Rev Lalmalsawm, Field Superintendent, Himalayan Mission Field in nei hi. Elder Jonah Rai, FWC Chairman in vaidawnna thugenna nei hi. Khawmpi Thupi “Nang Vualzawlna Hi In” chih pansan in Rev V Thangkhangin, Director of Missions leh Rev Gin Malsawm, Director of Social Development ten thugenna hun zang uhi. Seminar, “Khristian innkuan” leh “Church Administration” chih thupite pansan in sinsakna leng nei uhi. Khawmpi hun sung in palai mi 100 val paikhawm uhi. Field sung a BYF leh Field Choir akipan Pathian phatna la omthei gige a, nuam tuam mahmah hi. Upa ding a telching thakte Ordination piakna Director of Missions, EBC in nei hi. Upa Chandraman Rana Magar, NEBC Unibote in Upa pahtakna lai sang a, field khangthu adia amasapen hilai hi. Khawmpi’n kum thak, 2019 budget ding Rs 70,00,000.00 pomna in, Native a semtute loh leng Rs. 500.00 bek a punsak ding, FWC etzui din koih uhi. Central Nepal area a Saptuam 3 in tutung Field Khawmpi va uap ua, Nepal EBC a lut theihna ding in ngetna leng pia uhi. Khawmpi palaite’n a thu a pomna nei in, FWC in a etzui ding in koih uhi. Amaute, i semtu pensionta, Pastor Tikaram Thapa in kum 2 sung khawng ama sum seng a semtu evangelist loh ana piakte apan gah i muhte ahi uhi. Pathian in Central Nepal tan a gam hon keksak hi a ngai in, i kipak mahmah hi.


2. TANGLEPA PASTOR AREA SEMINAR REPORT:
September 15 - 23, 2018 sung in Area Pastor Ran Kumar Sewa lemgelna leh makaihna in a area sung a khua 7 te ah One Day Seminar sai in om hi. Hiai hun ah Evangelist Prem Raj Bantawa Rai in Church Administration leh Biblical Basic Doctrine sinsakna pia hi. Mun khenkhat ah Saptuam makaite toh hunzang ua amun dangte ah bel Saptuam milip in uap ua, seminar hun manphatak zang thei uhi. Toupan thupina tang hen.

3. BAPTISMAL PROGRAM MUN 3 AH OM:
September kha sung in station 3 ah Baptisma program manphataktak zat in om hi. Memeng Saptuam ah mi 4 in September 15, 2018 in Bialtu Pastor T Ginkhozam tungtawn in baptisma tang uhi. September 16, 2018 in Takuthang Saptuam ah mi 4 mah in Rev Lalmalsawm, FS khut ah Bastisma tang ua; September 22 in bialtu Pastor Padam Thapa khut ah Haldibari Saptuam apan mi 5 in tang uhi. Ging thak piak a om zelte leh baptisma tungtawn a Pathian in member thak ahon behlap zelte ziak in kipahthu i gen ahi.

4. KIPAHTHU GENNA LEH THUMNA DINGTE:
1. September 2018 khasung in Pathian in Gingthak mi 09 leh Baptisma tang mi 13 a hon piakte ziak in Pathian kiang ah kipahthu gen in, Khalam a hong khanlet zel theihna ding un thum zom lai ni.
2. September 08, 2018 in Evangelist S Pumkhanmuan te’n tapa deihthohhuaitak Damak a Life Line Hospital ah nei uhi. Pathian kiang ah kipahthu gen ni.
3. Field Khawmpi lohchingtak a zoh ahihtak ziak in kipahthu gen ni.

B. KARBI ANGLONG MISSION FIELD:

THU TUAMTUAM:

1. Gingthak Kibehlap: Pastor Manthing Bial, Bisarpo khua a om Mr. Raikom Teron leh Mrs. Rosna Kropi Pathian thu lunglut chih theih ahih apan Pastor, Evangelist leh Saptuam makaite pangkhawm in Hotdamna thu houlimpih in counselling naktak in neih pih ahihnung in, amaute’n Jesu Khrist Lal leh Hondampa ding in sang ua, September 19, 2018 in Bialtu Pastor khut ah Baptisna piak in om uhi. Nungzui muan huai hong hihna ding uh ban ah tunung adia miphatuam a hong suahna ding un thumpih ni.

2. Field Nuai a Department Khawmpi leh Field Kumsim Khawmpi Zoh hita:

(a) Field Baptist Youth Fellowship: Field BYF in September 01, 2018 in EBCC Rongchingri ah khochih BYF makaite paikhawm in Vaihawmna Khawmpi nei uhi. Hiai hun ah Budget 2019-2020 leh Work Plan for 2019-2020 bawlna nei uhi. Budget Ceiling ding in muhna leh zatna kikim Rs. 65,000.00 pom uhi.

(b) Field Baptist Dorcas Fellowship: Field BDF in September 8, 2018 in EBCC Rongchingri ah, khuachih BDF memberte paikhawm in Work Plan leh Budget 2019-2020 genkhawmna nei uhi. Budget Ceiling ding in muhna leh zatna kikim Rs. 80,000.00 pomna nei uhi.

(c) Field (Native) Kumsim Vaihawmna Khawmpi leh Ordination: September 17, 2018 in Field (Native) Kumsim Vaihawmna Khawmpi leh Ordination Programme EBCC Rongchingri ah nuam leh manphatak in zang zou uhi. Hiai Vaihawmna hun ah Field Level Committee Memberte ban ah khua chih Saptuam makaite mi 103 vel paikhawm in vaihawmna nei uhi. Budget 2019-2020 ceiling ding in muhna leh zatna kikim Rs. 17,07,000.00 kituaktak a pomna nei uhi. Vaihawmnate zoh fel ahih in Ordination Service Field Superintendent in makaih hi. Upa ordenna tang thakte: Elder Elison Rongpi, EBCC New Langrik leh Elder Horen Teron, EBCC Bithilangso te hi uhi.

3. Bial Kumsim Khawmpi: September 07-09, 2018 sung EBCC Diphu intekna in Bial Kumsim Khawmpi 4 veina nei uhi. “Nang Vualzawlna Hi In” chih thupi pansan in thutak genna Rev. S. Gin Malsawm, Director of Social Development, EBC in zang hi. Bial Kumsim Khawmpi 5na (2019) a Chairman, Vice Chairman, Sercretary, Asst Secretary ding in Upa Vanlalmuan, Upa V. Thawngzalian, T/Upa T. Ginvanglian, T/Upa T. Kaikhenmung telching uhi. Budget 2019-2020 Ceiling ding in muhna leh zatna kikim Rs. 30,00,000.00 pomna nei uhi.

4. Saptuam Vehna Nei: Tualsung Baptist Dorcas Fellowship, EBCC Rongchingri in Year Plan khata a neih dungzui un September 02, 2018 in EBCC Hidim Teron vehna nei uhi. Hiai vehna hun ah Assistant Field Superintendent Rev. Jameson Bey in thugenna hun zang hi. Vehtute leh Veh-a-om khuaten nuam leh manpha sa mahmah uhi. TBDF EBCC Rongchingri in Local Saptuam zat ding in Labu 5 leh Holy Bible khat piakna nei uhi.

5. Anngawl Thumna nei: 5Km Rongchingri Fellowship in September 4, 2018 in Evan. John Milik leh Evan. Johnson Terang makaihin An ngawl thumna nei uhi. Amaute’n a ngaih poimoh mahmah uh ahihleh a kim leh kiang ua ginglou omte’n Pathian theihna hon neih ua, Jesu Khrist Lal leh Hondampa a san theihna ding uh leh huai mun-a gingtu tamlou omte’n ginna kiptak toh dingkip a kim leh kiang a theipihna nasep a neih theihna ding uh ahi.

6. Khristian Thilpiak toh kisai Seminar: Jeteplong Fellowship enkol a om Evan. NK Naulak leh Evan. Sarthe Hanse vaisaina toh September 23, 2018 in Khristian Thilpiak toh kisai One Day Seminar nei uhi. Hiai hun ah thugenna leh sinsakna Evan. JK Teron in thazohtakin nei hi. Phatuam mahmah dia lam-et ahi.

7. Local Papi Fellowship: EBCC Bithilangso ah Bialtu Pastor, Pastor Joel Hanse makaih in EBCC Bithilangso Saptuam a papi om tengteng One Day Fellowship, September 15, 2018 in nuam leh manphatak in nei uhi. Pastor Manthing, Dengaon Bial Pastor in thugenna hun zang hi

8. Field Report Pia in Kuan: Thanlon Division Kumsim Khawmpi-cum-Mission khawmpi ah Field Superintendent tel in Evan. Jacob Rongpi leh Evan. Sarthe Hanse te Field report pia in kuan uhi. Field Supdt. (Rev. M. Zalian Guite) in zing Devotion hun nih la a, Pathian ni sun in report piakna hun zang hi.

THUMNA POINT DINGTE:

  • Mijung area a ginglou tampi omte Khrist khebul a pikhawm a hong hih theihna ding un thum ni.
  • Waisong Rongkhelan Fellowship in kikhopna Inn ding kichian neilou, Biakin neukhat poimoh, Pathian kiang ah ngen ni.
  • 5KM Rongchingri Fellowship in Evangelistte makaih a thugen dingdan kisinsakna a neih uh hoihtak a zoh ahih man in kipahthu gen ni.
  • Evan. Khoyasing Ingti (tua Disama area a sem lel) tate Presila Ingtipi leh Serkha Ingti mitlam buaina a neih ziak un khua mu hoih theilou in om uh, Pathian hihdamna a tanna ding un thumpih ni.
  • Paklongkam area a om Mongolsing Ingti-te inkuan, Kangbura Ingti-te inkuan Pathian thu a lunglut bang ngei ua Khristian hoihtak hong suah theihna ding un thumpih ni.
  • Paklongkam area a Ingti khua a Fellowship kipan thakten amau a Biakin khat tunding sawm in kisuk tak in pang uh, a hong lohchin theihna ding un thum ni.
  • Sumpho Adong khua a gingtu i neih Sonjoy Taro, December bei toh kizui a a khua ua pan a nohkhiak ding a thusawm om thumna a leng i neih zel uh tuni chiang bangmah huai thuchiam khek a om nailou ahih man in a lungbuai mahmah thumna ah naktakin phawk ni.
  • Bithilangso kho kiang a Matipung khua aom Sivo Tokbi leh Soren Bey Pathian thu lunglut in Biakin hong kai zel uh. Khrist a hotdamna theih telna ahon neihna ding un thum ni.
  • Dengaon khua a om Mr. Rajen Hanse leh a inkuante Khristian hih a lunglut uh zak ahih toh kizui a counselling a kineihpih leh kiman mahmah hinapi a khote a lauh ziak in thupukna la ngamlou in om uhi. Toupa khasiangthou in hangsanna a piak na ding in thumpih ni.
  • Evan. Vungngaihnuam in Pathian vualzawlna tapa nei, kipah thugenpih kawm in a nu leh nau hong dam hoihzel na ding un thumpih ni.
  • Evan. Manzarual lawmpa (apasal) Bleeding ziak in damdawi in ah puaklut in om nilouh hi. Pathian khut thil hihtheih a damsak ahihna ding in thum ni.
  • Evan. T. Nengminlun tanu Manthianmuang kha khat valzek, Doctor in thumvei vel at ngai ding a chih ziak in December 2018 vel a a nihveina Operation ngai ding lohchinna ding in thumpih ni.

C. DHEMAJI MISSION FIELD:

KIPAHTHU GENNA LEH THUMNA DINGTE.

1. Amguri biakin huihpi mutsiat tunding nawn ahih ziak leh Lachangaon Biakin bawlna zohsiang ahih man in Pathian kiang ah kipahthu gen ni.

2. Field a missionaryte poimohna a zat ding DMC/ Imphal Division in Rs 20,000/- a piak ziak un kipah thugen ni.

3. Baptisma Program: Sept 11, 2018 in Evan. M Daizachin sepna mun Kapurdwa ah gingthak mi-11 in Pastor. S Thangbiakmang khut ah Baptisma tang uhi. Amaute damlouh leh baibawmna tuamtuam nei ahihban uah, dawi thu a kibum ziak a damlou thumna tungtawn a hong damkhia khong ahih man un thumpih ngai petmah uh. September 15, 2018 in leng Lakhipathar ah gingthak mi 3 in baptisma tang uhi. Baptisma tangthak te ziak a kipah thu i gen kawm in, Khrist adia gingtu muanhuai hong suahna ding un thumna in phawkchiat ni.

Baptisma tangthakte lak ah, Meithai nu Mrs Sumitra Gogoi a pianna pate’n a inkiang ua inn neuchik a bawlsak uah a tanu toh gentheitak in khosa ua, vuah azuk chiang ngial in a inn tentheihna hilou hi. Native worker Evan. Ngate kichi leh Evan. Chin te’n vehna a neih lai un a insung tutna ding omlou ahih man in a lupna tung ua khat a tut uleh kitan kha in, a bawlna ding Rs 200/- a puak sunsun uh va pia uhi. Ginna a hong hatsemna ding in thumpih ni.

4. Biakin honna leh baptisma program: September 23, 2018 in Amguri biakin tunding thaknawn a om Rev. T Thangzasiam, FS in honna leh latna nei hi. Hiai biakin huihpi mutsiat hun sawtkuamtak tunding louh a om nung a kibawlthak ahi. Biakin honna program zat ahih man in gingtu Mr Bhubon Pegu in Pastor. S Thangbiakmang khut ah baptisma tang hi. Biakin tunding nawn ahih ziak a kipahthu gen kawm in, Jesu Khrist ginna ziak a baptisma tangthak sanggampa thumna in phawk chiat ni.

5. Vok damlou thumsak hong damta: Amguri khua a i gingtu Mr Gunadhal-te vokpi’n nou a neihnung nipikal khat vel akipan damlou leh ann duhlou in om hi. Intekte leng lungkham lua uh ahih man in Pathian kiang ah thumsak leng hongdam ding ahi chih ginna hattak a neih man un, saptuam mipi leh semtute’n vokpi ading in, thumsakna nei uhi. Tu’n vok in an duh in damta ahih dan tua mun enkoltu Evan. Chinbiakmung apan kiza hi. Toupa min phat in om hen.

6. Biakinn honna leh seminar: Headquarters a heutute deihsakna ziak in EBCC Lachangaon, North Lakhimpur District sung ah biakin pucca building a bawlkhiak hita hi. September 28, 2018 in Rev. T Thangzasiam, Field Superintendent in honna leh latna nei hi. Hiai hun toh kithuah in seminar program sai a om in FS in “Christian Home and Resolving Conflicts in Marriage” chih thupi sinsakna nei in lohchingtak in zou thei uhi. Hiai program patma in Pastor. S Thangbiakmang khut ah Nupa kawp-12 te’n a kituak in kiten thakna nei ua, kiteng thakte thohkhawmte zang in mipin ankuang umkhawmna nei uhi.

7. Damlou thumpih ding: September 11, 2018 a baptisma tang, Mr. Lombit Ngatey khena damsiang thei tatak nailou in om hi. Biakin kikhop tanpha haksa sasek ahih man in thumna ah phawk ni. Huan Mrs. Pumoti Chintey w/o Numal Chintey leng a natna in pha thakdek dinmun in om hi. Aman nidang a puja kithoihna dia kigou gan sisan ana dawnkhak ziak in, khaniin in subuai den a, puja tundek chiang in puja kithoihna sa duh in zaudian khiak sek hi. Hiai buaina in phanawn thei dinmun a om man in saptuam te’n Ni 02/10/2018 akipan ni bangzah hiamsung Prayer Center ah giahlut pih uhi. Hongdam sianga khaniin in a taisanna ding in thumtu te’n theihtawp in thumpih chiat ni.

D. MANIPUR MISSION FIELD:

KIPAHTHU GENNA LEH THUMNA DINGTE:

1. Toupan September kha sung in Gingthak – 37, Baptistma tang – 03, Sawm-a-khat pethak – 03 leh Mimal Missionary vakna a pangthak ding mi 03 a honpiakte ziak in kipahthu gen ni.

2. Field a semtute’n ginglou mite lak a Mass counseling/Group evangelism a neih pih zelte un Jesu Khrist Lal leh Hondampa a hon san theihna ding un thumpih zel ni.

3. Field Kumsim khawmpi a thupuknate – Naupang Sunday Skul Committee function sak ding, Serafim team a thak a puah hoih ding, Tuailaite music training piak ding, Field Choir bawl khiat ding, Upatelna D. Phailian leh Nambolte a neih ding, leh Jiribamte biakin bawlna pangkhawm a huhna piak ding chihte ahi. Pathian vualzawlna tang a thupuknate amin thupina ding a field in a hon sep buchin theihna ding in thumna ah phawk chiat ni.

4. Semtute amau kia hilou a inkuanpihte, pianpih nulepa leh ulenaute tanpha damlouhna a tuah chiang un, genkhiat theihlouh haksatna leh buaina in semtute naktak in subuai pha hi. Tua ahih man in, semtute kia hilou a inkuanpihte tanpha a din chidamna hoih ngen in thumsak ni.

5. Tupdan, paidan leh nasep dingdan theisiam a semtute’n Toupa deihna bang a mataal zawsem a ahon sep theihna ding un Pathian kha ompihna ngen in thumsak ni.

6. Jiribam in Biakin nei nailou uhi. Tulel a biakna mun akizang ah tazolou in omta uhi. Jiribam a saptuam omte’n biakin hoihtak a hon neih theihna ding un Toupa kiang ah ngetsak ni.

7. Thamnapokpi a Conference –cum-Retreat Hall ding a kilam Field Superintendent in October 01, 2018 niin Pathian kiang ah honna leh latna nei a, zatpat hita hi. Toupa kiang ah kipahthu gen ni.

8. Field Kumsim Vaihawmna Khawmpi a 15veina Pathian ompihna toh hoihtak a zoh siang theih a om man in kipahthu gen ni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC