Gammial Aw | KTZ

Gammial Aw | September 2018

Amasa in Gammial Aw Simtute tengteng i Toupa leh Hondampa Jesu Khrist min in chibai aw. Jehovah Pathian in Mission Fieldte a thil thupi hon hihsakte, anuai a bang in enkhawm nawn ni:

Amasa in Gammial Aw Simtute tengteng i Toupa leh Hondampa Jesu Khrist min in chibai aw. Jehovah Pathian in Mission Fieldte a thil thupi hon hihsakte, anuai a bang in enkhawm nawn ni:
A. HIMALAYAN MISSION FIELD
1. BIHIDIN SAPTUAM A MUSIC TRAINING REPORTS:
Bihidin NEBC Saptuam leh Field BYF pangkhawm in Bihidin khua ah July 21-28, 2018 sung Music training nei uhi. Hiai training-na ah music instrument 3– Guitar, Drum leh Keyboard tumdan sinsakna piak hi uhi. Mr. Susan Rai leh Evangelist Philip Khapangee in Guitar sinsak ua, sintu mi 16 pha uhi. Evangelist T Ginzalun in Keyboard tumdan mi 12 sinsak a, Miss Anjalee Tamang in drum tum dan mi 11 kiang ah sinsak hi. Lohching leh gahsuahtak in zouthei ua, saptuam etkolna a phatuam mahmah ding a lam-et ahi.

2. FIELD APAN GBC A SINTHAK NIH KIBEHLAP:
Pathian in Field a nasepnate a gah ahunhun a muh ding hon piak zel ziak in kipahhuai i sa hi. July kha in Grace Bible College a laisiangthou sin ut mahmah tuailai nih; Mr. Subash BK leh Mr. Aashis Payangu-te’n Bachelor of Theology leh Diploma in Theology sin in College kai in omta uhi. Lamzangtak a a hon sinzom theihna ding un thumna ah phawkni. Tuin Himalayan Mission Field apan in Grace Bible College ah sintu naupang tua i gen mi 2 toh 6 omlel uhi.

3. PHATNA LEH THUMNA DING:
1. July 2018 khasung in Pathian in Gingthak mi 11 leh Baptisma tang mi 2 a hon piakte ziak in kipahthu gen ni. Khalam a hong khanletna ding un thum zom laini.
2. Himalayan Mission Field Office leh Quarter ding Bhuttabari mun a inn kichian leh hoih mahmah i muhtak man in kipahthu gen ni. Tuin Office leh Quarter luah in omta hi.
3. Himalayan Missions Field ah assignment piakthak a om: Pastor Dilip Kumar Samal, Assistant Field Superintendent, Birtamode Field Sub-Office leh Evangelist Suanboy Vualnam, Office Assistant, Bhuttabari Field Office-te’n a nna uh kizentak leh thanuamtak a a septheihna ding un thumpihni.
4. Field Annual Khawmpi, September 27-31, 2018 sung Birtamode ah neihsawm uhi. Hiai hun a thugentu ding Rev V Thangkhangin leh Rev S Gin Malsawm-te kisakkholhna hoihtak a neihtheihna ding un thumsak ni. A hun leh mun a buaina bangmah omlou a zat ahihna ding leh palaite leng kimtak a a tel theihna ding un thumni.

B. KARBI ANGLONG MISSION FIELD:
1. GINGTU KIBEHLAP:
Karbi Honghari background a kipan Mr. Chesong Kro s/o Mr. Khojasing Kro leh Ms. Pratima Phangchopi d/o Jiten Phangcho-te EBCC Rongali inteekna leh malakna nuai ah Pastor T. Pauzalian tungtawn in July 15, 2018 in baptistna tang uhi. Amaute toh kiton in Saptuam member hisa, Counselling neihpihna a Piangthak: Ms. Lina Hansepi, Mr. Pamson Rongphar, Mr. Willingson Hanse leh Mr. Mensing Hanse-ten leng Baptistna tang uhi.
July 25, 2018 ni in Bialtu Pastor T. Thanggoulian khut ah Manja Fellowship member mi thum Mr. Lalpu Guite, Miss Ngaihching leh Miss Veineichong-te leng Baptistna piak in om uhi. Amaute ziak in Pathian kiang ah kipahthu gen ni.

2. EVANGELISTIC WEEK:
July 5-6, 2018 sung, Rongali Convention English School in, EBCC Rongali ah, “Call Upon Him While He is Near” (Isaiah 55:6) chih thupi a neiin Evangelistic Week, nuamtak leh manpha tak in nei uhi. Evan. Robinson Teron thugentu in pang a, naupang 130 vel kihel thei ua, phattuampih mahmah uh chih report kimu hi.

3. SUMMER OUTREACH:
Field sung a school i neihte summer khawl hun suam in July 11-14, 2018 sung Summer Outreach programme thupitak a neih in om hi. Hiai Outreach ading in semtute group 4 a kikhen in Pastorte’n makaih chiat uhi. Tutung Outreach ah GBC a kai naupang suty paite bang zah hiam akihel theih man un manpha diak hia theih ahi.
Hiai Outreach tungtawn in, khua khenkhat a kipah mahmah lai un, khua khenkhat in, ‘Jesu thu na hong gen nawn himhimlouh ding uh’ chia khauhtak-a nial pawl leng om hi. A kihongte’n leng a poimoh ua, a kikhakten leng Jesu poimoh uh ahih man in Pathian kiang ah nasatak in thumpih ni.

4. SHORT TERM BASIC TRAINING:
July 25-28, 2018 sung EBCC Rongchingri Diphu inteekna in Field sung a Saptuam makaite ngim bikin the First Short Term Basic Training nei uhi. Training hun a sinsakna pete; Rev. Jameson Bey, Evan. Jamkhanmang, Evan. Jacob Rongpi, Evan. Chinkholal Lethil, Evan. T. Nengminlun, Elder Lipson Rongpi leh Rev. M. Zalian Guite hi uh. Thupi tuam tuam sinsak a omte, Church Administration, Evangelical Doctrine, Homiletics, Basic Account, Christian Etiquette, Bibliology, Soteriology, Christology, Eschatology chihte ahi. Sinsakte’n kizentak chiat a sinsakna pia uh hia theih ahih man in kitoudelh lam nawt i hi chiin lungkim mahmah uhi.

5. HIDDIM TERON QUARTER HONNA:
Lamka North DMC leh Lamka South DMC-te’n deihsakna lianpi nei a huhna a piak uh tungtawn in Hidim Teron ah semtute omna ding quarter hoih mahmah bawl khiak in om a, kipahhuai i sa hi. July 30, 2018 (Monday) in Hidim Teron Saptuam member a om thei teng toh FCWC memberte’n honna programme zang ua, Upa T, Khamzagou, Chairman FCWC in honna nei a Rev. Jameson Bey in Pathian kiang ah latna nei hi. Latzoh ahihtoh kiton in, semtu Evan. Manzarual in luah zuingal hi.

6. KIPAHTHU GENNA LEH THUMNA DINGTE:
1. Waisong Rongkhelan Fellowship memberte, mi inn a kikhopna neih lemtang gigelou chi in Biakin bawlna van ding kaikhawm ding in kisingsa lellel uh thumna ah phawk ni.
2. Mijung area ah gingtu tawmchik i neihte leh semtu i neihte tungtawn a Pathian lalgam keek ahih zel theihna ding in thum ni.
3. Field sung saptuam memberte leh Fellowship memberte Ginna a kiptak a kilam a a dinkip gige theihna ding un thumpih ni.
4. Field nuaia i school neihte, Summer khawl zou August in lut nawnta uh, buaina omlou kumtawptan a hoihtak a a kaizom zel theihna ding un thumpih ni.
5. Manja Hidim Teron mun a Pathian in mun-le-mual thak, Biakin thak leh Quarter thak a hon piak ziak in kipahthu gen ni.
6. Paklongkam area a Ingti khua kim a Khristian hih lunggulh: Harsing Kro, Kangbura Timung, Kangbura Ingti, Kejang Bey, Dhonsing Ingti leh Mongol Ingti-te’n Pathian Itna a theih chian theih ua Khrist khebul a hong pai theihna ding un thum ni.
7. Field nuaia i school neihte Government theihpihna lou a bing thei ding dinmun ahih man a, theihpihna lai tua kisai lellel navaktak a sai leh muh ahihvekna ding in thum ni.
8. Bokolia Langbungdingpi mun a om Mr. Langbirik Timungte inkuan, a lunggulhna uh bei mailou a khristian hoihtak a hong suah theihna ding un nasatak in thumpih ni.
9. Sumpho Adong khua a om Sanjoy Taro Khristian ahih ziak a khua a om thei nawnlou dia nohkhiak ding kichi, a thu paipai lai ahih man in Pathian in lampi hoihtak a gelsakna ding in thumpih ni.
10. Tulai in, Dengaon Saptuam leh Bisarpo saptuam salam khalam ah bah mahmah uh thumpih ni.
11. Paklongkam CES Bulding bang kisia bawlna Worker-ten nei ua, kilawm mahmahta, huchihlaiin a tung langva kise mahmah, mualphou lou a Pathian in a lampi a hon gelsakna ding in thumna ah phawk ni.
12. Ms. Rohila Tokbipi, Tari Adong Tokbi Arong hausapa Sondro Tokbi tanu Pathian thu lunglut mahmah a, kipiakna ding in a pan phaldeklou ding chih a lauh ziak in hong thuklut ngamlou; Pathian in a lampi ding a ngaihtuahsakna ding in thumpih ni.
13. Dengaon Area Virvar arong a Pathian thu lunglut: Sing Terang, Theang Terang, Samili Terangpi-te unau ban ah Longsodar Bey, Babu Timung, Engleng Arong Tongklok area-te Pathian kiang ah thumpih ni.

C. DHEMAJI MISSION FIELD:
1. Evan. Gounemlian in Community Lay Leaders Health Training Certificate (CLHTC) Phase-II, Dimapur ah vasin in lohching tak in hon zoukhia hi. Aman Oct 2018 velin Final phase zilzom nawn ding hi. Hichibang a semtute training neih zelna in semtute tha guan mahmah a, ministry ah leng zang manpha mahmah ua theih ahi.
2. Mr. Kumar Taw, Kapurdwa a om in khe-na (khe-bawk) nei in patau mahmah hi. Evan. Daizachin leh native Evan. ten counseling neihpih zel uhi. Pathian thu lunglut panpan ta, Pathian ni 3vei biakin kikhawm ta hi. Ama’n Jesu Khrist hondampa a honsan a gingtu hong suahna ding in thumna in phawkchiat ni. A tapa tuabang a na leng thumna tungtawn a damna ngah ahi.
3. July 13, 2018 in Pityangchapori mun a semtu Quarter ding kibawl honna neih in omta hi. Hiai hun ah Mr. L Suanthang Ngaihte. Commandant 31st BN. ITBP in Ribbon cutting leh thugenna hunzang in, FS in Pathian kiang a latna nei a. Mission Coordinator in thugenna hunzang hi. Hiai program zatna hun a uap Pu L Suanthang Ngaihte in program a gamlum sak mahmah ban ah, gingtu naupang chikchikte khamuan mahmah a theih ahi a kipahhuai i sa hi. Quarter chidam leh bittak aluah ahih theihna ding in thumna in phawkchiat ni.
4. Tulai in vuahtui tamziak in Assam gam mun tuamtuam ah tuikhang (flood) in, mi tamtakte’n hinna mansuah mahle uh, tuni chiang i semtute hi’in gingtute hileh Pathian kepbitna tanglai uhi. Kipah huai mahmah ahih man in hon kemtu Pathiang kiang ah kipah thu gen ni.
5. Date 21/07/2018 zinglam dak 2;30am velin Dhemaji area ah huihpi hattak nung in, Amguri a i biakin belh theih nawnlouh ding in hon mutsiat sak dimdem hi. Tuin biakin vante phelkhiak/hahsiang vek a om in, i saptuamte’n Evan. T Chinbiakmung makaih in gingtu Inn khat pansan in biakna sunzom thei liailiai uhi. Biakin tunding nawnpah lunggulh huai mahmah hi. Hiai thiltung ziak a gingtute khalam a nungtolh mai louhna ding un leh, biakin hoih zawsem Pathian in honpiak na ding in thum ni.
6. DWC/Lamka North Division-te’n Namgharia biakin mun ding a leisak na uh a biakin uh neu lawta hi. Amau biakin hoih zaw leh detdou zaw ding deih mahmah uhi. Bangchi dan hiam a biakin hon neih theihna dingun thumna ah phawkchiat ni.
7. Dunaguri khua a i biakin (temporary) bawlna gam neitu Mr Mohendro in mundang ah kisuan khe ding in hon chi hi. Biakna ding mun kichian Pathian in honpiak na ding in thumna ah phawkchiat ni.(Gam neitu tanu Miss Trishnamoni GBC a kaiin a hunlou tak a pasal hon neih ziak in, maban sunzom thei nawnlou in hong om hi. Apa’n ka tanu zilna na sutzop saklouh ziak un chidan in biakna mun hon phal nawnlou ding dinmun in om hi.)
D. MANIPUR MISSION FIELD:

KIPAHTHU GENNA LEH THUMNA A THEIH DINGTE:
1. Toupan July kha sung in Gingthak 04, Baptistna 16, Sawm-a-khat pethak 11 leh Mimal Missionary vaktu mi 06 a honpiak ziak in kipahthu gen ni.
2. Mass counseling/Group evangelism mun 10 a neih ding leh kha mangthang 100 tukum sung a mat ding chih field in target a neih lohching touzel in, mun 5 a neih hita a, Toupan Gingthak mi 26 honpeta hi. Local lamte kisakkholna, speakerte Pathian kha ompihna, counsellor-te Toupan manphatak a a zatna ding un thumpih ni.
3. Semtute’n ginglou mite houlimpihna a neih lellelte un Jesu Khrist a Lal leh Hondampa ding ua hon san theihna ding un thumsak ni.
4. Jiribam a semtu LC Seitamjit leh A. Govin tungtawn in Toupan gingthak hon pezel a, Biakin a tazoulou khop in omtheita. Kipahthu gen in, Biakin lianzaw hon neih theihna ding un thum ni.
5. Pastor Girani zi, Mrs Manglembi a sinkha a suang om RIMS ah 30/07/2018 in operation neih ahi. Pathian ompihna toh a hong damsiangna ding in thumsak ni.
6. Pathian ompihna toh Field Office hoihtak tunkhiak a hong hih theihna ding in thum ni. Tua ban ah, nasemtu ding mistry chitak, ginom leh fel muh ahih theihna ding leh nasep pat a hong hihtheih pahna ding in thum ni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC