July 2018

Amasa in Gammial Aw Simtute tengteng i Toupa leh Hondampa Jesu Khrist min in chibai aw. I Mission Fieldte a Toupa’n gah kipahhuai hon muhsakte, anuai a bang in enkhawm nawn ni.

A. NEPAL MISSION FIELD:
1. DHARAMPUR AREA YOUTH SEMINAR REPORT:
MAY 29, in Dharampur NEBC Biakin ah Pastor Padam Thapa area, khua 7 a kipan tuailaite paikhawm in, “One Day Seminar” nei uhi. Tuailai 55 paikhawm ua, Field Superintendent leh Evan. Prem Raj Bantawa Rai in sinsakna pia in, lohchingtak in zou uhi.

2. GROUP EVANGELISM REPORT:
May 24 a kipan June 2 sung, Tunibote Pastor Area Group Evangelism nei uhi. Khua 24 ah tanchinhoih genna hun zang thei ua, a lompi in gospel tracts 1,100 vel leh Thukhun Thak bu 45 hawmkhia uhi. Gingthak chiamteh theih mi 12 hiai hun sung in piak in i om a, Toupa min i phat hi, Hallelujah!

3. GROUP EVANGELISM REPORT:
Pastor Ran Kumar Sewa, Diwas Rai leh Janam Rai makaih in mi 18 in Tanglepa khua ah May 18 in outreach program, ni khat hun zang uhi. Tanglepa NEBCC Local Chairman, Secretary, Dorcas makaite leh tuailai tamkhop kihel thei uhi. Inn 70 a lut in chialpina bawl ua, lohching mahmah a theih ahi.

4. KIRTIPUR NEBCC IN STAFF QUARTER NEITA:
May 14 in Kirtipur Staff Quarter thak honna leh latna Field Superintendent in nei hi. Quarter thak ah native Evangelist Rakshya Dangali teng lut ngal hi. Hiai tan honpi Pathian kiang ah kipahthu i gen hi.

5. JORETHANG AH EBC FELLOWSHIP KIPAN:
Jorethang, Sikkim a i Field station 3na ahi. April kha bul in Evan. Thawnkhanlian leh a Zi, Evan. Chingkhongai te tenglut uhi. Amun a mual enchian a hun bangtan hiam a zat nung un, May 20 in Sikkim a station dang a semtu omsate toh, Jorethang khua a gingtu kikhopna kichiantak nei lou mi pawlkhat kaikhawm in EBC Jorethang Fellowship ana pankhia uhi. Ma a sawnzel theihna ding in thumpih poimoh hi.

6. KOLKATA EBCC TOH MISSIONARY DAY ZANG:
May 6 in EBCC Kolkata ah FS leh a inkuan ten Missionary Day zang uhi. “Kipak kawm in Toupa Nna sem un” chih thupi pansan in thutak annkuang luina leh Field Report piakna hun Field Superintendent in nei a, a lawinu Chingsiam in Mission Field a om sung Pathian ompihna leh thillamdang a tuah khenkhat sharing na hun nei hi. Manpha leh lohchingtak in hunzang zou uhi.

7. ANGEL ENGLISH SCHOOL:
Angkhop Local Saptuam makaihna a kiphutkhia, Angel English School, Pastor L Paukhankhup in April 19 in honna leh latna nei hi. Field Khawmpi 2016 in “Nepal sung ah Mission School khat bek hon hihen” chia thupukna analak uh sepzuina ahi. Angkhop Local Saptuam in amau intekna a ana pat uh ahi a, tulel in naupang 23 om a, UKG tan ah teacher 4 in seem uhi. Lamzangtak a hong paitouhzelna ding in thumna ah phawk ni.

8. KIPAHTHU GENNA LEH THUMNA DINGTE:
1. April khasung a Pathian in Gingthak mi 34 leh Baptisma tang mi 28 hon piakte ziak in kipahthu gen ni. Khalam a hong khan zel theihna ding un thumpih ni.
2. Mr. P Thangzapau, Shillong a om in Jorethang EBC Fellowship a zat ding Hollow Guitar khat hon piak ziak in kipahthu gen ni.
3. Biakin kilam thak, Haldibari, Basbari leh Ektin-te zat theih ding in man felta. Pathian kiang ah kipahthu gen ni.
4. Khedok Biakin kilam leh Padajungi Staff Quarter leng kizou dek mahmah ta. Hiaitan hon pi Pathian kiang kipahthu gen ni.

B. KARBI ANGLONG MISSION FIELD:
1. THU TUAMTUAM:
1. Jiteplong mun a Quarter Honna & Latna:
Jeteplong a semtute omna ding leh Fellowship neihna ding Quarter, zohkhiak ahih toh kiton in, May 24 in Honna leh Latna Field Superintendent in nei hi. A luah ding, huai mun a semtute leng a ni mah in lut thei ngal ua kipah huai mahmah hi.

2. Anngawl Thumna Neih in Om:
(a) EBCC Rongchingri in 2018 Year Plan sepsuahna in May 26 in Saptuam a Department-teng pangkhawmin, Anngawl Thumna nei uhi. Hiai hun ah Field heutute ading, Headquarters heutute ading, Gamsung heutute ading ban ah khamangthangte a ding mahmah a thumna hun zang uhi. Hiai thumna hun honna leh khakna Assistant Field Superintendent in nei hi.
(b) Pastor Joel makaihin, ama bialsunga semtute fellowship leh anngawl thumna ban ah Rongchingri 5KM ah saptuamte tel vekna anngawl thumna leng nei uhi. Saptuam mipi kisuk a pang siau siau chiat uh ahihdan report kimu hi.

3. Mijung Area ah non-School Children Lai Hilhna bulpat in om:
Mijung Area a Sarthe Terang khua leh a kim khuate a naupang mawltak a hong khangkhe dingte awlmohna toh, laisim leh gelhdan sinsakna, Evan. Kaplun te nupa in amau in pansan in ana pan uhi. Hiai tungtawn mah a Tanchin hoih thehzakna leng a hong lemtan ngei lamet ahi. Hiai kisinsakna ah naupangte kia hilou in piching leng bangzah hiamtak tel ua, phattuampih mahmah uhi.

4. Director Missions, EBCC in RongAli Biakin Honna & Latna Nei:
Kum tampi mahmah Rongali biakin lama om, Pathian leh heutute deihsakna ziak a zohkhiak a omta, Director of Missions, EBC in May 27 in, Pathian min a Honna leh Latna nei hi. Hiai hunah, field sung, area tuamtuam a semtute, kho tuamtuam a saptuam makaite, Field leh Bial makaite tamkhop paikhawm ua, nuam leh manphatak in hun zang uhi.

5. Manja ah Ringwell Laih/Toh in Om:
Manja a Saptuam gam ah Manja Fellowship in Ringwell natou uhi. Avuh thoh a mun nih a lohsap nung un, lamdang tak in Pathian in Fit 24 a thuk ah tui hon pia hi. Member tamlou himahle uh kithutuak a apanna uh thupi leh etton huai mahmah hi. Tuin huai mun mah ah Biakin khat lam ding in Bial Working Committee te kisingsa lel uhi.

6. Director Missions in Field sung a Nasepna Pailelte Etna nei:
Rongali Biakin honna leh latna nei dia hoh Director Missions EBC leh Missions Coordinator EBC in May 27 & 28 in, Jiteplong, Bithilangso leh Manja a nasepna pailel te etkhiakna va nei uhi.

7. EBCC Rongali in Joint Fellowship Nei:
EBCC Rongali in, May 12 in, Bialtu Pastor makaih in Local Departmental Joint Fellowship nei uhi. Hiai hun ah kimakaihna, Biakna leh thu & la kisinsakna hun nuam leh manphatak in zang uhi. A telkha mite’n nuam leh manpha sa chiat ua, phattuampih mahmah ding ua lamet ahi.

III. KIPAHTHU GENNA & THUMPIH DINGTE:
1. Paklongkam area a Ingti khua ah Fellowship thak pat theih ding in Toupan kong hon honsakta. Fellowship kip leh muanhuai a hong khan khiak ngeina ding in thumpih ni.
2. Disama area a om Udeng Chondro Rongphar khua ah hun lemtang omhun a Evangelistte lut ding in Plan guan in om. Khasiangthou nasepna lamdangtak muh ahih ngeina ding in thum ni.
3. Disama area a om Sarsing Rongphar khua, nidang a Evangelistte lut theih ngeilouhna himahleh, thummite thumna ziak in, Tanchin Hoih gentheihna ding in kong hon in om hi. Hiai khua apan khamangthang tampi mat ahihna ding in Pathian kiang ah ngen ni.
4. Dengaon Jongthung area sung mi Pathian thu lunglut; Rongpi inkuante leh Terang inkuanten Pathian thu zak theihna ding hun lemtang a muhna ding un Pathian kiang ah thumsak ni.
5. Lumding Road a Rongchingri (5km) khua a om Mr Deepak Rai, a zi leh tate Khristian hikhinta, amah leng lunglut simta ahihthu zak ahi. Khristian diktak ahong suahna ding in thum ni.
6. Field sung mi, Tuailai mi 6 Bible zil lunglut hong om thakte ziak a Pathian kiang a kipah thu gen in, Pathian gam nasepna a ding a zattak leh suan huai ahong hih theihna ding un thumpih ni.
7. Field saptuamte lakah Sawm-a-khat leh Missionary Vakna pia awlawl a kibehlap theizel, Pathian kiang a kipah thu gen in, thilpiaka hausa Saptuam ahihna ding un thumpih ni.
8. Damlou: Jirka Phangchopi, Bina Teronpi, Sagar Tokbi leh Tracy Hathoih (Thyroid) te Pathian hihdamna a tanna ding un thumsak ni.
9. Evan. Jangkhohau Guite taksa hatlouh ziak a kienkol zel, deih bang damsiang / hat theilou, Pathian in damna a piak na ding in thumpih ni.
10. Evan. H. Jamkhanmang BP sang ziak a a chang a taksa nuamlou, a chi bang bawk theisek, a hong hat theih zelna ding in thumpih ni.

C. DHEMAJI MISSION FIELD:
THU TUAMTUAM:
1. May kha sung in Evan. H Khankhual te sepna ah gingthak mi-3 te’n FS khut ah Baptisma tang uhi. Amaute Khrist sepaih muanhuai hongsuah na ding un Pathian kiang ah thumna in phawkchiat ni.
2. EBCC Lachangaon biakin leh Pityangchapori a semtu quarter ding bawlna pai lel, zohsiang ahihna ding in thumna ah phawk ni.
3. Missionary day in Mr Biaklun Shoute in EBCC Dunaguri te khuang leina ding Rs 2,000/- pia a TBMC, EBCC Delhi (Dwarka) in Field Office a Strongbox leina ding a Rs 20,000/- pia hi. Thilpiak petute ziak a Pathian kiang a kipahthu gen in, A vualzawlna ngetsak ni. Tuin, khuang leh strong box leikhiak hita hi.
4. EBCC Shillong leh BYF Shillong te’n Dhemaji field a ding puansilh tamtak apiak te uh hawmkhiak vek hita. Gingtu te’n kipahpih mahmah uh. Field te awlmohna ziak a thilpiak kipiate ziak in kipahthu gen ni.
5. May 24, in Mr Rajesh Pegu te Inn, a kipatna theihlouh zinglam dak 3 velin kangtum hi. A tate textbook leh zanpuan chihlouh tuahkhiak neilou uhi. Thiltung theih ahihphet in, Evan.. H Nangkhankhual te nupa in um leh bel bangzah hiam toh delhpah uhi. Field Superintendent makaih in - Antang bag-1, Dal 2kgs, M. Oil-1ltr, Sugar- 2kg leh Salt-1kg ban ah Field in fund a neih dandan ua pan eu-khia in relief ading sum tamlou piakna va nei uhi. Hiai vangsiatna tuak i gingtuthak siatvatna in EBC Headquarters in Rs 10,000/-. Upa K Nengchinlian, Zenhang Lamka in Rs 3,000/, Pu Khaisiamlal Guite, Guwahati in Rs 3,000 leh Pu Sanglal Guite, Guwahati in Rs 1,000 in huhna pia uhi.
6. Pastor. S Thangbiakmang, Gall bladder stone ziak a Sielmat Hospital a Operation bawl, June 5, in Field damtakin tung kikta hi. Aman mimal, committee leh Headquarters a heutute tung leh thumpih tute tengteng tunga kipak mahmah ahihdan gen hi. Maban a sepna lohching sem a apai theihna ding in thumna in phawkchiat ni.
7. Tulai Evan. Thangbiaksuan sepna area ah doudalna tuamtuam om thei zeuhzeuh hi. RSS kichite pawl in tangval khenkhat Class neihpih zel ua, Mising nungak leh tangval amau pawl a lutte Rs 1,000/- khong lohding chiin zol uhi. Hiai area a semtu ten phone tungtawn a vauna leng ngah theizel uhi. Pathian kiang ah thumna in delhzui zel ni.
8. June 1-2, 2018 sung TBMC, EBCC Lamphel a kipan Upa. T Siamjik, Pu Dr N Khaizalian. Pu V Songzakham leh Nu Ngaizamawi te’n Field vehna vanei uhi. Amaute’n Station mun tuamtuam vehna nei ua, damloute thumsakna hun va zang zel uhi. Amau Ceiling Fan-2 leina ding leh Whiteboard - 1 leina ding a piak ban uah, Field a project paitou zelte awlmoh huai asak thu gen uhi. Hichibang vehtu neih semtute leh gingtu te’n kipah huai sathei mahmah uhi.

D. MANIPUR MISSION FIELD:
1. THU TUAM TUAM:
1. May 9 in Evan. (L) Nemzamawi in hon omlouhsan nung a kum 2 chinna ah, a pasal Upa H. Dongkhansiam in Manipur Missions Field a a seppihte program nuamtak MEBCC Thamnapokpi ah zatpih hi. Aman Office a ding Steel almirah leisak a, semtute kiang ah Notebook hoihtak leh pen a piak ban ah, ankuang umpihna leng nei hi. Ama kipiakzohna thupi leh etton huai mahmah hi. Toupan a nutsiat inkuante a khamuan a, missionary lungsim hon neih touh theih zel na ding un thumpih ni.
2. Nambol a Pastor Quarters kibawl May 19 in honna leh latna Field Superintendent in nei a, Semtuten luahpah ngal uhi.
3. Thamnapokpi a Retreat Hall kibawllel, Pathian ompihna toh bawlzoh pah ahong hihtheih nading in thumpih ni.

2. KIPAHTHU GENNA LEH THUMNA A THEIH DINGTE:
1. Toupan May kha sung in Gingthak – 07, Sawm-a-khat pethak – 13 leh Mimal Missionary Vak thak mi 4 hon piak ziak in kipahthu gen ni.
2. Mass counseling/Group evangelism mun 10 a field in neih ding leh kha mangthang 100 tukum sung a mat ding chih target a aneih uh a hong lohchinna di’n thum ni. Local lamte kisakkholna, speakerte Pathian kha ompihna leh ginglou mite’n Jesu Khrist thutak theihchetna tungtawn a Khalam Hotdamna kichiantak ahon neih theihna ding un thumpih ni.
3. Semtute’n Pathian thu a houlimpih uh, hiaite amin uh lou in thumsak ni – N. Thoibi Devi, W. Nganbi Devi, M. Abem, Sanou family, Nobo Singh, W. Sobota Devi, O.Ibecha family, M.Kunjarani Devi, M.Bibika, N. Thoibimacha, Jamuna, Priya, Babita, Dhanachandra, Hero Singh, S.Vikas, Herojit, Indra, Inakhunbi, Megha, - (20). Amaute’n semtute tungtawn a Khalam hotdamna a hon neih theihna ding un thumsak ni.
4. Ningthoukhong MEBC Fellowship biakkhomna mun lemtanglou, field in puahthakna nei hi. Semtu Naba makaih khalam nasepna in masawn a, gingtu a hong kibehlap touh zel theihna ding in thum ni.
5. Thanga Chingkha Quarter lui in segawp hi. Semtu sum leh fellowship sum te ana kigumang thei zel. Pathian ompihna toh tukum sung a puah zoh dandan apuah field in sawm hi. Fellowship a hong khan zel a, biakin leh quarters puah hoih ahong hih theihna ding in thum ni.
6. Toupan May kha tan in gingthak 37, Baptism 02, Sawm-a-khat pethak 27 leh MMV 14 hon peta hi. Tukum a dia field in target a bawl piangthak - 100, Baptisma tang ding - 50, sawm-a-khat pethak - 50 leh MMV - 50 Toupa’n hon piakna ding in thum ni.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC