Gammial Aw | KTZ

Gammial Aw (October 2017)

Amasa in Gammial Aw simtute tengteng i Toupa leh Hondampa Jesu Khrist min in chibai aw!

A. NEPAL MISSION FIELD:
1. PATHARI AREA GROUP EVANGELISM:
Pathari bial Pastor huap sung a semtute leh gingtu bangzah hiam te’n amau area sung a gingloute lak ah tanchinhoih puanzakna August 7 – 11, 2017 sung nei uhi. Tuabang a sep sung un mi 132 kihoulim pih ua, hotdamna toh kisai counselling mi 24 neihpih thei uhi. Gospel laidal 280 hawmkhia ua, Thukhun thak bu 10 leng hawmkhia uhi. Group evangelism a neih sung un mi 6 in Jesu Hotdamna sang uhi. Toupa min phat in om hen.

2. LOCAL CHURCH SEMINAR PROGRAM:
Namlua NEBCC saptuam ah August 18-19, 2017 sung thupi 5 pansan in amau Saptuam bing ading in Seminar nei uhi. Hiai hun ah Area Pastor Dilip Kumar Samal in “Christian Family”, “Importance of Obedience” leh “Church” chih thupite zang in sinsakna pia hi. Thupi dang 2; Elder Mica Rai in “Christian Giving” leh Evangelist Philip Khapangi in “Importance of Worship and Fellowship” chihte sinsak uhi. Hiai seminar ah mi 65 kihel thei uhi. Songretar NEBCC ah leng Area Pastor Dilip makaihna in amah leh local Evangelist Philip Khapangi-te’n August 23, 2017 in Seminar thupi 3: Christian Family”, “Church” leh “Importance of Worship and Fellowship” chihte sinsakna hun zang uhi. Hiai mun ah milip 25 khawng kihel thei uhi. Saptuam mite’n a phattuampih ngei uh i lamen hi.

3. LAMKA NORTH DIVISION MISSIONS KHAWMPI:
August 11-13, 2017 sung Lamka North Division Missions Khawmpi, Bungmual EBCC a zatna ah thugenna leh field report piakna hun Field Superintendent leh Office Assistant in vazang uhi. Hiai hun ah Grace Bible College a Nepali student-te’n leng presentation lapawl 2 leh Nepali lam lahna vanei thei uhi. Field lam a omte adia exposure hun manphatak ahihman in chialtute tung ah field-te kipak mahmah uhi. Sepna leh sepgah kihilhtuahna hun omthei ahihna ah Saptuamte leh Field a omte tha guan tuan mahmah hi.

4. SUNNA:
August kha sung in i it mahmah i gingtu 2 in a tangtawn mun ding uh hon zotsan uhi. August 9, 2017 in Mrs. Sangita Thalang, kum 56, Tunibote NEBCC a om in hon beisan hi. Bhaise NEBCC Saptuam a i gingtu Mrs. Sara Rai, kum 26 mi in August 28, 2017 in hon beisan nawn hi. Amaute’n a nutsiat a innkuanpihte uh leh Saptuamte, Toupa khamuanna ngetsak ni.

5. PHATNA LEH THUMNA DING
i) August kha sung in Pathian in Gingthak mi 12 leh Baptisma tang mi 5 a hon piakte ziak in Pathian kiang ah kipahthu genni. Khalam a a hong khanlet zel theihna ding un thum zom lai ni.
ii) Goa a Eimi Fellowship in Uttarey Fellowship ading Labu leisak sawm ua leina ding leng FS kiang ah thonta uhi. Petute tung ah kipahthu i gen a, manphatak a zat ahihna ding in Uttarey Fellowshipte ading in thumni.
iii) August 29-31, 2017 sung Field Office ah Field Choir in lapawl sinna nei uhi. Kipahthu gen in mailam hun a leng la sinna a neih zom theih zelna ding un thumna toh a na pang ni.
iv) OTI Hosur a training lel Evangelist Sangbiakmawi lamzangtak a ahong training zom zel theihna ding in thumpih ni.

B. KARBI ANGLONG MISSION FIELD:
THU TUAM TUAM:
1. Gingtu kibehlap: Toupa Saptuam a- Kuhkaltak a Thummite, Itna leh veina toh Thilpiak pemite leh amun a theih bangbang a pangte malakna kigawmkhawm Toupa’n Vualzawltak a ngai ahi ngei ding a, August Kha sung in khamangthang Jesu Khrist khebul zuan a Tuiphumna piak theih mi 4(li) Toupa’n hon piak ziak in Toupa min i phat hi.

2. Seminar Program kinei: Field Working Committee in Year Plan 2017 a guante lak a poimoh mahmah khat Saptuamte leh a diak a Saptuam Makaite sinsakna Seminar a tam thei pen neih ding chih ahih bang in sepsuahna pai zom thei zel hi.
i) August 6, 2017 in Paklongkam leh Bisarpo Fellowship kigawm in EBCC Paklongkam ah; Christian & Worship, Christian & Development chih thupi a nei sinsakna Rev. Jameson Bey AFS leh Evan. H. Jamkhanmang in nei uhi. Mi tamtak kihel thei ua nuam leh manpha sa chiat uhi.
ii) August 15, 2017 in EBCC Bithilangso intekna in Bialtu Pastor Joel Hanse makaihin BDF lam ngim deuh in Khristian Numei Mohpuakna toh kisai kisinsakna Seminar neih in om hi. Hiai hun ah Evan. Jacob Rongpi leng sinsaktu khat in pang hi.
iii) August 20, 2017 in TariAdong, 5Km Fellowship leh Mijung Fellowship-te kigawm in EBCC TariAdong ah “Christian & Worship”, “Christian & Development” chih thupi a nei in Evan. Jacob Rongpi leh Mr Robinson makaih in kisinsakna om hi.

3. Saptuam vehna nei: Saptuamte khat leh khat kihanthawn a kilamtou tuah ding chih ahih mahbang in khua leh khua, Department khat leh khat kivehtuahna field in neizel hi. Tua sepsuahna in, EBCC RongAli, Tualsung Missions Committee malakna toh August 26 & 27, 2017 in EBCC TariAdong vehna nei uhi. Hiai hun in Thutak Ankuangluina hun Pastor T. Pauzalian, Upa Borop Rongpi leh Evan. J K Teron in zang uhi. Khalam poimoh piak kia hilou in Tualsung Missions Committee EBCC RongAli min in antang 50Kg leh Belpi khat piakna leng nei uhi.
Tualsung Baptist Saptuam Upa Committee EBCC Diphu in leng itna leh awlmohna liantak toh Manja Fellowship vehna, August 27, 2017 in nei uhi. Hiai hun ah Upa VL Muana in Pathian thutak genna nei a, Saptuam vanzat poimoh Toupa nitak ankuang a ding Tray leh nou bangzah hiam pia uhi. A haksa zaw a tuantual zawte kankuah thei ding a awlmohna leh veina guantu Toupa’n tamsem veina pethei ding in vualzawl hen.

4. Field BYF kitelna: August 28, 2017 in, EBCC Rongchingri ah FBYF term thak a vaipo ding kitelna leh Budget 2018-2019 ding guanna field in nei a, hiai hun ah mi muanhuai mahmah 9 vaipaw ding telkhia uhi.

5. Anngawl Thuman: August 25, 2017 in Pastor Joel Hanse makaih in, Bithilangso Pastor Bial in EBCC Bithilangso Biakin ah Anngawl thumna hun zang uhi. Hiai anngawl thumna hun ah mi 61 vel paikhawm thei ua thupi leh phattham ching uh sakin om mahmah hi. Thumna mah gingtute galvan hoih leh hat pen hi gige ahihman in maban ah leng naktak a neihtouh zel ahihna ding naktak in kihanthawn uhi.

6. Pastor Quarter Thuam: EBCC RongAli in tuma zek in pastor quarter thak heutute deihsakna toh nei ua, a sung vanzat kichinglou mahmah ahih lai in, Tualsung BDF EBCC RongAli in Kongkhak leh tolet teng ah Purdah kilawmtak pia uhi. Veina leh awlmohna toh hiai bang nahoih sem BDF RongAli phathuai leh etton huai mahmah uhi. Toupa’n tamsem semthei ding in vualzawl in makaih tawntung hen.

7. Biakin Suangphum Phum: EBCC TariAdong Biakin Bawlthak ding a heutute leh EBC pumpi malakna sepsuahna bulpatna hiding in August 20, 2017 in Biakin suangphum phumna Field Superintendent in nei hi. Hiai hun ah TariAdong, 5km leh Mijung a memberte tampi kihel thei ua, FCWC memberte leng bangzah hiam in uap thei hi. Toupa’n vualzawlna toh a opkhum mun a hih ding lametna toh thumna ah phawk zui ni.

8. Field Sung Puahna Nasep: Pathian leh heutute deihsakna toh Field sung puahna nasepna kineite maban paithei zel in om kipahhuai mahmah hi. Tuni chiang ah: Dengaon a lei sunna ding a retaining wall kibawl zoh hita a, a lei sun pen khallam a sun dia koih ahi. TariAdong a Well kitou lah Gas hoihlou om chih ziak in kidinkhawl tadih hi. Hiai mun a school kibawl pen a bang gua a ummai ngai ding dan a om man in kizou khethei nailou lai hi. Kum thak a zatman a zoh ngei ding lamet ahi. Hiai TariAdong mun ah Biakin bawl August 21, 2017 in kipan a a buaina bangmah a om kei nakleh tu September khasung a zoh theih dia ngim ahi. Pathian in mistry kizen leh feltak hon pia a nasep telh mahmah ua, a vanzat ding uh kingah zoulou lam ahi.

III. KIPAH THUGENNA LEH THUMNA DINGTE:
1. Pathian in August khasung a khamangthang mi 7 hon piakte ziak in kipahthu gen in amaute gingtu muan huai a hong hih touh theih zelna ding un thumpih ni.
2. Pastor T. Pauzalian Taksa hatlouh ziak a ki-check up sak a Imphal a hoh hoih lam nawt zel, a sepna mun hong tung a maban a sutzop theih nawntak ziak in kipahthu gen ni.
3. Evan. John Milik in Health Training phase 2 hoihtak a zou theih ahihman in kipah thugen in, phase 3 hun a leng bangmah buaina omlou a hon zoh theihna ding leh Field a ding vanzat phatuam a hong hihna ding in thumna ah phawk ni.
4. Elder Lipson Rongpi Electric a kisukha hun sawttak etkol in om a Saptuamte thumna ziak in tun damsiangta, a na sem zom theita, Pathian kiang ah kipahthu gen ni.
6. Mr. Naihsing Evan. Jangkhohau Guite Makpa/tanu pasal tulaiin Pathian thu hong lunglut in houlimpih theih in om hi. A thuzakte tungtawn a kha hihvakna a muh theihna ding in Pathian kiang ah thumpih ni.
7. Khristian lunglut mahmah: Mr. Madhoorjo leh Mrs Kasang Rongpharpite nupa 5km a om; Mr. Ali Sangma leh a inkuante Dengaon a om; Mr Babu Rongpileh a inkuante, Mr. Baliram leh a inkuante Bokulia a om; Mr. Jiten Terang, Mr Bidya Terang Mijung a om amauten a lunglutna uh mit mailou a a Jesu Khrist a hinna om mu dia khalam mit hihvak a om na ding un thum pih ni.
8. TariAdong area a om Mr. Sankar Chakma tapa Mr. Sunilmol Chakma damlou a om damna lunggulh mahmah, EBCC TariAdong in a thumsakna a neih uleh damdeuh a kitheih, aman ka damsiang chiang in Khristian ah ka lut ding chi, a hongdam a sa leh kha a damna ding in thum pih ni.
9. Bokulia area a Sumpho Adong mun a gingthak inkuan Longki Taro-te nupa a hat zelna ding un thumpih ngai mahmah uh. Mr. Rensing Tarote leh a zi leng Buhpal lakzoh chiang a Khristian a hong kipe ding chia kigen uh, a kigen bang ngei ua a taksuah theihna ding un thumpih ni.
10. TariAdong Biakin lam lel a om hoihtak a buaina omlou a lamzoh ahih theihna ding in thumna ah phawk tawntung ni.
11. October kha sung a khawmpi neih kisawmte lohching leh manphatak a zah ahih vek theihna ding in thumna ah phawk ni.

C. DHEMAJI MISSION FIELD:
1. EBCC PITYANGCHAPORI BIAKIN HON IN OM:
Director of Missions, EBC lemsak pihna bang in Date 19/8/2017 in EBCC Pityangchapori biakin honna leh latna Field Superintendent, Rev. T Thangzasiam in nei hi. Hiai biakin bawl ahih apan buaina tuamtuam khosung mite apan om zel mahleh thumpihna ziak in hiai tan kitung thei hi. Kho hausa leh khosung mipi tamtak in hiai biakinn honna hun uap ua kho hausate nupa Gamosa oh-sakna field in nei a, thugenna hun leng piak in om uhi.

2. PITYANGCHAPORI AH MI 3 LEH EBCC KANGKAN AH MI 6 IN BAPTISMA TANG UH:
August 19, 2017 ni EBCC Pityangchapori biakin honna leh latna neih ni mah in. Gingthak mi-3 ten Field Superintendent khut ah Baptisma tang uhi. Amaute Khalam pichinna ding in Pathian kiang ah thumna toh delhzui chiat ni
August 20, 2017 in Kangkan ah gingthak mi-6 te’n Pastor S Thangbiakmang khut ah Baptisma tang ua, sunnung kikhop in Sacrament annkuang umkhawmna leh saptuamte kisinsakna manphatak zang uhi. Nongtham akipan Evan. G Thonkhanlian, Principal LHS leh Evan. Thangkhansiam-te inkuan leh Saptuam mipi’n annkuang umkhawmna leng nei ngal uhi. Pathian kiang ah kipahthu gen ni.

3. MiCoGoj2017 LAUNCHING & PRESS INTERVIEW:
EBC in Mission nasep kum 50 chinna Golden Jubilee lopna November 30 - Dec 3, 2017 sung Centenary Hall, New Lamka a neih ding toh kisai nasep kipatna MiCoGoj2017-cum- Press Interview August 24, 2017 in Mini-Auditorium, Dorcas Hall ah neih in om hi. Hiai hun ah CEC, CMSC, DS, FS leh Dorcas Coordinator ban ah mi poimoh tamtak kihel uh. Rev S Vung Minthang GS in MiCoGoj2017 Launching program honkhiakna neiin Jubilee ding toh kisai nasep khiaksa leh sepzui dingte genkhawmna neih ahih ban ah, Executive Committee teng leh Field chih apan FS teng Press Interview neih in om hi. Hiai hun ah Dhemaji Field apan Field Superintendent leng kihel hi.

4. EBC MISSION CENTRE HONNA NEIH HI DING:
Field working committee thupukna bang in hong tung ding Nov 11 - 12, 2017 chiang a Dhemaji town a kibawl “EBC Mission Center” honna leh latna neih in om ding hi. DMC/LSD leh EBC HQ pangkhawm a kibawl ahi. Tukum field khawmpi omlou ding ahihna toh hiai centre hon hun in seminar toh kithuah field in neihsawm hi. Director of Missions in Centre honna leh Church Administration toh kisai sinsakna neiding a. Rev. V Nenglian, DS/LSD in Tangthupha puanzak ding dan sinsak ding hi.

5. KIPAHTHU GENNA LEH THUMNA DINGTE:
1. August kha sung in Pathian in gingthak EBCC Kangkan apan mi 6 honpiakte leh EBCC Pityangchapori apan mi 3 hon piakte ziak a a kipahthu gen in, amau gingthakte kemtu i semtute leh gingthakte khalam hong pichinna ding un thumna ah phawk ni.
2. Native Evangelist poimoh kinna omziak in, FWC thupukna bang in Mr Moina Mili (Evan. Khual Doley seppih ding). Mr Herbaswar Ngate (Evan. Daiza chin seppih ding) a lakthak in om uhi. Amaute Pathian vanzat manphatak hong hihna ding un thumna in delhzui chiat ni.
3. Tulai khovel paidan et in FWC in field sung koimun hiam a school ministry pat ding kilunggulh mahmah. Hiai ding toh kisaiin survey bawl ding phasak ahi. Pathian nasepna manpha leh gahsuah zawsem a hihna ding in thumna in phawk chiat ni.
4. Kristian tengteng mission field a kuankhe vek theilou i hihman in, a kuan khete thopna leh nasepna vanzat ding- Film show, seminar leh program tuamtuam a zatding a poimoh mahmah Power point/Projector Pathian leh a nasemte ittu mikhat in hon donate ziak in kipahhuai i sa petmah hi. Pathian tung ah kipahthu gen in hiai bang vanzat poimohtak hon donate tu ading in thumsak ni, Nov 11, 2017 chiang a Centre honna leh seminar kithuah program zat hun ading in leng kipoimoh pah ding hi. Pathian kiang ah ngen in thum ni.
5. Pathian in a gamna i sepna gah muh theih ding a vangkim a hon piak zel lai in, a lehlam ah setan in leng lam chi tuamtuam ah hon subuai sek hi. Hichibang hun ah semtu leh semtu kikal, gingtu leh gingtu kikal chidamna ding in thumna in phawk ni.

D. MANIPUR MISSION FIELD:
1. THU TUAM TUAMTE:
i) Naranseina saptuamte Pathian ompihna toh pung zel. Amau sound project a neih uh Mixer in samlai a hihman in nasatak in pan lalel uhi. ii) Toubul a saptuam a khan zel laiin, a biakinn uh a sita (L) Chouba chairman gam a kilam ahi. Ama sih nung in lemchan louh theihna chituam tuam om thei zel ahihman in, biakinn mun ding poimoh uhi. Thumna ah Pathian kiang ngetsak chiat ni.
iii) Awangjiri leh Khordak-te Biakkhawmna mun lemtang lou ahihman in amau plot Biakinn lamna mun ding poimoh mahmah uhi. Mun lemtangtak Pathian in ahon piakna din thum ni.

2. KIPAHTHU GENNA LEH THUMNA A THEIH DINGTE:
i) Toupa’n khamangthang mi 6, Baptistma tang 02, sawm a-khat petu 8 leh mission supporter 2 hon piakte ziak in kipahthu genni. Toupa’n gingthak leh thilpiak petute tamsem semtute nasepna tungtawn a hon piakbeh a, tunung a field/saptuam kitoudelh a hong hih theihna ding un thumsak ni.
ii) FWC thupukna bang in Mass Counselling program – Utlou, Oinam, Toubul, Nachou, Toubul leh Naranseina khuate ah October-November kha sung in field ah neih in om ding. Khamangthang tampi Toupa’n hon piakna din thumna in phawk ni.
iii) Field Kumtawp khawmpi vaihawmna 14th October 2017 niin Paite veng EBC biakinn ah neih in om ding. Thugenna Pastor Girani in “Thouni in lamni” chih thupi pansan in thugen dia, FS in Comissioning leh Lord’s Supper sai ding hi. Field in saptuam kem ding Upa kisam mahmah ahihman in mi ginom, chitak, saptuam it a hon piakna ding in thumna ah nakpi in phawk ni.
iv) FWC lemsakpihna bang in FBDF khawmpi Thamnapokpi ah nei ding. Miss Liankhoman DC in thu gen ding hi.
v) Counselling neihpih lel S. Baby Devi leh Kh. Naicy Oinam-te’n Thutak theichian a, Jesu hondampa a hong san theihna ding un thumsak ni.
vi) Field in One day Workers’ Nupa Seminar neih sawm ua, tua hun in Pastor Suresh pang ding hi. Pathian vualzawlna tang a program lohchingtak a zat ahih theihna ding in thumna ah phawk ni.
vii)Romila, Heisman khomi dawi in asawisak zel ahi. Gingtute thumna ziak in tu in hoih mahmahta a, Pathian gintakna hon neita hi. Ginna tungtawn a hotdamna kichiantak ahon neih theihna ding in thumsak ni.
viii)Gingthak Khomdonbi (Sarita nu) cancer in damlou hi. Pathian in damna a piakna ding in thumsak ni. Sarita mah leng maban ah Asian games ah kimawl din kisakhol lel hi. Pathian panpihna toh lawhchinna hong neihna din thumsak ni.
ix) Semtute’n khamangthang itna veina, nei a lungluttak a a hong sep ua, khalam khanlawhna in Manipur Field hong vehna ding in Pathian kiang ah ngetsak ni.
x) Pathian in khamangthang tamsem a khebul a tun thei ding a semtute hatna a piakna ding in thum ni.

© 2017 Evangelical Baptist Convention. All Rights Reserved. Designed By EBC