Editorial

Vualzawlna leh Hamsia

Na ma uah hinna leh sihna, vualjawlna leh hamsia ka koih chih tua a hon theihpih ding in lei leh van ka sam ahi. Huchiin hinna tel un, na hinna ding un nou leh na suante uh toh (Diut 30:19).

Hinna leh sihna, vualzawlna leh hamsia kichite thil kibang hetlou ahihhanga kinaih mahmahte ahi uhi. Leitung ah kuamah Pathian vualzawlna tangkhalou ki-omlou hi. Himahleh, Khristiante’n a kitheikhial sek thil nih om hi. Khatna ah, vualzawlna tang hihlam kiphawklouhna. Nihna ah, Vualzawlna i tan pen akizatkhelh man a hamsia suak thei a, tumah bang in hamsia a kichi zezente zong Pathian khut a a kipiakkhiak leh vualzawlna kalbi suak thei hi, chih ahi. Mi tampite leitung ah mi phazou kisalou, mi bang a neizou kisalou, piang vangsia kisa in mahni kihehsan, kingaisia in om uhi. Hiai dan a kingaihtuah mite’n midang neihte kia en uh a, Pathian in amau adia ahihsakte enlou leh mulou in om uhi. Mihing khat a i piankhiak nung i pumpi mahmah thilsiam thupi leh Pathian vualzawlna toh kidim khin ahihdan misiamten hichibang in a gen uhi:

Piano khat in key tuam tuam 88 a nei a mihingte bil in key 1,500 a nei hi. Mihing bil in polam apan thil ging (vibrations) second khat sung in 73,700 vei a za man, a chi uhi. Mihing mit pen thil neu etna (microscopes) leh thil gamla etna (telescopes) hi tuaktuak dia bawl ahih bang in aksi mel tampi dan a om a muthei a, ganhing neu chikchikte leng a vel thei hi. Mihing khepek guh 26 a kibawl hi-a tuate khutpi chia a lian omlou hinapi in hiai guh neu chikchikten pound 300 a gik mihing khat pozou uhi. Mihing lungtang khut-tum chia lel himahleh dakkal khat in 4320 vei a ki-pump (phu) hi. Kumkhat in nuai 40 vel sisan a pump chihna ahi. Tua dan in na sisan takkhat (vat khat) in second 22 sung in na pumpi a fangkual man hi. Hichibang thilsiam lamdang ahi, mihingte. Hichibang a thilsiam thupi leh manpha simmoh a, ngaineu a, bangmah lou dan a koih hetlouh ding ahi. Hiaite theichian mahmah in Sam gelhtu in “Na kiang ah kipahthu k’on hilh ding a; lauhuai tak leh lamdangpi a bawl ka hih ziak in” a chi hi (Sam 139:14).

Huan, vualzawlna pen ahi ding bang tak a zat ahih keileh thilsia tampi tungsak in hamsia tanpha suak thei hi. Huai ziak in, tulai a vualzawlna chi a i ngaih thupi mahmahte uh kipahhuai ahih zah zah in vualzawlna ngahtute’n Pathian lak ah mohpuakna lianpi a nei uhi. Sum leh pai hauhna in mihingte ading in inn-le-lou hoih, nek-le-dawn hoih zaw, siamna hoihzaw leh thilhoih tampi hon pia hi. Alehlam ah hauhsakna zatkhelh ziak in nupakal buai, insung kisia, thangtatna, lungngaih-mangbatna inkuan tampite’n neihloh uhi. Sum in thilhoih tampi a leitheih mahbang in thil hoihlou tampi mah leithei hi. Huai ziak in Bible in hichiin a gen hi: “Ni nuai a gilou hoihhetlou ka muh a oma, huai tuh, hauhsakna a neipa’n amah siatna dia a kep” (Ekl. 5:13) chi in. Melhoihna kichi khovel a miteng in a ngaihsang leh hamphatna tungtuan khat ahi. Melhoih ziak kia in leng khovel a mi minthang tampi om hi. Huchih lai in a kizangkhialte melhoih loute sang a hehpihhuai zaw tampi om veve hi.

Bangchik chiang a midangte adia vualzawlna hih na sawm a? chih dotna poimoh tak ahi. Hiai dotna na dawn ma in vualzawlna na tangkha ta hiam chih na dawn theih akul masa hi. I kampau zatsekte uh: ‘Kilohtawm kihi-a bangmah kineilou,’ ‘khaloh kikhamlou,’ ‘hun kineilou,’ ‘pilna-siamna kineilou,’ ‘kei leh kei kisikhop ka hi’ chihte ahisek hi. Hiai Toupa ngaih in a dik diam? Huchi taktak mah na hi hia? Toupa’n nang a hauhsakna a koihte ets. Thahatna, lunggel theihna, khut leh khe, mit, bil, chidamna, leh adang dangte vualzawlna thupipen pen ahi uh. Hiai sang a vualzawlna thupizaw a om kei, bang ziak in i chihleh midang hon piak hilou Pathian in tangtak a a hon piakte ahih ziak un tulai a branded i chihte sang in manpha zaw ahi. Adangte zaw leitung kumpite leh company khawngte bawlsa i kaihkhawmte ahi. Huai ziak in ahi Pathian in Abraham kiang a na van neih chilou a Nang vualzawlna na hi ding a chih. Nang mimal hinna pen Khrist a hihhauhsak a om a midangte adia ngaihhuai, nektham ching, lungmuanna, belh tham ching, a luanglet ahih nakleh thildangte a omsa ahi. Pathian hon piak na nuihmai, na kampau khum, na lamkhiak neih-le-lamte midangte ading a banglam hiam beek a vualzawlna hi ding in Pathian in hon siamthakta hen.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC