VUALZAWLNA NAAK

I damlouh chiang in hon panpih thei ding Doctor i naih a, sum i taksap leh a hon pezou dia i gintakte i naih a, mizawngte kiang’ sum kizong khollou hi. Tua mah bang in khalam a taksap neite’n amaute panpih thei ding khalam a hausate naih a kiphamoh uhi. Abraham leng mi tampite adia vualzawlna hiding in Pathian in a sam hi. Tulai saptuam i et chiang in khalam taksap nei, sawlsam tampi a om tuabangte taksap, an bang hi-a, kuan pe ding hiam chih theih haksa hi (Kah 4:3,4). I buaina tengteng pianthak louh ziak va chihvek ding in lah piangthak kitam mahmah taleh kilawm hi. Kum 1980 vel apan systematic a seminar, workshop, chialpina, camp, i neihtouh uh tuni tan i sunzom zel ua, gah hoih taktak om hiin i thei hi. Ahihhang in piangthak i tam hu in siatna a tawm tuan kei hi.

Ahihleh i buaina leh haksatnate uh sut leng buailouhna gam i nei kei uhi. Buainate hihvengna dia i damdawi zat gigete uh leng etthak tuak ahi diam chih in om hi. Tua i damdawi zatsekte uh bel; pianthakna, pianthakna, pianthakna, camp, crusade, adangdang. Hotdamna thu tawpsan lou a i gengen ding mah ahi, i nial kei. Program i zat teng ah Pathian ompihna toh lohching leh kipak tak in i zou thei zel uhi. Himahleh a chihnop huai hi. A piangthakloute i chialpi ding hitham mahleh a piangthak sate bang loh ding? Ahong bah chiang ua Pianthakna thu mah genpih thak zel ding maw? Toupa Jesu’n nungzuite nna a gotna ah “Nungzuite bawl un”a chi a eipawl in bel pianthakna mah i gen den a huchi dimah ahi diam? (Mat 28:19). Hiai khalam pichinna leh hinkho sangzaw pen a manman in gentheih ahikei a, a neite kia in gahsuah tak in a gen thei ding uhi. Khalam vualzawlna tangsate kia in midangte vualzawl thei ding uh ahih ziak in.

Gilgal Paikheng Kul: Elijah in a thakheng ding in a dialpuan Elishah a batsak khinta hi. Huai ziak in Elishah in ginom tak in Elijah a zui pah tettet hi (2Kump. 2:1). A kipatna Gilgal tuh Jordan lui kan khit a Israelte camp mun masa pen (Jos 4:19, 20) leh khangthakte zeksumna (Jos 5:2-9) kihihsiangna munpi khat ahi. Himahleh midangte adia vualzawlna hiding in Gilgal paikheng a kul hi.

Bethel Paikheng Kul: Bethel tuh Gilgal apan mel 15 khawng ahi a Abraham leh Jakob biakna mun (Gen 12:8; 13:3), Jakob leh Pathian kikholhna mun (Gen 2811-19) ahi. Hiai mun a omdet thil deihhuai ahikei, galzohna mun Jeriko tanpha tung ding a pai a ngai lai hi.

Jeriko Paikheng Kul: Jeriko bel Gilgal tumlam mel 15 vel gamla Kanaan gam a Joshua galzohna masa pen mun ahi (Jos 5:13-6:27). Akan khelhna mun leng ahi (Jos 7). Kulh thupipen leh gal lauhhuaipen kizouta ahih man in maban enlou a hiai tan a lungkim a tawldam phot Elishah adin baihlam mahmah ding hi. Himahleh Elishah tawldam a khaw thei ahi nai kei, Jeriko ban ah leng pailai a kul hi.

Jordan Lui A taktak a Thiltuah Etsakna: Tuanung in Jordan lui a hongtung ua hiai mun Elishah adin deihtelna bawlna mun leh mohpuakna got a omna mun ahi. Hiai mun a tuntak un Elishah deihtelna sangpen dot in a om hi. A lungtang deihtelna sangpen a puankhiak tak in a pu khatan nih a tung ah piak in a om hi.

Elishah, Pathian in a zat taktak theihna ding in khalam kalbi tampi a siksuak masak a kul hi. Athu lel a Pathian thilhihtheihna theihna apan a taktak a Pathian thahatna tanna Jordan tan a zuihsuak a poimoh hi. Khenkhatte Gilgal kheng in Bethel ah Pathian toh kithuahna mun nuamsa lua in a khawlden uhi. Himahleh Bethel khen ah Jeriko ana omlai hi. Gilgal, Bethel leh Jeriko i chihte Elishah khalam kalsuanna ahi. Jordan ah Pathian toh kituahna (encounter) ahon neih khit in Israel nam tung a vualzawlna ahong hita hi. Khalam pichinna leh gahsuahna toh kisai in bangtan kal na suan ta a le!

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC