Editorial

Jesu Khrist Mission Saptuam Mission ahi

Jesu’n a kiang uah, “Na tung uah khamuanna om hen, Pa’n kei hon sawl bang mah in nou k’on sawl hi a chi nawn hi” (Jn 20:21).


EBC in mission nna i sep nung kum 50 na mel hon musak Toupa min in chibai kon buk hi! Missionary Conference cum EBC Missions Golden Jubilee hunpi zang dia i kisak lai in lungsim ah thil tampi a hong lang hi. Jesu kichi ana omlou hihenla, Kalvari Khros kichi ana omlou hileh tangtawn a mangthang ding lai khut a lamlouh van sana khopi luah dia sisan a loubang hon khual Toupa min i phat hi. Ki-otsakna kampau hihetlou in, Evangelical Saptuam i na hihkhak i hamphatna ahi. Khamangthang veina nei a gammial kichihna munte a nasem thei a i om i hamphatna ahi. Khristian hisate lak a nasem a midang memberte guksak pawlpi i hih khaklouh leng i hamphatna ahi. Missions nasepna ah Saptuam kiptak a dinkhiak mateng mission nasepna bukim ahithei kei chih i gintak dan ahi. Tuaziak in EBC pawlpi in mohpuakna golpi nih a neih tuh: Mahni memberte kepna leh pawlpi polam a Tanchin Hoih puanzakna nasep ahi. Hiai tegel a paikhawm gige ding ahi a khat nelhsiah a khat uangbawl a dik kei. Khatveivei phatuamngai selua hiai tegel kikalh bang a gen khak dekdek in a om sek hi. Etsakna ding in, inkuan khosakna ah innsung nna a om a, inpolam nna leng a om hi. Inngak a insung nasemte leng apoimoh ua, inkuan kivakna ding a niteng a loukuan (or office kai, nasem etc) mite leng apoimoh uhi. Inkuan khosakna buai kichite sum taksapna kia ahikei a; sep ding sepkhak louh ziak leh seplouh ding sepkhak ziak ahinuam hi. Huai bang in inlam awlmoh luat man a mission nawlkhin a lauh huai a, mission awlmoh luat ziak a inlam ngaihsak louh leng adik tuan kei ding hi. Tulaitak in i budget ah 68% eisung kipuahna in i zang ua, 32% polam ah missions nasepna in i zang uhi. Tunung in bel 50-50 a sep theih hun om di’n i lamen hi. Mission toh kisai a Pathian honpi dan hiai dan in i en zual ding:

1. 1967 apan 2000 sung teng Mission bulpat hun, Field zon hun, missionary sawlkhiak kipatna, Field nasep patna hun leh saptuam phuh hun ahi. Hiai hun tuh Director of Missions
nei a kalsuan hun ahi.

2. 2000 apan tuni tan bel i Field neihsate phuhkipna leh intuan dia kisinsakna hun ahi. Hiai hun sung a intuanna dia kalsuan dan tangpite:
2.1. Training: Saptuam kepdan kisinsakna ki-uangbawl. Leadership kisinsakna hun ahi.
2.2. Mohpuakna gotna: Native Pastor leh upa tamsem bawlkhiak hun.
2.3. Field Fund: Field sum muhsuah HQ a khak nawnlou a amau kizek dia hamphatna kipia hi. Amau leh amau kitoudelh thei ahong suah ding uh tupna ahi.
2.4. Cross culture missionary hihtawm: A field i neihsate ah a gam mite’n intekna alak theihna ding ua cross culture missionary hihkiam hiaihiai hun ah kipan hi.
2.5. Upa ordination: Saptuam etkolna amau khut a om ahi chih a theihna ding un Upa Ordain theihna Field Khawmpi ah kipia hi.
2.6. Field thak zonna: Field neih kumluite awl a intuan khiak a Field thak lama tha tam zaw piak ding tup ahi.
2.7. Partnership: Missionary tamsem sawlkhiakna ding gelna in Partnership a seppih ding lawm zonna hiai hun mah in kipan hi.
2.8. Missionary Vakna: Ginna Thuchiam pen kum tamsim kizangta ban ah tulai mite’n ngim nei a thilpiak (objective giving) lunglut zaw leh gahsuah zaw dia lametna toh Missionary Vakna chi’n amin kikhek hi.
2.9. Mission Budget Tuam: Mission hihhat ding ngimna in Mission Account tuam vilvel in kum 2015 apan in Khawmpi in bawlkhia hi.

Tuin maban ah Field thak tamsem zon ding, India gam polam a i mel-le-puam kibatpih namte kiang a missionary sawlkhiak ding leh tua ding a International Agency khenkhat toh a lampi
ding kikupna pai lel hi. Missions Pathian lungdamna, saptuam damna, nam leh gam damna ahi. Jesu’n a nungzuite’ kiang ah bangmah dang a thukhak kei a Pa’n kei hon sawl bang mah in nou k’on sawl hi a chi hi. Amah tuh mangthangte zong a hondam ding a hong pai ahi (Lk 19:10). Toupa’n EBC Mission saptuam hisak semsem ta hen.

© 2017 Evangelical Baptist Convention. All Rights Reserved. Designed By EBC