Guest Editorial

“Bangchi’n hiai khelhna liantak hih in Pathian tung ah thil ka hihkhial thei dia?” a chi hi (Gen. 39:9b).
Tu Kha i thupi “Khrist hihnate hinkhiak pih dia kilamthakna” ahi. Piangthak tengteng Kha Siangthou in hong sungluahta hi (1 Kor.6:19b). I pianthak ma a mihing hatna kia a - sepkhiak vuallouhte, kidek vuallouhte leh ngaihtuah khaklouhte - hong sungluahtu Kha Siangthou thahatna leh thilhih theihna koppihta in, semkhe theita, kidek zouta, phawkkhe theita leh i hinkhuate a hinkhiak pih thei dinmun ah i dingta hi, Hallelujah

Kha Siangthou huhna toh Khrist a om diktatna, lungnopna, lemna, thuak theihna, sianthouna, muanhuaina, nunnemna, kidek theihna leh itna hinkhiak pih theita i hih lai a, piangthak tampite’n i theihkhelh om khanak “Ei panlak kullou a, Kha Siangthou in hong hihsak/zohsak vek ding a ngaihtuahna neih” ahi. Piangthakte’n i dihmun kitheichian a, tuabang a panlak ding ahihdan Laisiangthou ah hichiin hon sinsak hi:

Khatna: I mihing lui (khelhna hinkhua) Khrist toh kilhden in om ta chih kithei gige a, hiai kitheihna ziak a mihing lui a gamtang thei nawnlou Zeng bang (Paralytic) a omsak ding a koih dia panlak ding (Rm.6:6); i mihing lui, pumpi sithei pen a, khelhna vaihawm sak nawnlou dia panlak ding; i pumpi hiangte leng khelhna vanzat dia pephal nawnlou dia panlak ding (Rm.6:13), i mohpuak hita.

Nihna: I pumpi hiangte diktatna sikha leh vanzat dia Pathian kiang a kipe dia panlak ding (Rm.6:19); Thukhun Lui hun a Pathian pomtak leh lungtuahna dia ganta sisan a kithoihna lat bang hilou a, i pumpi a hinglai a Pathian lungtuak leh pomtak ding a kilan khe dia panlak ding (Rm. 12:1); Pianken thak, diktatna leh sianthouna a Pathian batpih a siam pen muhtheih puansilh bang a muhtheih hinkhiakpih a silh ding (Eph.4:24), i mohpuak hita hi.

Joseph in, tuaidawng sa-utna hattak a neih hun himahleh, Pathian ta a hihna leh Numei-Pasal kipolhna thanghuai Pathian deihlouh thilhih, khelhna ahihman in, taikhiaksan di’n panla teitei hi. Amah hihna kitheichian mahmah ahihman in “Bangchi’n hiai khelhna liantak hih in Pathian tung ah thil ka hihkhial thei dia?” chi thei hi. Joseph bang in Piangthak michih in i hihna leh dinmun kitheichian gige lehang, Khrist hihnate hinkhiak pih gige ding hi hang. Hiai bang hinkhua suahkhe ding in Pathian in hon lamen hi.

Rev Paukhanmang Guite,
Director of Ministries

© 2017 Evangelical Baptist Convention. All Rights Reserved. Designed By EBC