BYF, BDF, BCD Corner | KTZ

Dorcas Corner | Sept. 2018

1. DORCED huhna thilpiak kibehlap zel:
Mr. Khamthianmuan, s/o (L) Thangkhanmuan, EBCC Tuithapi a om, a nu le pa sihsan ziak a Dorced in sanggamte nih kichawmsak a khat in Class XII zouta a, a neuzaw pen in Class VI simlel hi. Aman Manipur Govt. nuai ah Police Department a sepna neita ka hihman in Dorced in hiai tan non na huhna uh ka kipaklua chi in kipahthu genna in a khaloh lak masak pen in Dorced huhna ding in cheng 10,000/- Dorcas Hall ah a hong pia hi. Aman tua non chawmsak lai pen uh loh neita ka hihman in ken ka na chawmta dia, amah mun ah midang huhtuak khat na guang un chi hi. Kipahhuai petmah Pathian in amah leh a naute vualzawl zel hen aw.

Nu N Zenzaniang, EBCC Shillong in Dorced huhna ding in ahihtheih bangbang in Rs. 4,500/- a na pezel a tukha inle hon penawn a kipahhuai mahmah hi, Pathian in vualzawl zel hen aw.

Bawldikna: Khalui a Dorced huhna Singngat Division kichi pen Division hilou in Singngat Local Dorka Pawl hi zaw hi.

2. DORCED Tailoring Training Centre Masawn zel:
Sintex 1000 ltr thoh uh – Puankhui zilte tui koihna ding a poimoh mahmah Sintex 1000 ltr. a lian Lamka South Division Dorka Pawl in Dorced Tailoring Training Centre ading in hon thoh ua kipahhuai petmah hi.

Puanthan thoh uh – EBCC Shilong Dorka Pawl in Training Centre a puankhui zilte kisinna ding puanthan chituamtuam Rs. 10,000/- man lei in hon khak ua kipahhuai mahmah hi.

Limlang pia – Nu Niangzangai w/o L Thongzatun, EBCC Lamphel Dorcas Commtt. in i centre ading a vanzat poimoh limlang lianpipi 2 hon thoh a kipahhuai mahmah hi.

Khuang thoh – DORCED Trailoring Center a puankhui kizil aomte devotion hun a zat ding un khuang hoih mahmah nu Mankhodon, New Lane Buangmual in hon thoh nawn kipahhuai mahmah hi.

Puankhui zilna mun ading vanzat poimoh tampi i neih lai un mun tuamtuam a Dorka Pawl tuamtuamte leh mimal tampi i pankhawm siausiau ziak un kha khat lel paipan himahleh Pathian vualzawlna ziak in i training Centre ah bangmah tasamlou bang hial in i om ua kipahhuai i sa petmah hi. Pathian nasep leh Nnahoih sep i kithalop siausiau ua tua vualzawlna i donte ban ah a poimoh omleh hon hilh un kong pan theihna om hiam a chi leng i omlai uhi. Hiaite tengteng ziak in Pathian in thupina tang henla, Pathian in a petute leh azangtu dingte vualzawl chiat hen aw.

3. TUNDINGNA NASEP ETTONTAK:
Lamka North Division Dorka Pawl in Meithaite Tundingna kum 2015 apan a na pat uh tukum tan inle sunzawm theizel ua hiai a nuai a bang in sem uhi:
2015 kum a mi 12 kiang a kitunding na din asum in Rs. 1,05,000/- hawmkhia uhi.
1. Siamgatna khawl mi 4 kiang ah pia uhi.
2. A sum tang in mi - 8 kiang ah pia uhi.
2016 kum in mi 13 kiang ah a sum in Rs. 79,000/- hawmkhia uhi.
1. Siamgatna khawl mi 3 kiang ah pia ua
2. Puankhuikhawl mi 1 pia uhi.
3. A sum tang in mi 9 kiang ah pia uhi.
2017 kum in mi 13 kiang ah Rs. 1,15,000/- hawmkhia ua –
A vek un a sum tang in pia uhi.
2018 tukum in mi 8 kiang ah Rs. 1,12,000/- hawmkhia uhi.
1. Siamgatna khawl mi 3 kiang ah pia ua
2. Kawltu Heekna mi 2 kiang ah pia ua
3. Dawrneu bawlna ding mi 1 pia ua
4. Ak vulhna ding mi 1 pia in
5. Langva mi 1 kiang ah pia uhi.

Tagah genthei lam a banzak a a na nasepna uh thupi mahmah kipahhuai i sa hi. Pathian in LND BDFte pethei zel ding in vualzawl hen.

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC