BYF, BDF, BCD Corner | KTZ

Naupang leh Nungzuihna

Nungzuihna akigen chiang in pichingte adia koihdeuh in a om kha nak hi. Ahihleh, naupangte’ Khristian hihna bangchi bang Khristian ahidia le? Kong khat ah, naupangte nungzuihna’ la chiktak i zilsak uh a – Jesu nungzui ding in ka kipanta kiknawnlou ding, kiknawnlou ding. Kong dangte ah, adiak in innsung ah, Khrist tanchin i kisinsak tawm mahmah zel uhi. Khrist nungzui dia lamen mahmah hinapi in a zuih di uh thildang tampi limlah lah deuh kihikha ding hi. Naupangte’n dotna poimohtak bawl thei di’n koih le, hiai bang hon dong di un gintak huai hi – Kou Jesu nungzui di maw? Kou bangchi zuih di? A tak in hon dong kei tazong un, hiai dotna i dawn sak uh poimoh ahihdan thei thak le lunggulh huai hi. Hiai dotna dawnsak lunggulhte ading in a bulpatna ding saulou anuai a bang in ka hon taklang hi:

Khrist nungzuihna kichi ei deihdan a bawl lem theih ahikei hi; leitung a heutu kuahiam i zuih bang a “criteria” bawltawm theih ahikei. Laisiangthou ah Jesu’n a nung i zuih didan kichiantak in hon taklat sak hi. Tuabang a i zuih keileh bel a nungzui kichi nakkhem lehangle Jesu’n a nungzui bang a hon simlou ding hi. Tuabang ahihman in, naupangte’n zong Khrist nungzuihna a ngaih khawk uh kisam hi. Tua ding in, a kemtu/a chingtu nu-le-pa leh sinsaktute’n i ngaih khawk poimoh masa hi. Ahihleh, Toupa Jesu in nungzuihna toh kisai bang a gen a? “Kuapeuh ka kiang a hong pai in, a pa, a nu, a zi, a tate, a unau a sanggamnu, leh ama hinna nangawn a huat kei leh ka nungzui ahi theikei ding. Kuapeuh a Kros pua a hon zui lou ka nungzui ahi theikei ding” (Luka 14:26-27 BSI Revised Version)

Theih kokalh di hiam, theih buai di hiam ahihkeileh zuih buaihuai di’n ahon genkhe hetkei hi. Chiangtak, mawltak leh tangtak in a hon sinsak zaw hi. Khenkhat in bel, bangziak a i it leh ngaih teng huat ngai ahia? a chi sek uh a, himahleh Jesu’n tuabang hon sinsak ahi zenzen kei hi. Eimahmah leh naupangte i sinsak ding hiai ahi zaw ahi ~Khrist sang a it zawk leh deihzawk ding bangmah omlou ahi~ Nu-le-pa, sanggam, leh i itpente tengteng’ ma ah Jesu Khrist a om ding ahi. Huchi ahihleh, khovel thilte; siamsinna, smartphone, TV, internet, kimawlna vante tengteng bel, Khristian naupangte adi’n, anuai lam pek ah a om ding uh chihna hilel hi.

I naupangte, i tate’n a nungzuihpa uh a thei taktak na uhia? It di khop leh khovel nung ngatsan ngam khop in a theichian na uhia? Khovel leh hinsan i sutdan velchian thak ni, unau.

© 2017 Evangelical Baptist Convention. All Rights Reserved. Designed By EBC