Articles | KTZ | EBC

Pathian in Europe a Amah nasem dia hon sapna

Testimony

Amasa in simtute i Toupa Jesu Khrist min in chibai kon buk hi!

Pathian pina ziak a Laisiangthou sin a ka omna toh kisai thu tamlou KTZ a gelh dia heututen hon hanthawn leh hunlem hon bawlsak ziak un ka kipak hi.

Pathian pina ziak in, Pune University apan a M.A. ka zoh in Göttingen University, Germany ah M.A in Intercultural Theology sin ding a telkhiak in ka om hi. Hiaite ka zilzoh nung in hiai mun mah ah Ph.D. Doctorate (Religious Studies) ka sun zawmtou hi. Himahleh tua ka zillai ka zohma in full-time a Pastor nasem ding a Pathian sapna ka tan ziak in tua ding in ka kipekhia hi. Huchi in, 2017 September apan in University of Oxford leh Baptist Union of Great Britain nuai ah Laisiangthou sin ding leh Pastor training ding in admission ka ngah hi. Tulel in, Oxford a Baptist saptuam khat ah Student Minister (Asst Pastor) hon semsak uhi.

2005 kum a Tuailai khawmpi EBCC Upp. Lamka a omlai in Jerry Harding thugenna tungtawn apan in Europe gam a missionary nasem ding in ka na kipekhia hi. Huchin, 2016 kum in, Toupa’ houpihna chiangzawsem a thei in Germany a gamdangmi (international) omte, adiak in University Student leh young-professionals te’ lak a Pathian thugen ding leh saptuamte kem ding a sapna ahi.

German gam neuchik ahih hang in, Gam hausa leh khangtou mahmah ahi. Huchi ahih dungzui un, khovel pumpi etlah tham University tampi, Company lian taktak leh Business centre thupi taktak om a, kumteng in khovel pumpi mun tuamtuam apan in student leh young professional tampi petmah hiiplut zungzung uhi. Himahleh, Germany pen, nidang bangloutak in, Saptuam leh Khalam ah nakpi tak in keniam uhi. Nidang a biakinn alian mahmah leh alun mahmahte kiam hulhul ta, pitek-putek tawm chik khong lel Biakinn ah muhphak ding omna tamta hi. Tua ban ah, sepna leh laisimna ziak a, German gam a hong lut gamdangmite German pau zilmanlou leh pautheilou tampi om uhi. Tuabang mite’ ading in, Ministry leh Biakinn kiningching omlou mawk a, adiak in Germany suahlam ah (Eastern Germany) bang ah Khristian 10% khong chauh om hita mawk uhi. German gamte kia hilou in, tulai in ei lak ah leng mitampite hau hulhul leh pil kisasemsem in Pathian i gamlat hiaihiai ta uh hi’n ka thei hi. Huai ziak in, eite tuabang a i omlouh ding uh ahi!

2014 apan in Germany ah International Baptist Convention (IBC) nuai a local saptuam khat ah member hihna ka la hi. Kum bangzah hiam IBC ah kikhawm leh ministry involvement ka neih nung in amau pawlte VISION leh MISSION hoih leh pomhuai ka sa hi. Amaute vision leh mission tuh mi gam a va om a sappau kia theite lak a Pathian thu puak ding chih ahi. Hiai pen Americate’ panlakna ahi deuh a, amau, khopi mun tuamtuam a Biakin phuh (Church Planting) leh Missionary nasepna pibawl mahmah uhi. Tu dinmun ah Europe, Latin America, Russia leh Asia te ah a kigawm in Biakin 70 val phutkheta uhi.

Tua Oxford a pastor ka training-na pen a kumkhatna ka zouta a, a kum nihna pen September 2018 in ka pan nawn ding hi. Himahleh, Germany a IBC HQ lam apan in deihsakna leh hanthawnna ka muh ziak in, kumnawn a full-time ministry join thei ding in IBC local church tuamtuam apan in sapna ka mu panpanta hi. Huchi ahih ziak in kei ading ordination lak poimohta hi. Pastor ordination pen Germany leh England hiam a laktheih himahleh, i saptuam EBC ah ordination lak ka lunggulh chitchiat a, IBC HQ in leng lem hon sakpih in recommendation hon pepah uhi.

EBC Saptuam apan ordination ka deihna ziak ahihleh, ka naupan apan a tunitan khalam a hon kemtou Saptuamte ka iitna, ban ah EBC Saptuamte’ mi ka hihna kepbitna ahi hi. Hiai ka ngetna heututen hon lemsakpih a Ordination hon piak ziak un ka kipak mahmah hi.

Thukhitna: Pathian theilou, Gammial i hih ziak in Kum 100 vel paita in Mikangte’n eite Pathian thu hong puak uhi. Tua Pathian thu hong puakte gam ah kum 5 val va khosa ka hih ziak in, tua missionary masate’ haksatna tuah tampite ka va theisuah hi. Huai hun lai a mikang (English) missionary te’n sum-le-pai, pilna-siamna leh pau-le-ham taksapnate ziak a lungkia mailou in i gam ah Pathian thu hon puak teitei ana hi uhi. Eileng tua Mikang missionary hangsante mahbang in, gammial gam (Europe leh America) te ah Gospel puak ding in Toupa’n hon sam hi!

Suanlian Tonsing
EBCC Bungmual

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC