Articles | KTZ | EBC

GOOD FRIDAY LEH EASTER SUNDAY ETKIKNA

(Luke 23:50-56, 24: 1-12)

Thumapi: Tukum Jesu vuina leh thohnawnna tanchinhoih li-te ka sim leh a vui ua Pathian gam lam-ente thil hih thupi dan leh a Thohnawnna a Angel in Angel chiphot le (Mathai in Angel a chih ziak in) Bang dia misi lak a mihing zong achihte zang a Pathian hon theihsak thute thupi salua in gen chimhuai bang ka sa kei a, Gen tam luat le omlou dia ka gintaak ziak in innsung ah bang ka khalam lawmte kiang bang leh Ka veng ua nupi thumpawlte lak ah bang ka gen kha sek hi. Huaikia leng Toupa’n hun salou ahi dia Lamdangtak in heututen Khristian Thukizakna a suah din Article khat hon gelh in chi-in hon gen uhi. Thupi hon petuanlou in Nang hoih na saksak hon chi zawmah uhi. Hichibang a zatak a gentheihna dia kong hon hong sak leh lampi hon sialsak i biak Pathian tung leh heutute tung ah kipahthu ka gen in Toupa thupina ka pia hi.

Jesu vuitute Arimathai khua a mi Joseph bang, Nikodem bang, Mari-Magdalini leh Mari dang chihte bang ahi ua, amaute’n Jesu thohnawnna mu a theichian tute leh a hong painawnna lam-ente ahi uhi. A lametna un hangsanna bang, kuhkalna bang, theihtelna bang, thilphalna bang atun hi. Huaite pansan a zil di tampite lak a tamlou kikum le i chi hi.

A lametna un bang hangsanna atun a, huchi bang a huhamtaka mite a gamtatlai uale thuakkhak di hiam mawhsak a om khak di hiam laulou in hangsan tak in Pilat kiang ah valut in Jesu luang valakhia a vui din va-ngen ngam uhi. Eite’n zaw Peter leh Johan, hangsan dan (Nas. 4:13 na a) i muhte a thu a gengen na hang a, atak a zatna di mun leh gen na di mun ahong tun chiang in innsung hi-in saptuam leh khotaang ah hitaleh gen ngamlou leh zangkhe ngamlou zel i hi. I Thessalonika 1:3, ah Paul in hichiin a chi hi- Pathian leh Pa ma ah ginna ziak a na thilhih dan uh, iit ziak a na Nnasep gimnate uh, Toupa Jesu lametna ziak a na kuhkalnate thei gige in. Pathian saptuam pawlte lak ah kon suang uhi a chi a, suanhuai thamching mah uh ahi dia? II Thessalonika 1:4 ah le a gennon zel hi. Eite hangsanna in Pathian a pahtawi kha hia? Ahihkeileh innsak innkhang adia mitdon huai pi i hi kha diam aw, i tui lak dan khong, i Job Card toh kisai bang leh i daai bawl dan khawng bang ei adi kia ngaihtuah a midang adia haksa khuallou tampi a om hi.

Hangsanna in, mihing laulou, Pathian le lau tuanlou, thil hoihlou sem dia poisakna himhim neilou a tunglam bang ngoh a vuah atam lua a eive, a tawmlua a eive chi a Pathian bang mohsa, a gense kha sekte hi hang kingaihtuah ni. Huai ban ah, a hangsanna un kuhkalna a tun a, etton thamching uh ka sa hi. Jesu luang lakhetute mitampi le a hih chi kholkei ua, pa chingtak mai luang Kros lek a va lak khiak tel haksat chi ka sa lua a kuhkal uh ka sa petmah. Pathian adia i kuhkalna leh i chihtaknate suanhuai thamching in mite’n hon mu nadi uam ki-enchian ni. Huai ban ah, kuhkalna in theihtelna a tun a, theihtelna in thilphalna a tun nawn hi. Nikodem leh Joseph in Jesu’ luang han a a siallai un numei a zuitute’n le a liamna ma khong a lupdan leh a ngatdan tanpha le a muchian mahmah ding un gintak huai hi.

Eite’n le i ittakte a sih ua i vui chiang un hansung i en teitei uhi. Jesu leng it a theichian sem utte adin lam tuamtuam ah theihchianna di tampi a om hi. A theihchianna un thilphalna thupitak a tun a, puanmalngat siang hoihtak man tampi hi din uphuai hi. Huai in a tuam ua gimlim nuh di-le mantam pipi hoihtak a helkhawm a bawlkholh sa tampi a tawi ua, Nikodem bang in le buk sawmnga vel a tawi a, numeite bang inleng tawi lai di hi ua, a liamna ma khawng a thupi dan bang muchian lua ahih man un huai tengpi nuh di a kichinglou lua di tawilou di unle a gintakhuai kei hi. Jesu hihna a theihchian luat ziak ua a kiphal dan uh thupi ka sa lua hi. A hihleh eite le Jesu sihna leh thohnawnna leh hongpai nawnna lamentute hi hang, i lametna in: Hangsanna, Kuhkalna, Theihtelna, Thilphalna chihte a hon tun hia leh? Ei numeite Jesu itna a hihna diktak theichiante ading bang in i ommun a thilpiak a Pathian nna i sep lual theihna uh hi a ka theih khat kon gen di. I numei pih Government lam a dinmun lian pipi nei tampite’n Missionary vaakna leh kong tuamtuam ah tampi in pan a na la ua, i-eng un i kipahpih mahmah ua amaute ziak in Pathian min i phat uhi. Himahleh numei tampite huchi bang a sum leh pai, tha leh zung apang zoulou tampi i om uhi, kei le ka hi. Ahihziak in Pathian in kei toh kituak hun dia hon totsak lampi khat Pathian min thupina din kon gen di. Nou tampite’n zaw na totsa uh ahihle ka gingta - Kilakna 3:20 ah “Ngai in kongkhak a ding in ka kiu hi, mi’n ka aw a zak a kong a hon leh a kiang ah ka lut dia amah toh nitak ann ka ne dia aman le kei toh a ne ding hi,” honchi a ka theih ziak in ken tuh eh! Toupa hong lut in Nang toh nekhawm giak khawm in i om dia anntang kon khak kep gige ta di ka chi hi. Jesu zintunna chi in ka ann huan teng in nou khat ka koih khe gige hi. Amah toh nekkhawm a giakkhawm ka chih chiang in ka kha muang in ka kipak mahmah a huai mah le vualzawlna ahi ka chipah mai hi. Innsung a ka tuu numeite kiang bang ah pasal na neih chiang un na pasalte uh innsung a ann huan a na pan chiang un na hih gige di uh ka chi hial hi.

Mikhual i neih chiale a omsung teng uh anntang khak kep hang a, a pai chiang ua khakkep nawnlou hi hang a ken zaw paikhe sak phal nawnlou. Khenkhat in zaw kalkhat in nikhat hiam ninih hiam zintun le chi na ua ken zaw mitphiat kal lel le hon omlouh san di ka ut kei hi. Ka zintun nung le kum bang zah hiam a hita a khatvei mahle suansam in hon ompih nai kei hi. A zawng pen in le utle hang Pathian Nna i ommun a i septheihna pen hi din le ka ngaihtuah hi. Pia un, piak in na om ding uh. Pathian in mihing lei a ba ngeilou chi a laa a i sak bang un tu damsung a muhtheih in hon pepah kei le le hon ba mang mahmah lou di ahi. Hon piak di hun Aman a thei mahmah di hi. Ken zaw i thil hihhoih sunsunte tu damsung in hon pe pahkei henla, a kiang i tun hun chiang in hon pe leh neiden zaw di hi hang a tun hon pepah lele kei bang in zaw kem siamlou di ing a pei mang pah di hi veng aw!

Huaiziak a i muanhuai louh mah Jesu’n thei in chin leikha leh tui-ek in a neksiatna ah gou kikhol kei un hon na chi ahi ka chi hi. Pathian min a i piak tengteng ei ding ahi a, na ann huan teng in Jesu zintun na nou khat koih khe gige lechin amah toh nekhawm giak khawm in na kithei dia na kha a muang in na kipak din kon ging ta hi.

Luke 24:5 ah a thohnawnna a Angel kampau, bang dia misi lak a mihing zong chih in ka lung hon khoih mahmah hi. Tulai mite misi lak a mihing zong di a tamlua uhi. Aziak tuh, rapture a Toupa Jesu a Misiangthoute la dia hong pai chiang in I Thes. 4:13-17 a i muh bang in Khrist a sisate a thou masa ding ua, huai khit chiang a eite hing dam a na omlaite toh huihkhua a Toupa tuak ding a amaute toh meilak a lakmang a omvek tadi hang a, mihing mang zonna thupi tak om di ahih man in, a khente’n misiangthou laakna om taktak ahi na diam chi in misi lak ah mihing zong di’n hanmual lam a delh di ua, Khrist a sisate’ hante kihong in hansuang kilawm taktakte kilumlet vek in a mu ding ua, Jesu sih iim a tup bang un iim theih nawn vual ahita kei ding. Gingtu site han tengteng leilehna a leilehsa mah bang ding in ka gingta hi (a huchih kei le lah Toupa’n hon ngaidam henla). Ka gintaakna ziak bel Jesu thohnawn inle numeite’n haan sitna suang kuan hon khukkhiak sak ding amahmah de aw chi a angaihtuah lai un hansuang khukkhiaksa in mu ua, han sung ah a lut ua a thou taktak chih a thei chian uhi.

Lazar a kaihthoh inle suang hem-un chi in suang hem sak hi. Huchibang a hanmun khong a le kilamdanna thupi tak omlou hileh nutsiat a omte lungtang a hoihlou lam a khauh deuhdeuh di ahih man in thohnawnna a omkei a chi ut di un ka gingta. A hihleh unau misiangthou laak a om chiang in nangle misi lak a mihing zong pawl in na pang diam? Kingaihtuah ni. Simtu ittakte athak in i tan chiat ah Toupa’n hon vualzawl hen!

Good Friday & Easter Sunday Etkikna

 

CONTACT DETAILS

Headquarter
Evangelical Baptist Convention
P.O. Box - 6
Dorcas Hall
New Lamka - 795 006
Churachandpur
Manipur, India


Phone: +91-3874 233340
Email: ebc.india@gmail.com
Locate us

© 2018 Evangelical Baptist Convention. All Rights Reserved. Designed By EBC